ന്യൂഫൗണ്ട്ലാൻഡിനെ ഭീതിയിലാഴ്ത്തി കാട്ടുതീ; നൂറുകണക്കിന് ആളുകളെ മാറ്റിപ്പാർപ്പിച്ചു

കിഴക്കൻ ന്യൂഫൗണ്ട്ലാൻഡിലെ കൺസെപ്ഷൻ ബേയുടെ പടിഞ്ഞാറൻ തീരത്ത് കാട്ടുതീ പടർന്നതിനെ തുടർന്ന് നിരവധി ചെറുപട്ടണങ്ങളിൽ നിന്നും ആളുകളെ ഒഴിപ്പിച്ചു. 150 ഹെക്ടറിലധികം സ്ഥലത്ത് തീ പടർന്നുപിടിച്ചതായി അധികൃതർ അറിയിച്ചു. കാനഡൻ പ്രസ് ആണ് വാർത്ത റിപ്പോർട്ട് ചെയ്തത്. Small Point–Adam’s Cove–Blackhead–Broad Cove, Kingston എന്നീ പ്രദേശങ്ങളിലെ നിവാസികളോടാണ് വീടുകൾ ഒഴിയാൻ പ്രാദേശിക സമയം ഉച്ചയ്ക്ക് 2 മണിയോടെ പ്രവിശ്യാ സർക്കാർ നിർദ്ദേശം നൽകിയത്. ഈ ജനവാസ കേന്ദ്രങ്ങളിൽ നിന്ന് ഏകദേശം ഒരു കിലോമീറ്റർ അകലെയാണ് തീപിടിത്തം.

തീ അണയ്ക്കുന്നതിനായി വാട്ടർ ബോംബറുകളും ഹെലികോപ്റ്ററുകളും കരസേനയും വോളണ്ടിയർ ഫയർ ഡിപ്പാർട്ട്‌മെന്റുകളെ സഹായിക്കുന്നുണ്ട്. കഴിഞ്ഞ ദിവസം രാത്രിയിൽ തന്നെ കാട്ടുതീ സംബന്ധിച്ച് പ്രവിശ്യാ വകുപ്പ് മുന്നറിയിപ്പ് നൽകിയിരുന്നു. അന്ന് 25 ഹെക്ടറിലായിരുന്നു തീപിടിത്തം.

വിക്ടോറിയ, എൻ.എൽ. എന്നിവിടങ്ങളിലെ പെർസാൽവിക് സ്കൂൾ കോംപ്ലക്സിൽ മാറ്റിപ്പാർപ്പിച്ചവർക്കായി താൽക്കാലിക താമസ സൗകര്യങ്ങൾ ഒരുക്കിയിട്ടുണ്ട്. സ്ഥിതിഗതികൾ സൂക്ഷ്മമായി വിലയിരുത്തി വരികയാണെന്നും സുരക്ഷാ ക്രമീകരണങ്ങൾ ശക്തമാക്കിയതായും പ്രവിശ്യാ അധികൃതർ അറിയിച്ചു.

കൂടുതൽ വിവരങ്ങൾക്കായി പൊതുജനങ്ങൾ ഔദ്യോഗിക അറിയിപ്പുകൾ ശ്രദ്ധിക്കണമെന്നും അധികൃതർ നിർദ്ദേശിച്ചു. കടുത്ത വേനലും വരണ്ട കാലാവസ്ഥയുമാണ് കാട്ടുതീ വ്യാപകമാകാൻ കാരണമെന്നാണ് വിലയിരുത്തൽ. സമീപകാലത്ത് ഈ മേഖലയിൽ തുടർച്ചയായി കാട്ടുതീ റിപ്പോർട്ട് ചെയ്യപ്പെടുന്നുണ്ട്. ജനങ്ങൾ ജാഗ്രത പാലിക്കണമെന്ന് മുന്നറിയിപ്പിൽ പറയുന്നു.