ഉപയോക്താക്കൾക്ക് അവരുടെ ഇൻറർനെറ്റ് ഡാറ്റ ഉപയോഗത്തിൽ കൂടുതൽ നിയന്ത്രണം നൽകാൻ സഹായിക്കുന്ന ഒരു പുതിയ ഫീച്ചർ അവതരിപ്പിക്കാൻ ഒരുങ്ങുകയാണ് വാട്സ്ആപ്പ്. അമിതമായ ഡാറ്റ ഉപഭോഗത്താൽ മടുത്തവർക്ക് ഒരു ഗെയിം-ചേഞ്ചർ ആകാൻ സാധ്യതയുള്ള ഒരു ഫീച്ചർ ആയിരിക്കും വരാനിരിക്കുന്നതെന്നാണ് റിപ്പോർട്ട്. പുതിയ ഫീച്ചർ വാട്സ്ആപ്പ് ബീറ്റ പതിപ്പ് 2.25.12.24 ൽ കണ്ടെത്തിയിട്ടുണ്ട് എന്ന് വാബീറ്റഇൻഫോയുടെ റിപ്പോർട്ടിൽ വിശദീകരിക്കുന്നു.
ഇപ്പോൾ, ഫോട്ടോകളും വീഡിയോകളും ഓട്ടോമാറ്റിക്കായി ഡൗൺലോഡ് ചെയ്യപ്പെടുന്നതിൻറെ റെസലൂഷൻ നിയന്ത്രിക്കാൻ ഉപയോക്താക്കളെ അനുവദിക്കുന്ന ഒരു സവിശേഷത വാട്സ്ആപ്പ് പരീക്ഷിക്കുകയാണെന്നാണ് വിവരം. അതായത്, ഉയർന്ന റെസല്യൂഷനിലുള്ള എല്ലാ മീഡിയ ഫയലുകളും ഡൗൺലോഡ് ചെയ്യുന്നത് ഇപ്പോൾ നിങ്ങൾക്ക് ഒഴിവാക്കാം. അങ്ങനെ നിങ്ങളുടെ ഡാറ്റയും സ്റ്റോറേജ് സ്ഥലവും ലാഭിക്കാം. വാട്സ്ആപ്പ് ഈ പുതിയ ഫീച്ചറിൻറെ പരീക്ഷണത്തിലാണെന്ന് വാബീറ്റഇൻഫോ ആണ് റിപ്പോർട്ട് ചെയ്തത്.
നിങ്ങളുടെ വാട്സ്ആപ്പിലേക്ക് ആരെങ്കിലും ഉയർന്ന റെസലൂഷൻ ഉള്ള ഒരു ചിത്രമോ വീഡിയോയോ അയച്ചാൽ ഈ ഫീച്ചർ ഉപയോഗിച്ച് വാട്സ്ആപ്പ് അതിൻറെ ഒരു കംപ്രസ് ചെയ്ത (സ്റ്റാൻഡേർഡ്) പതിപ്പ് സ്വയം സൃഷ്ടിക്കും. നിങ്ങളുടെ ഓട്ടോ-ഡൗൺലോഡ് ക്രമീകരണങ്ങൾ സ്റ്റാൻഡേർഡ് പതിപ്പ് മാത്രം ഡൗൺലോഡ് ചെയ്യാൻ സജ്ജീകരിച്ചിട്ടുണ്ടെങ്കിൽ, അയച്ചയാൾ ഉയർന്ന റെസലൂഷൻ ഫയൽ പങ്കിട്ടാലും നിങ്ങൾക്ക് അത് കംപ്രസ്ഡ് ഫയലായി ലഭിക്കും.
നിലവിൽ വാട്സ്ആപ്പിൻറെ ഓട്ടോ-ഡൗൺലോഡ് ക്രമീകരണം ഫയലുകൾ അവ അയയ്ക്കുന്ന ഗുണനിലവാരത്തിൽ തന്നെ ഡൗൺലോഡ് ചെയ്യുന്ന തരത്തിലാണ്. ഇത് അനാവശ്യമായ മൊബൈൽ ഡാറ്റ ഉപഭോഗത്തിലേക്ക് നയിക്കുന്നു. വരാനിരിക്കുന്ന ഈ മാറ്റം ഉപയോക്താക്കൾക്ക് അവരുടെ ഇഷ്ടപ്പെട്ട ഡൗൺലോഡ് ഗുണനിലവാരം- സ്റ്റാൻഡേർഡ് അല്ലെങ്കിൽ ഉയർന്നത് എന്ന തരത്തിൽ മുൻകൂട്ടി തിരഞ്ഞെടുക്കാനുള്ള ഓപ്ഷൻ നൽകും.
