രാജ്യത്തെ നടുക്കിയ അഹമ്മദാബാദ് വിമാനാപകടത്തില് ഒരു മലയാളി ഉള്പ്പടെ 294 പേരാണ് കൊല്ലപ്പെട്ടത്. അഹമ്മദാബാദിൽ നിന്ന് പറന്നുയർന്നതിന് തൊട്ടുപിന്നാലെ തകർന്നു വീണ എയർ ഇന്ത്യ AI171 വിമാനത്തിന്റെ അപകട കാരണം കണ്ടെത്താൻ സമഗ്രമായ അന്വേഷണം പുരോഗമിക്കുകയാണ്. പൈലറ്റിന്റെ പിഴവ്, യന്ത്രത്തകരാറുകൾ, പക്ഷിയുമായുള്ള കൂട്ടിയിടി തുടങ്ങിയ നിരവധി സാധ്യതകളാണ് നിലവിൽ വിദഗ്ദ്ധർ ചൂണ്ടിക്കാട്ടുന്നത്. എന്നാൽ, ഗുജറാത്തിന്റെ നിലവിലെ രാഷ്ട്രീയ സാഹചര്യങ്ങൾ കണക്കിലെടുത്ത്, അട്ടിമറിയുടെ സാധ്യതയും അന്വേഷണ പരിധിയിൽ ഉൾപ്പെടുത്തണമെന്ന് ചില വ്യോമയാന വിദഗ്ദ്ധർ അഭിപ്രായപ്പെടുന്നുണ്ട്.
സ്ട്രാറ്റജിക് ഏവിയേഷൻ സൊല്യൂഷൻസ് കൺസൾട്ടൻസിയുടെ ചെയർമാനും മുൻ പൈലറ്റുമായ നീൽ ഹാൻസ്ഫോർഡ് ആണ് ഈ സാധ്യത മുന്നോട്ട് വെച്ചവരിൽ ഒരാൾ. അദ്ദേഹം പറയുന്നതനുസരിച്ച്, സംസ്ഥാനത്ത് നിലനിൽക്കുന്ന രാഷ്ട്രീയ സംഘർഷങ്ങൾ കണക്കിലെടുത്ത് അട്ടിമറിയുടെ സാധ്യതയും അന്വേഷിക്കണം. വിമാനത്തിന്റെ ഇന്ധന ടാങ്ക് ഏറെക്കുറെ നിറഞ്ഞിരുന്നതായി റിപ്പോർട്ടുണ്ട്. ഇന്ധനത്തിൽ മായം കലർത്തിയതാകാം മറ്റൊരു സാധ്യതയെന്നും ഹാൻസ്ഫോർഡ് പറയുന്നു. ഇത് ഇന്ധന വിതരണത്തിൽ തടസ്സമുണ്ടാക്കുകയും എഞ്ചിൻ പ്രശ്നങ്ങളിലേക്ക് നയിക്കുകയും ചെയ്യാം.
വിമാനത്തിന്റെ ബ്ലാക്ക് ബോക്സും ഫ്ലൈറ്റ് ഡാറ്റാ റെക്കോർഡറും ഉൾപ്പെടെയുള്ള വിവരങ്ങൾ വിശകലനം ചെയ്താലേ അപകടത്തിന്റെ യഥാർത്ഥ കാരണം കണ്ടെത്താൻ സാധിക്കൂ എന്നാണ് വിദഗ്ദ്ധർ പറയുന്നത്. എന്നിരുന്നാലും, ദുരന്തത്തിലേക്ക് നയിച്ചേക്കാവുന്ന എല്ലാ സാധ്യതകളും സൂക്ഷ്മമായി പരിശോധിക്കപ്പെടേണ്ടതുണ്ടെന്ന് അവർ ഊന്നിപ്പറയുന്നു. നിലവിലെ അന്വേഷണത്തിൽ, എഞ്ചിൻ തകരാർ, ഫ്ലാപ്പുകൾ വിന്യസിക്കാത്തത്, പൈലറ്റ് പിഴവ്, പക്ഷിയിടി എന്നിവയാണ് പ്രധാനമായും പരിഗണിക്കുന്നത്. ഇതിനൊപ്പം അട്ടിമറി സാധ്യതയും അന്വേഷിക്കുന്നത് കൂടുതൽ വിവരങ്ങൾ നൽകും.
