ബാധയൊഴിപ്പിക്കാനെന്ന പേരിൽ ക്രൂരത; ഒരു മണിക്കൂറോളം മുറിക്കുള്ളിൽ പൂട്ടിയിട്ടു, പെൺകുട്ടിയെ ക്രൂരമായി മർദ്ദിച്ച് സോഷ്യൽ മീഡിയയിലെ വൈറൽ ‘തന്ത്രി’

കൊല്ലം: പുത്തൂരിൽ ബാധയൊഴിപ്പിക്കാനെന്ന പേരിൽ പെൺകുട്ടിയെ ലൈംഗികമായി പീഡിപ്പിക്കുകയും ക്രൂരമായി മർദ്ദിക്കുകയും ചെയ്ത സംഭവത്തിൽ ജോത്സ്യൻ മുരാരി തന്ത്രി എന്ന രാജൻ ബാബു പിടിയിലായി. ഭരണിക്കാവിലെ ഉദയ റോയൽ ടവർ ഹോട്ടലിൽ നിന്നാണ് ശാസ്താംകോട്ട, പുത്തൂർ പൊലീസ് സംഘം സംയുക്തമായി പ്രതിയെ പിടികൂടിയത്. പൂജയ്ക്കെന്ന വ്യാജേന പെൺകുട്ടിയെ മുറിക്കുള്ളിൽ പൂട്ടിയിട്ട് ഉപദ്രവിക്കുകയായിരുന്നുവെന്ന് പൊലീസ് അറിയിച്ചു. പ്രതിയുടെ വീട്ടിലെ കിടപ്പുമുറിയിൽ രക്തക്കറ കണ്ടെത്തിയത് സംഭവത്തിന്റെ ക്രൂരത വെളിപ്പെടുത്തുന്നു.

പെൺകുട്ടിയെ പൂജാമുറിയിലേക്ക് തനിച്ച് കൊണ്ടുപോകാനുള്ള നീക്കത്തെ ആദ്യം അമ്മ എതിർത്തിരുന്നതായി ബന്ധുക്കൾ വെളിപ്പെടുത്തി. എന്നാൽ രാജൻ ബാബുവിന്റെ അമ്മയും ഭാര്യയും ചേർന്ന് പെൺകുട്ടിയുടെ അമ്മയെ നിർബന്ധിക്കുകയും കാര്യങ്ങൾ പറഞ്ഞ് ബോധ്യപ്പെടുത്തുകയുമായിരുന്നു. കുട്ടിയെ തനിച്ച് വിട്ടാൽ മാത്രമേ ബാധയൊഴിയൂ എന്ന് വിശ്വസിപ്പിച്ചാണ് പ്രതി പെൺകുട്ടിയെ മുറിക്കുള്ളിലേക്ക് കൊണ്ടുപോയത്. ഒരു മണിക്കൂറോളം മുറി അടച്ചിട്ട നിലയിലായിരുന്നു.

മുറിക്കുള്ളിൽ പെൺകുട്ടി നേരിട്ടത് അതിക്രൂരമായ അനുഭവങ്ങളായിരുന്നുവെന്ന് ബന്ധുക്കൾ ആരോപിക്കുന്നു. പൂജാമുറിയെന്ന് പറഞ്ഞ് പെൺകുട്ടിയെ എത്തിച്ചത് കിടപ്പുമുറിയിലായിരുന്നു. അവിടെ വെച്ച് പെൺകുട്ടിയെ ക്രൂരമായി മർദ്ദിക്കുകയും ലൈംഗികാതിക്രമത്തിന് ഇരയാക്കുകയും ചെയ്തു. പീഡനത്തിനിടെ പെൺകുട്ടി കരഞ്ഞ് ബഹളം വെച്ചതോടെയാണ് സംഭവം പുറംലോകമറിഞ്ഞത്. പീഡനവിവരം പുറത്തറിയാതിരിക്കാൻ ‘ബാധ കയറി’ എന്ന് പറഞ്ഞ് അമ്മയെ ഭയപ്പെടുത്താനും പ്രതി ശ്രമിച്ചു.

മുറിക്കുള്ളിൽ നിന്ന് കരഞ്ഞുകൊണ്ട് ഓടിവന്ന പെൺകുട്ടി അമ്മയെ കെട്ടിപ്പിടിച്ച് വിവരം പറയുകയായിരുന്നു. ഈ സമയം കുട്ടിയെ തൊടരുതെന്നും ബാധ അമ്മയിലേക്കും പകരുമെന്നും പറഞ്ഞ് രാജൻ ബാബു പരിഭ്രാന്തി സൃഷ്ടിച്ചു. എന്നാൽ നാട്ടുകാർ ഓടിക്കൂടുകയും പ്രശ്നം വഷളാകുമെന്ന് മനസ്സിലാക്കുകയും ചെയ്തതോടെ ഇയാൾ ജ്യോതിഷാലയത്തിന്റെ പിൻവാതിലിലൂടെ ഓടിരക്ഷപ്പെടുകയായിരുന്നു. സോഷ്യൽ മീഡിയയിൽ റീൽസ് വീഡിയോകളിലൂടെ സജീവമായിരുന്ന ഇയാൾ ഇതോടെ ഒളിവിൽ പോയി.

പ്രതിക്കായി പൊലീസ് ലുക്കൗട്ട് നോട്ടീസ് പുറപ്പെടുവിക്കാനിരിക്കെയാണ് ഹോട്ടലിൽ നിന്ന് ഇയാളെ പിടികൂടാനായത്. പ്രതിയെ ചോദ്യം ചെയ്തതിലൂടെ കൂടുതൽ വിവരങ്ങൾ ലഭിക്കുമെന്നാണ് പൊലീസ് കരുതുന്നത്. സമാനമായ രീതിയിൽ ഇയാൾ മുൻപും മറ്റാരെയെങ്കിലും ഉപദ്രവിച്ചിട്ടുണ്ടോ എന്നും അന്വേഷണസംഘം പരിശോധിക്കുന്നുണ്ട്. പെൺകുട്ടിക്ക് ആവശ്യമായ കൗൺസിലിംഗും വൈദ്യസഹായവും ഉറപ്പാക്കിയിട്ടുണ്ട്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

Cruelty in the name of exorcism; Viral ‘Tanthri’ on social media brutally beats girl after locking her in a room for an hour