തമിഴക രാഷ്ട്രീയത്തിൽ വലിയ ചർച്ചയാവുന്ന ‘ജനനായകൻ’ എന്ന സിനിമയുടെ റിലീസ് തടഞ്ഞ സംഭവത്തിൽ ഒടുവിൽ പ്രതികരണവുമായി നടനും തമിഴക വെട്രി കഴകം (TVK) അധ്യക്ഷനുമായ വിജയ് രംഗത്തെത്തി. തിരുച്ചിറപ്പള്ളി ഈസ്റ്റിൽ തന്റെ തിരഞ്ഞെടുപ്പ് നാമനിർദ്ദേശ പത്രിക സമർപ്പിച്ച ശേഷം സംസാരിക്കുകയായിരുന്നു അദ്ദേഹം. വരാനിരിക്കുന്ന തിരഞ്ഞെടുപ്പിനെ സിനിമ സ്വാധീനിക്കുമെന്ന ഭയമാണ് റിലീസ് തടയാൻ ഭരണകൂടത്തെ പ്രേരിപ്പിച്ചതെന്ന് വിജയ് ആരോപിച്ചു. തനിക്ക് നീതി ലഭിക്കാനാണ് ജനങ്ങൾക്ക് മുന്നിലേക്ക് എത്തിയതെന്നും, തടസ്സങ്ങൾ കൊണ്ട് തന്നെ തളർത്താനാവില്ലെന്നും അദ്ദേഹം വ്യക്തമാക്കി.
തിരഞ്ഞെടുപ്പ് പ്രചാരണത്തിനിടെ സംസ്ഥാനത്തെ എൽപിജി പ്രതിസന്ധിയെക്കുറിച്ചും വിജയ് രൂക്ഷമായ ഭാഷയിൽ സംസാരിച്ചു. ഗ്യാസ് വില വർദ്ധനവ് മൂലം ഒട്ടേറെ ഹോട്ടലുകളും ചായക്കടകളും പൂട്ടേണ്ടി വന്നിട്ടും മുഖ്യമന്ത്രി എം.കെ. സ്റ്റാലിൻ ഇതിൽ തനിക്ക് ഉത്തരവാദിത്തമില്ലെന്ന നിലപാടാണ് സ്വീകരിക്കുന്നതെന്ന് വിജയ് കുറ്റപ്പെടുത്തി. സ്വന്തം ആവശ്യങ്ങൾക്കായി ഡൽഹി സന്ദർശിക്കുന്ന മുഖ്യമന്ത്രി ജനങ്ങളുടെ പ്രശ്നങ്ങളിൽ എന്ത് പരിഹാരമാണ് കാണുന്നതെന്ന് അദ്ദേഹം ചോദിച്ചു. ജനങ്ങൾക്ക് തന്നെ വിശ്വസിക്കാമെന്നും മാറ്റത്തിനായി തനിക്ക് ഒരു അവസരം നൽകണമെന്നും വിജയ് വോട്ടർമാരോട് അഭ്യർത്ഥിച്ചു.
തമിഴ്നാട് രാഷ്ട്രീയത്തിൽ നിർണ്ണായക നീക്കങ്ങളാണ് ഇപ്പോൾ നടക്കുന്നത്. ചെന്നൈ പെരമ്പൂരിന് പിന്നാലെ തിരുച്ചിറപ്പള്ളി ഈസ്റ്റിലും വിജയ് പത്രിക നൽകിയതോടെ രണ്ട് മണ്ഡലങ്ങളിൽ നിന്നുള്ള അദ്ദേഹത്തിന്റെ മത്സരം രാഷ്ട്രീയ വൃത്തങ്ങളിൽ വലിയ ചർച്ചയായിട്ടുണ്ട്. അതേസമയം, ഡിഎംകെ സ്ഥാനാർത്ഥിയായി ഉപമുഖ്യമന്ത്രി ഉദയനിധി സ്റ്റാലിൻ ചെപ്പോക്ക് മണ്ഡലത്തിൽ പത്രിക സമർപ്പിച്ചു. ബിജെപി സ്ഥാനാർത്ഥി പട്ടിക പുറത്തിറക്കാനുള്ള ശ്രമങ്ങൾ തുടരുമ്പോഴും കെ. അണ്ണാമലൈയുടെ സീറ്റ് നിർണ്ണയം പ്രതിസന്ധിയായി തുടരുകയാണ്. കോൺഗ്രസ് സ്ഥാനാർത്ഥികളെ നിശ്ചയിക്കാനുള്ള നിർണ്ണായക സിഇസി യോഗം ദില്ലിയിൽ ചേരാനിരിക്കെ, തമിഴകത്തെ തിരഞ്ഞെടുപ്പ് ചിത്രം കൂടുതൽ ചൂടുപിടിക്കുകയാണ്.
Vijay Breaks Silence on Jananayakan Film Ban Row
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
