ചികിത്സ കാത്തിരിപ്പ് സമയം ദീർഘിക്കുന്നു; അറ്റ്‌ലാന്റിക് പ്രവിശ്യകളിൽ സ്ഥിതി ഗുരുതരം

നോവ സ്കോഷ്യ: അറ്റ്‌ലാന്റിക് പ്രവിശ്യകളിൽ സ്പെഷ്യലിസ്റ്റ് ഡോക്ടർമാരുടെ ചികിത്സ ലഭിക്കുന്നതിനായി രോഗികൾക്ക് ദീർഘകാലം കാത്തിരിക്കേണ്ടി വരുന്നതായി ഫ്രേസർ ഇൻസ്റ്റിറ്റ്യൂട്ടിന്റെ ഏറ്റവും പുതിയ പഠന റിപ്പോർട്ട്. 2025-ലെ കണക്കുകൾ പ്രകാരം, ഒരു ഫാമിലി ഡോക്ടറുടെ ശുപാർശ ലഭിച്ച ശേഷം വിദഗ്ധ ചികിത്സ ആരംഭിക്കാൻ കാനഡയിൽ ശരാശരി 28.6 ആഴ്ച കാത്തിരിക്കണം. ഇത് ഏറ്റവും ഉയർന്ന രണ്ടാമത്തെ നിരക്കാണ്. അറ്റ്‌ലാന്റിക് കാനഡയിലെ പ്രവിശ്യകളിലാണ് രാജ്യത്ത് തന്നെ ഏറ്റവും മോശം സാഹചര്യമുള്ളത്.

പ്രവിശ്യകൾ തിരിച്ചുള്ള കണക്കുകളിൽ ന്യൂ ബ്രൺസ്‌വിക്കിൽ വിദഗ്ധ ചികിത്സയ്ക്കായി രോഗികൾ ശരാശരി 61 ആഴ്ചയോളം കാത്തിരിക്കേണ്ടി വരുന്നു. പ്രിൻസ് എഡ്വേർഡ് ഐലൻഡ് (49.7 ആഴ്ച), നോവ സ്കോട്ടിയ (49 ആഴ്ച), ന്യൂഫൗണ്ട്‌ലാൻഡ് ആൻഡ് ലാബ്രഡോർ (43 ആഴ്ച) എന്നിവിടങ്ങളിലും സ്ഥിതി ആശങ്കാജനകമാണ്.

1990-കളിൽ മെഡിക്കൽ സീറ്റുകൾക്കും റെസിഡൻസി പ്രോഗ്രാമുകൾക്കും ഏർപ്പെടുത്തിയ നിയന്ത്രണങ്ങളാണ് സ്പെഷ്യലിസ്റ്റ് ഡോക്ടർമാരുടെ ഇന്നത്തെ ക്ഷാമത്തിന് പ്രധാന കാരണമെന്ന് വിദഗ്ധർ ചൂണ്ടിക്കാട്ടുന്നത്. ആശുപത്രികളിൽ നിന്നും ഡിസ്ചാർജ് ചെയ്യപ്പെടുന്ന രോഗികൾക്ക് ദീർഘകാല പരിചരണത്തിനായി കിടക്കകൾ ലഭിക്കാത്തത് ആശുപത്രി സംവിധാനങ്ങളെയാകെ നിശ്ചലമാക്കുന്നുണ്ട്. ഇത് എമർജൻസി വിഭാഗങ്ങളിലും വലിയ തിരക്കിന് കാരണമാകുന്നു.

പി.ഇ.ഐ പോലുള്ള പ്രവിശ്യകൾ കൂടുതൽ ഡോക്ടർമാരെ നിയമിക്കാനുള്ള നടപടികൾ ആരംഭിച്ചിട്ടുണ്ടെങ്കിലും, നിലവിലുള്ള ബാക്ക്‌ലോഗ് കുറയ്ക്കാൻ ഇതുകൊണ്ട് മാത്രം സാധിക്കില്ല. ന്യൂറോ സർജറി, ഓർത്തോപീഡിക് സർജറി തുടങ്ങിയ വിഭാഗങ്ങളിലാണ് ഏറ്റവും കൂടുതൽ കാത്തിരിപ്പ് സമയമുള്ളത്. ചികിത്സാ രംഗത്തെ ഈ പ്രതിസന്ധി പരിഹരിക്കാൻ പൊതു-സ്വകാര്യ പങ്കാളിത്ത മാതൃകയിലുള്ള പരിഷ്കാരങ്ങൾ വേണമെന്ന് ഫ്രേസർ ഇൻസ്റ്റിറ്റ്യൂട്ട് വ്യക്തമാക്കി.

അതേസമയം, സ്വകാര്യ മേഖലയ്ക്ക് കൂടുതൽ പ്രാധാന്യം നൽകുന്നത് പൊതുജനാരോഗ്യ സംവിധാനത്തെ തകർക്കുമെന്നും ഡോക്ടർമാരുടെ ലഭ്യത കുറയ്ക്കുമെന്നും ആരോഗ്യ പ്രവർത്തകർ മുന്നറിയിപ്പ് നൽകുന്നു. ഓരോ രോഗിയെയും ചികിത്സിക്കുന്നതിനനുസരിച്ച് ആശുപത്രികൾക്ക് ഫണ്ട് നൽകുന്ന രീതി നടപ്പിലാക്കുന്നത് സേവനം വേഗത്തിലാക്കാൻ സഹായിക്കുമെന്ന് ചില പോളിസി വിദഗ്ധർ അഭിപ്രായപ്പെടുന്നുണ്ട്.

കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt

Treatment waiting times are getting longer; the situation is critical in the Atlantic provinces