നഴ്സിങ് ഹോമിനായി കാത്തിരിപ്പ്: ന്യൂ ബ്രൺസ്‌വിക്കിലെ മുതിർന്ന പൗരന്മാർ ആശുപത്രികളിൽ മരിച്ചുവീഴുന്നു

ന്യൂ ബ്രൺസ്‌വിക്കിൽ മുതിർന്ന പൗരന്മാർക്ക് ആവശ്യമായ പരിചരണം ലഭിക്കുന്നില്ലെന്ന് റിപ്പോർട്ട്. നഴ്സിങ് ഹോമുകളിൽ കിടക്കകൾ കിട്ടാൻ വൈകുന്നത് കാരണം നിരവധി പേർ ആശുപത്രികളിൽ കഴിയേണ്ടി വരുന്നു. ഇത് വലിയൊരു പ്രതിസന്ധിയായി മാറിയിട്ടുണ്ടെന്ന് സീനിയേഴ്സ് അഡ്വക്കേറ്റ് ആയ സെസിൽ കസിസ്റ്റ പറയുന്നു. നഴ്സിങ് ഹോമിൽ പ്രവേശനം കാത്തു കഴിഞ്ഞിരുന്ന തൻ്റെ പരിചയക്കാരായ അഞ്ചുപേർ ഈയിടെയായി മരണപ്പെട്ടുവെന്നും അവർ കൂട്ടിച്ചേർത്തു. ഈ പ്രശ്നത്തെ അവർ ഒരു “ടൈം ബോംബ്” എന്നാണ് വിശേഷിപ്പിച്ചത്.

കസിസ്റ്റയുടെ കണക്കുകൾ പ്രകാരം, ജൂലൈ മാസത്തിൽ 1,161 പേരാണ് നഴ്സിങ് ഹോം പ്രവേശനത്തിനായി കാത്തിരുന്നത്. ഇതിൽ 532 പേർ ആശുപത്രികളിൽ ആയിരുന്നു. ഓഗസ്റ്റിൽ ഈ എണ്ണം 1,144 ആയി കുറഞ്ഞെങ്കിലും, 510 പേർ ഇപ്പോഴും ആശുപത്രികളിൽ തുടരുന്നു. ആശുപത്രികളിൽ കഴിയുന്നവർക്ക് മുൻഗണന നൽകിയിട്ടും കാര്യമായ മാറ്റം ഉണ്ടായിട്ടില്ല. നിലവിൽ, ഹൊറൈസൺ ഹെൽത്ത് നെറ്റ്‌വർക്കിൻ്റെ ആശുപത്രികളിലെ 38% കിടക്കകളും ഇത്തരത്തിൽ പരിചരണം ആവശ്യമുള്ള മുതിർന്ന പൗരന്മാർക്ക് വേണ്ടിയാണ് ഉപയോഗിക്കുന്നത്.

ഇത് ആശുപത്രികളുടെ മൊത്തം ശേഷിയെ ബാധിക്കുന്നു. പല ആശുപത്രികളിലെയും കിടക്കകൾ 103% വരെ നിറഞ്ഞിരിക്കുന്നതായി കണക്കുകൾ വ്യക്തമാക്കുന്നു. ഹോം കെയർ സേവനങ്ങൾ താങ്ങാൻ കഴിയാത്തത് കാരണം പലരും അത് നിരസിക്കുന്നുണ്ടെന്ന് എൻ.ബി. സ്പെഷ്യൽ കെയർ ഹോം അസോസിയേഷൻ പ്രസിഡൻ്റ് ജാനിസ് സീലി പറയുന്നു. ഏകദേശം 42% മുതിർന്ന പൗരന്മാരും ഹോം കെയർ സേവനങ്ങൾ വേണ്ടെന്ന് വെക്കുന്നതായി അവർ ചൂണ്ടിക്കാട്ടി.

രോഗിയുടെ അവസ്ഥ നേരത്തെ വിലയിരുത്തിയിരുന്നെങ്കിൽ അവർക്ക് സ്വന്തം വീടുകളിൽ കൂടുതൽ കാലം കഴിയാൻ സാധിക്കുമായിരുന്നു. എന്നാൽ, രോഗികളുടെ ആരോഗ്യനില വിലയിരുത്തുന്നതിന് പോലും 60 മുതൽ 90 ദിവസം വരെ കാത്തിരിക്കേണ്ടി വരുന്നു. ഈ വിഷയത്തിൽ സർക്കാർ തലത്തിൽ കൃത്യമായ ഏകോപനമില്ലാത്തതാണ് പ്രധാന പ്രശ്നമെന്നാണ് ജാനിസ് സീലി വിശ്വസിക്കുന്നത്. ഇതിന് ഒരു പരിഹാരമായി സീനിയേഴ്സിനും ദീർഘകാല പരിചരണത്തിനും വേണ്ടി പ്രത്യേക വകുപ്പ് രൂപീകരിക്കണമെന്ന് അവർ ആവശ്യപ്പെട്ടു.

നിലവിലെ സാഹചര്യത്തിന് ആരും ഉത്തരവാദിത്തം ഏറ്റെടുക്കാൻ തയ്യാറാകുന്നില്ലെന്നും, ആളുകൾ മരിച്ചുകൊണ്ടിരിക്കുന്നു എന്ന കാര്യം താൻ നേരിട്ട് പറയേണ്ടി വരുമെന്ന് ഒരിക്കലും വിചാരിച്ചിരുന്നില്ലെന്നും അവർ വിഷമത്തോടെ പറഞ്ഞു. ഈ വിഷയത്തിൽ പ്രീമിയർ സൂസൻ ഹോൾട്ട് ഉൾപ്പെടെയുള്ള പ്രവിശ്യാ ഉദ്യോഗസ്ഥരുമായി ഉടൻ തന്നെ കൂടിക്കാഴ്ച നടത്താൻ തീരുമാനിച്ചിട്ടുണ്ടെന്നും അവർ വ്യക്തമാക്കി.

Waiting for a nursing home: New Brunswick seniors are dying in hospitals

കാനഡയിലെ ഏറ്റവും പുതിയ വാർത്തകൾക്കായി:

https://chat.whatsapp.com/JNSnrvnSqw1DUJljLTLp82