വെസ്റ്റ്ജെറ്റ് സീറ്റുകളിലെ സുരക്ഷാ വീഴ്ച: വീഡിയോ വൈറലാകുന്നതിന് മുൻപേ കാനഡയ്ക്ക് മുന്നറിയിപ്പ് ലഭിച്ചതായി രേഖകൾ

ഒട്ടാവ: വെസ്റ്റ്ജെറ്റ് വിമാനങ്ങളിൽ പുതുതായി ക്രമീകരിച്ച സീറ്റുകൾ യാത്രക്കാരുടെ സുരക്ഷയ്ക്ക് ഭീഷണിയാണെന്ന് ആഴ്ചകൾക്ക് മുൻപേ കനേഡിയൻ ഗതാഗത വകുപ്പായ ട്രാൻസ്പോർട്ട് കാനഡയ്ക്ക് മുന്നറിയിപ്പ് ലഭിച്ചിരുന്നതായി വെളിപ്പെടുത്തൽ. സിബിസി ന്യൂസ് ആക്സസ് ടു ഇൻഫർമേഷൻ നിയമപ്രകാരം ശേഖരിച്ച രേഖകളിലാണ് ഈ വിവരമുള്ളത്. 2025 ഡിസംബർ 26-ന് ഒരു യാത്രക്കാരൻ നേരിട്ട ദുരനുഭവം വൈറലാകുന്നതിന് മുൻപ് തന്നെ, നവംബറിൽ നടന്ന ഒരു സംഭവത്തെ ആസ്പദമാക്കി വിമാനത്തിലെ ജീവനക്കാരൻ ഔദ്യോഗികമായി പരാതി നൽകിയിരുന്നു.

2025 ഡിസംബർ 5-നാണ് അഞ്ചുപേജുള്ള സുരക്ഷാ റിപ്പോർട്ട് ട്രാൻസ്പോർട്ട് കാനഡയുടെ സിവിൽ ഏവിയേഷൻ വിഭാഗത്തിന് ലഭിക്കുന്നത്. നവംബർ 29-ന് മെക്സിക്കോയിലെ പ്യൂർട്ടോ വല്ലാർട്ടയിൽ നിന്ന് കാൽഗറിയിലേക്കുള്ള യാത്രയ്ക്കിടെ, ഉയരക്കൂടുതലുള്ള ഒരു യാത്രക്കാരൻ സീറ്റിൽ കുടുങ്ങിപ്പോയ സംഭവം റിപ്പോർട്ടിൽ വിശദീകരിക്കുന്നു. വിമാനത്തിൽ കൂടുതൽ സീറ്റുകൾ ഉൾപ്പെടുത്താനായി ലെഗ്‌റൂം കുറച്ചതാണ് ഇതിന് കാരണമായത്. അടിയന്തര സാഹചര്യത്തിൽ ഇത്തരം സീറ്റുകളിൽ നിന്ന് യാത്രക്കാർക്ക് സ്വയം പുറത്തുകടക്കാനാവില്ലെന്നും ഇത് മറ്റുള്ളവരുടെ ജീവനും ഭീഷണിയാണെന്നും ‘ഇമ്മിനന്റ് സേഫ്റ്റി റിസ്ക്’ എന്ന പദം ഉപയോഗിച്ച് റിപ്പോർട്ടിൽ മുന്നറിയിപ്പ് നൽകിയിരുന്നു.

ഈ പരാതിയിൽ ഡിസംബർ 30-ന് ട്രാൻസ്പോർട്ട് കാനഡ മറുപടി നൽകിയിരുന്നു. എയർലൈൻ തങ്ങളുടെ സേഫ്റ്റി മാനേജ്‌മെന്റ് സിസ്റ്റം വഴി ഈ പ്രശ്നം പരിശോധിക്കുന്നുണ്ടെന്നും വകുപ്പ് ഇത് നിരീക്ഷിക്കുമെന്നുമാണ് അറിയിച്ചിരുന്നത്. എന്നാൽ, ഇതിന് ശേഷവും ജനുവരി 7-ന് കാൻകൂണിൽ നിന്ന് റെജീനയിലേക്കുള്ള യാത്രയ്ക്കിടെ സമാനമായ പ്രയാസങ്ങൾ നേരിട്ടതായി യാത്രക്കാർ വെളിപ്പെടുത്തി. സുരക്ഷാ ഭീഷണി മുന്നിൽ കണ്ടിട്ടും ഗതാഗത വകുപ്പ് മുൻകൂട്ടി നടപടിയെടുക്കാത്തതിനെതിരെ യാത്രക്കാർ പ്രതിഷേധം രേഖപ്പെടുത്തി.

https://yfalanguageacademy.com

വിമർശനങ്ങൾ ശക്തമായതിനെ തുടർന്ന് ജനുവരി 16-ന് വെസ്റ്റ്ജെറ്റ് തങ്ങളുടെ പുതിയ സീറ്റിംഗ് ക്രമീകരണം പിൻവലിക്കുന്നതായി പ്രഖ്യാപിച്ചു. 180 സീറ്റുകളുണ്ടായിരുന്ന മൂന്ന് വിമാനങ്ങൾ ഇതിനകം 174 സീറ്റുകളുള്ള പഴയ രീതിയിലേക്ക് മാറ്റിയതായി കമ്പനി അറിയിച്ചു. എന്നാൽ, സുരക്ഷാ മാനദണ്ഡങ്ങൾ പാലിച്ചാണ് മാറ്റങ്ങൾ വരുത്തിയതെന്നാണ് കമ്പനിയുടെ വാദം. അതേസമയം, വിമാനങ്ങളിലെ സീറ്റുകൾ തമ്മിലുള്ള അകലം സംബന്ധിച്ച് നിലവിൽ കാനഡയിൽ നിയമപരമായ നിബന്ധനകളില്ലെന്ന് ട്രാൻസ്പോർട്ട് കാനഡ വ്യക്തമാക്കി. ഇതുമായി ബന്ധപ്പെട്ട അന്വേഷണം പൂർത്തിയായാൽ നിയമലംഘനം കണ്ടെത്തിയാൽ നടപടിയുണ്ടാകുമെന്നും അധികൃതർ അറിയിച്ചു.

WestJet seat safety lapse: Canada was warned before video went viral, documents show

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt