കോൾഡ്പ്ലേയുടെ ഒരു സംഗീത പരിപാടിയിൽ വെച്ച് സഹപ്രവർത്തകയെ കെട്ടിപ്പിടിക്കുന്ന ദൃശ്യം വൈറലായതിനെ തുടർന്ന് യുഎസ് ടെക് കമ്പനിയുടെ സിഇഒയ്ക്ക് രാജി വെക്കേണ്ടി വന്നു. മസാച്യുസെറ്റ്സിലെ ഫോക്സ്ബറോയിൽ നടന്ന പരിപാടിയിൽ വലിയ സ്ക്രീനിൽ വന്ന വീഡിയോ ആണ് പ്രശ്നമായത്. വീഡിയോയിൽ ഒരു പുരുഷനും സ്ത്രീയും പരസ്പരം കെട്ടിപ്പിടിക്കുന്നത് കാണാം. ക്യാമറ ശ്രദ്ധയിൽപ്പെട്ടപ്പോൾ ഇരുവരും പെട്ടെന്ന് ഒളിക്കാൻ ശ്രമിക്കുന്നുണ്ട്.
അമേരിക്കൻ മാധ്യമങ്ങൾ ഇവർ ആസ്ട്രോണോമർ കമ്പനിയുടെ സിഇഒ ആൻഡി ബൈറോണും അതേ കമ്പനിയിലെ ചീഫ് പീപ്പിൾ ഓഫീസർ ക്രിസ്റ്റിൻ കാബോട്ടും ആണെന്ന് തിരിച്ചറിഞ്ഞിരുന്നു. ആൻഡി ബൈറോൺ വിവാഹിതനാണ്. ആസ്ട്രോണോമർ കമ്പനി ഒരു പ്രസ്താവനയിലൂടെ അറിയിച്ചത്, “ആൻഡി ബൈറോൺ രാജി സമർപ്പിച്ചു, ഡയറക്ടർ ബോർഡ് അത് അംഗീകരിച്ചു” എന്നാണ്. കമ്പനിയുടെ മൂല്യങ്ങൾക്കും സംസ്കാരത്തിനും തങ്ങൾ പ്രതിജ്ഞാബദ്ധരാണെന്നും, നേതാക്കൾ ഉയർന്ന നിലവാരം പുലർത്തേണ്ടതുണ്ടെന്നും അടുത്തിടെ ആ നിലവാരം പുലർത്തിയില്ലെന്നും കമ്പനി കൂട്ടിച്ചേർത്തു.
പുതിയ സിഇഒയെ കണ്ടെത്താനായി തിരച്ചിൽ ആരംഭിക്കുമെന്നും നിലവിൽ ചീഫ് പ്രൊഡക്റ്റ് ഓഫീസർ താൽക്കാലിക സിഇഒ ആയി തുടരുമെന്നും ന്യൂയോർക്ക് ആസ്ഥാനമായുള്ള ഈ കമ്പനി വ്യക്തമാക്കി. ബുധനാഴ്ച രാത്രി നടന്ന പരിപാടിയിൽ പാട്ടിനൊപ്പം ആടുകയും പെട്ടെന്ന് ഒളിക്കാൻ ശ്രമിക്കുകയും ചെയ്യുന്ന ഈ വീഡിയോയ്ക്ക് ദശലക്ഷക്കണക്കിന് കാഴ്ചക്കാരുണ്ടായി.
ഇവർ ഒളിക്കാൻ ശ്രമിക്കുന്നത് കണ്ടപ്പോൾ കോൾഡ്പ്ലേയുടെ പ്രധാന ഗായകൻ ക്രിസ് മാർട്ടിൻ തമാശയോടെ പറഞ്ഞത്, “ഒന്നുകിൽ അവർക്ക് ഒരു രഹസ്യ ബന്ധമുണ്ട്, അല്ലെങ്കിൽ അവർക്ക് ലജ്ജ കൂടുതലാണ്” എന്നാണ്. വീഡിയോ വൈറലായതിനെ തുടർന്ന് ആസ്ട്രോണോമർ ഈ ബന്ധത്തെക്കുറിച്ച് അന്വേഷണം ആരംഭിക്കുകയും സിഇഒയെ അവധിയിൽ പ്രവേശിപ്പിക്കുകയും ചെയ്തിരുന്നു.
