പണം സമ്പാദിച്ച് നാട്ടിലേക്ക് മടങ്ങുക എന്ന പഴയ പ്രവാസി സങ്കല്പങ്ങൾ മാറുന്നു എന്ന് പറഞ്ഞ് കാനഡയിലെ ഇന്ത്യൻ പ്രവാസി സുജീത് ദാഹിയ പങ്കുവെച്ച വീഡിയോ ശ്രദ്ധേയമാകുന്നു. പ്രവാസികൾ വിദേശരാജ്യങ്ങളിൽ തന്നെ തുടരാൻ ആഗ്രഹിക്കുന്നത് വെറും സാമ്പത്തിക നേട്ടം മാത്രം ലക്ഷ്യം വെച്ചല്ലെന്നും മറിച്ച് അവിടുത്തെ മികച്ച ജീവിതസാഹചര്യങ്ങൾ മൂലമാണെന്നും സുജീത് തന്റെ വീഡിയോയിലൂടെ വ്യക്തമാക്കുന്നു. കോടിക്കണക്കിന് രൂപ സമ്പാദിക്കുന്നവർ പോലും നാട്ടിലേക്ക് മടങ്ങാതെ വിദേശത്ത് സ്ഥിരതാമസത്തിന് (PR) ആഗ്രഹിക്കുന്നത് പ്രധാനമായും പത്തോളം ഘടകങ്ങൾ മുൻനിർത്തിയാണെന്ന് അദ്ദേഹം ചൂണ്ടിക്കാട്ടുന്നു.
ഇന്ത്യയിലെപ്പോലെ മാർക്കിനും റാങ്കിനും പിന്നാലെ പോകാതെ വ്യക്തികളുടെ കഴിവിനും നൈപുണ്യത്തിനും ലഭിക്കുന്ന അംഗീകാരമാണ് ഇതിൽ പ്രധാനമെന്ന് വീഡിയോയിൽ പറയുന്നു. കൂടാതെ ലോകോത്തര നിലവാരമുള്ള വിദ്യാഭ്യാസം, സൗജന്യ ആരോഗ്യ പരിരക്ഷ, അഴിമതിരഹിതമായ സുതാര്യമായ ഭരണസംവിധാനങ്ങൾ എന്നിവ കുടിയേറിയവരെ അവിടെ തുടരാൻ പ്രേരിപ്പിക്കുന്നു. ശുദ്ധമായ വായുവും സുരക്ഷിതമായ സാമൂഹികാന്തരീക്ഷവും നിയമത്തിന് മുന്നിലുള്ള തുല്യതയും വിദേശരാജ്യങ്ങളിൽ കുടിയേറിയവർക്ക് ലഭിക്കുന്ന വലിയ ആനുകൂല്യങ്ങളാണ്. ചെയ്യുന്ന ജോലി ഏതായാലും അതിന് ലഭിക്കുന്ന മാന്യതയും അവിടുത്തെ പാസ്പോർട്ടിന്റെ കരുത്തും മറ്റൊരു പ്രധാന ഘടകമായി സുജീത് വിവരിക്കുന്നു.
മാതൃരാജ്യത്തെ തള്ളിപ്പറയുകയല്ലെന്നും മറിച്ച് വരുംതലമുറയുടെ ഭാവിയും സുരക്ഷിതമായ ജീവിത സാഹചര്യങ്ങളും മുൻനിർത്തിയാണ് ഭൂരിഭാഗം പ്രവാസികളും ഇത്തരമൊരു തീരുമാനത്തിലേക്ക് എത്തുന്നതെന്നും സുജീത് വ്യക്തമാക്കുന്നു. ഇന്ത്യക്കാർ യൂറോപ്പിലും വടക്കേ അമേരിക്കയിലും സ്ഥിരതാമസമാക്കാൻ ആഗ്രഹിക്കുന്നതിന്റെ യഥാർത്ഥ കാരണങ്ങൾ വെളിപ്പെടുത്തുന്ന ഈ വിഡിയോ ഇപ്പോൾ സമൂഹമാധ്യമങ്ങളിൽ വലിയ ചർച്ചകൾക്കാണ് വഴിതുറന്നിരിക്കുന്നത്.
Indians abroad are often driven by aspirations beyond just earning money and returning home.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
