ഈ വരുന്ന ശൈത്യകാലത്ത് ഒട്ടാവയിൽ നിന്ന് വിന്നിപെഗിലേക്കും ഫ്ലോറിഡയിലെ ഫോർട്ട് മയേഴ്സിലേക്കുമുള്ള തങ്ങളുടെ നോൺ-സ്റ്റോപ്പ് വിമാന സർവീസുകൾ വെസ്റ്റ് ജെറ്റ് (WestJet) റദ്ദാക്കിയതായി സ്ഥിരീകരിച്ചു. ആവശ്യകതയിലുണ്ടായ മാറ്റങ്ങളാണ് ഈ തീരുമാനത്തിന് പിന്നിലെന്ന് വെസ്റ്റ് വ്യക്തമാക്കി. മാറുന്ന യാത്രാ ആവശ്യകതകൾക്ക് അനുസരിച്ച്, ചില റൂട്ടുകളിൽ നിന്നുള്ള സർവീസുകൾ പുനഃക്രമീകരിക്കുകയാണെന്ന് വെസ്റ്റ് ജെറ്റ് പ്രസ്താവനയിൽ അറിയിച്ചു.
കാനഡയ്ക്കുള്ളിലും കാനഡയും യൂറോപ്പും തമ്മിലുള്ള അന്താരാഷ്ട്ര സർവീസുകളിലും, അതുപോലെ കൂടുതൽ ആവശ്യക്കാരുള്ള ഉഷ്ണമേഖലാ ലക്ഷ്യസ്ഥാനങ്ങളിലേക്കുമുള്ള വിമാന സർവീസുകൾ വർദ്ധിപ്പിക്കാനാണ് കമ്പനി ലക്ഷ്യമിടുന്നത്. “അതിഥികൾക്ക് എവിടെ പോകാനാണോ താൽപ്പര്യം, അവിടേക്ക് പറക്കുന്നതിനായി വെസ്റ്റ് ജെറ്റ് നിരന്തരം നെറ്റ്വർക്ക് ഷെഡ്യൂൾ വിലയിരുത്തുകയും ക്രമീകരിക്കുകയും ചെയ്യുന്നു,” വെസ്റ്റ് ജെറ്റ് കൂട്ടിച്ചേർത്തു.
ഒട്ടാവയ്ക്കും വിന്നിപെഗിനും ഇടയിലുള്ള വെസ്റ്റ് ജെറ്റ് വിമാനങ്ങൾ ഈ വേനൽക്കാലത്ത് പതിവുപോലെ സർവീസ് നടത്തും. പക്ഷേ, ശൈത്യകാലത്തോടെ ഈ സർവീസ് വെസ്റ്റ് ജെറ്റ് നിർത്തലാക്കും. നിലവിൽ, എയർ കാനഡയും പോർട്ടർ എയർലൈൻസും ഒട്ടാവയ്ക്കും വിന്നിപെഗിനും ഇടയിൽ നേരിട്ടുള്ള വിമാനങ്ങൾ ഓടിക്കുന്നുണ്ട്. കഴിഞ്ഞ ശൈത്യകാലത്ത് പോർട്ടർ എയർലൈൻസ് ഒട്ടാവയിൽ നിന്ന് ഫോർട്ട് മയേഴ്സിലേക്ക് സീസണൽ സർവീസ് നടത്തിയിരുന്നു.
പോർട്ടർ എയർലൈൻസ് ഈ വർഷം ആദ്യം ഒട്ടാവയിൽ നിന്ന് ലാസ് വെഗാസിലേക്കുള്ള വേനൽക്കാല വിമാനങ്ങളും റദ്ദാക്കിയിരുന്നു. ഇപ്പോൾ വെസ്റ്റ് ജെറ്റ് എടുത്ത ഈ പുതിയ തീരുമാനം, ഈ ശൈത്യകാലത്ത് ഒട്ടാവയിൽ നിന്ന് ഈ സ്ഥലങ്ങളിലേക്ക് യാത്ര ചെയ്യാൻ പ്ലാൻ ചെയ്യുന്നവർക്ക് ബുദ്ധിമുട്ടുണ്ടാക്കും. അതുകൊണ്ട്, യാത്രക്കാർ മറ്റ് എയർലൈനുകൾ നോക്കുകയോ അല്ലെങ്കിൽ യാത്ര ചെയ്യാൻ വേറെ വഴികൾ കണ്ടെത്തുകയോ ചെയ്യേണ്ടിവരും.
