അറ്റ്ലാന്റിക് പ്രവിശ്യകളിലെ കുട്ടികളിൽ അഞ്ചാംപനി പ്രതിരോധ കുത്തിവെപ്പ് നിരക്ക് കുറവെന്ന് റിപ്പോർട്ട്. അഞ്ചാംപനി വ്യാപനം തടയാൻ ശാസ്ത്രജ്ഞർ ശുപാർശ ചെയ്യുന്നത് 95 ശതമാനം പ്രതിരോധ കുത്തിവെപ്പ് നിരക്കാണ്. എന്നാൽ നാല് അറ്റ്ലാന്റിക് പ്രവിശ്യകളിൽ ഈ നിരക്ക് മൂന്നിലും താഴെയാണെന്ന് റിപ്പോർട്ട്. ഈ വർഷം കാനഡയിൽ 3,703 അഞ്ചാംപനി കേസുകൾ രേഖപ്പെടുത്തിയ സാഹചര്യത്തിൽ ഇത് ആശങ്ക വർദ്ധിപ്പിക്കുന്നു.
നോവ സ്കോഷ്യ, പ്രിൻസ് എഡ്വേർഡ് ഐലൻഡ്, ന്യൂ ബ്രൺസ്വിക്ക് എന്നിവിടങ്ങളിൽ കുട്ടികളിൽ അഞ്ചാംപനി പ്രതിരോധ കുത്തിവെപ്പ് നിരക്ക് ഗണ്യമായി കുറഞ്ഞുവെന്ന് അധികൃതർ വ്യക്തമാക്കുന്നു. നോവ സ്കോഷ്യയിൽ 2024-ൽ ഏകദേശം 23 ശതമാനം കുട്ടികൾക്കും പൂർണ്ണമായി പ്രതിരോധ കുത്തിവെപ്പ് ലഭിച്ചിട്ടില്ല. രണ്ട് വയസ്സുള്ളവരിൽ 93.4 ശതമാനം പേർക്ക് ഒരു ഡോസ് വാക്സിൻ ലഭിച്ചപ്പോൾ, രണ്ട് ഡോസും ലഭിച്ചത് 78.6 ശതമാനം പേർക്ക് മാത്രമാണ്. പ്രിൻസ് എഡ്വേർഡ് ഐലൻഡിലും ന്യൂ ബ്രൺസ്വിക്കിലും ഏകദേശം 10 ശതമാനം കുട്ടികൾക്ക് പൂർണ്ണമായി പ്രതിരോധ കുത്തിവെപ്പ് ലഭിച്ചിട്ടില്ലെന്ന് അധികൃതർ പറയുന്നു. പ്രിൻസ് എഡ്വേർഡ് ഐലൻഡിൽ ഒന്നാം ക്ലാസിലെ കുട്ടികളിൽ 91 മുതൽ 94 ശതമാനം വരെ പേർക്ക് രണ്ട് ഡോസുകൾ ലഭിച്ചു, ന്യൂ ബ്രൺസ്വിക്കിൽ 2023-24 സ്കൂൾ ഇമ്മ്യൂണൈസേഷൻ റിപ്പോർട്ട് പ്രകാരം 91.2 ശതമാനം വിദ്യാർത്ഥികൾക്ക് മീസിൽസ്, മംപ്സ്, റുബെല്ല (MMR) വാക്സിൻ ലഭിച്ചു. ന്യൂഫൗണ്ട്ലാൻഡ് ആൻഡ് ലാബ്രഡോർ വാക്സിനേഷൻ നിരക്കിനെക്കുറിച്ചുള്ള വിവരങ്ങൾ നൽകിയിട്ടില്ല.
നിലവിൽ, കാനഡയിൽ ആൽബർട്ട, ബ്രിട്ടീഷ് കൊളംബിയ, മാനിറ്റോബ, നോർത്ത് വെസ്റ്റ് ടെറിട്ടറീസ്, നോവ സ്കോഷ്യ, ഒന്റാരിയോ, പ്രിൻസ് എഡ്വേർഡ് ഐലൻഡ്, ക്യുബെക്ക്, സാസ്കച്ച്വാൻ എന്നിവിടങ്ങളിൽ അഞ്ചാംപനി കേസുകൾ റിപ്പോർട്ട് ചെയ്തിട്ടുണ്ട്. ഈ വർഷം 2,200-ലധികം കേസുകൾ രേഖപ്പെടുത്തിയ ഒന്റാരിയോയിൽ, പ്രതിരോധ കുത്തിവെപ്പ് എടുക്കാത്ത അമ്മമാരിൽ നിന്ന് ഗർഭസ്ഥ ശിശുക്കൾക്ക് രോഗം പിടിപെട്ട് ആറ് കുഞ്ഞുങ്ങൾ ജനിച്ചിരുന്നു. ജനനത്തിൽ തന്നെ രോഗം സ്ഥിരീകരിച്ച ഒരു കുഞ്ഞിന് ജീവൻ നഷ്ടമാകുകയും ചെയ്തു.
അഞ്ചാംപനി ഗുരുതരമായ ആരോഗ്യപ്രശ്നങ്ങൾക്ക് കാരണമാകും. ഏകദേശം പത്തിൽ ഒരു കുട്ടിക്ക് ചെവിയിലെ അണുബാധ, ന്യൂമോണിയ, വയറിളക്കം തുടങ്ങിയ സങ്കീർണതകൾ ഉണ്ടാകാം, ആയിരത്തിൽ ഒരു കുട്ടിക്ക് അഞ്ചാംപനി ബാധിച്ചാൽ മരണം സംഭവിക്കാം. ഇത് കുട്ടികളുടെ രോഗപ്രതിരോധ ശേഷിയെ താൽക്കാലികമായി ഇല്ലാതാക്കുകയും മറ്റ് അണുബാധകൾക്കുള്ള സാധ്യത വർധിപ്പിക്കുകയും ചെയ്യും.
