ഒട്ടാവ: രാജ്യത്തെ വിദേശ നിവാസികളുടെ എണ്ണം നിയന്ത്രിക്കുന്നതിന്റെ ഭാഗമായി ബിസിനസ് ഇമിഗ്രേഷൻ നിയമങ്ങളിൽ വൻ പരിഷ്കാരങ്ങൾ പ്രഖ്യാപിച്ച് കാനഡ. ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) പുറത്തിറക്കിയ 2026-2028 കാലയളവിലേക്കുള്ള ഇമിഗ്രേഷൻ ലെവൽ പ്ലാനിന്റെ ഭാഗമായാണ് ഈ നടപടികൾ. പുതിയ മാറ്റങ്ങൾ നിലവിൽ വന്നതോടെ സ്റ്റാർട്ട്-അപ്പ് വിസ (SUV), സെൽഫ് എംപ്ലോയിഡ് പേഴ്സൺസ് പ്രോഗ്രാം എന്നിവയിൽ കർശന നിയന്ത്രണങ്ങൾ ഏർപ്പെടുത്തി.
സ്റ്റാർട്ട്-അപ്പ് വിസ (SUV) അപേക്ഷകർക്ക് ലഭ്യമായിരുന്ന ഓപ്ഷണൽ വർക്ക് പെർമിറ്റുകൾ ഇനി മുതൽ അനുവദിക്കില്ലെന്ന് ഐആർസിസി വ്യക്തമാക്കി. നിലവിൽ കാനഡയിലുള്ളവരും തങ്ങളുടെ വർക്ക് പെർമിറ്റ് കാലാവധി നീട്ടാൻ അപേക്ഷിക്കുന്നവരും ഒഴികെയുള്ള പുതിയ അപേക്ഷകർക്ക് ഈ ആനുകൂല്യം ലഭിക്കില്ല. കാനഡയിലെ താൽക്കാലിക താമസക്കാരുടെ എണ്ണം കുറയ്ക്കുകയും അവർക്ക് സ്ഥിരതാമസത്തിനുള്ള (PR) അവസരം മുൻഗണനാടിസ്ഥാനത്തിൽ നൽകുകയുമാണ് ഈ മാറ്റത്തിലൂടെ ലക്ഷ്യമിടുന്നത്.
സ്റ്റാർട്ട്-അപ്പ് വിസയ്ക്കായുള്ള പുതിയ അപേക്ഷകൾ സ്വീകരിക്കുന്നത് 2025 ഡിസംബർ 31 അർദ്ധരാത്രിയോടെ നിർത്തലാക്കും. എന്നാൽ, അംഗീകൃത സ്ഥാപനങ്ങളിൽ നിന്ന് 2025-ൽ തന്നെ ബിസിനസ് കരാറുകൾ (Commitment) ലഭിച്ചിട്ടുള്ളവർക്ക് നിശ്ചിത സമയപരിധിക്കുള്ളിൽ അപേക്ഷിക്കാൻ സാധിക്കും. ഇതിനു പുറമെ, സെൽഫ്-എംപ്ലോയിഡ് പേഴ്സൺസ് പ്രോഗ്രാമിലേക്കുള്ള അപേക്ഷകൾ സ്വീകരിക്കുന്നത് താൽക്കാലികമായി നിർത്തിവെച്ച നടപടി അടുത്ത അറിയിപ്പ് ഉണ്ടാകുന്നത് വരെ തുടരാനും തീരുമാനമായിട്ടുണ്ട്.
രാജ്യത്തെ ഇമിഗ്രേഷൻ സംവിധാനം കൂടുതൽ കാര്യക്ഷമമാക്കുന്നതിനും നിലവിൽ ലഭിച്ചിട്ടുള്ള അപേക്ഷകളുടെ ബാഹുല്യം കുറയ്ക്കുന്നതിനുമാണ് ഈ കർശന നടപടികൾ സ്വീകരിക്കുന്നത്. നിലവിൽ കാനഡയിൽ സ്റ്റാർട്ട്-അപ്പ് വിസയിൽ വർക്ക് പെർമിറ്റുള്ളവർക്ക് പി.ആർ അപേക്ഷകളിൽ മുൻഗണന നൽകുമെന്നും അധികൃതർ അറിയിച്ചു. കാനഡയുടെ സാമ്പത്തിക വളർച്ചയ്ക്ക് ഉതകുന്ന മികച്ച പ്രതിഭകളെ ആകർഷിക്കാനുള്ള തന്ത്രപരമായ നീക്കമായാണ് സർക്കാർ ഇതിനെ കാണുന്നത്.
ബിസിനസ് രംഗത്തെ വിദേശ നിക്ഷേപകർക്കും സംരംഭകർക്കുമായി പുതിയ പൈലറ്റ് പ്രോജക്ട് ആരംഭിക്കാനും കാനഡയ്ക്ക് പദ്ധതിയുണ്ട്. ഇതിനെക്കുറിച്ചുള്ള കൂടുതൽ വിവരങ്ങൾ 2026-ൽ പുറത്തുവിടും. നിലവിലെ പരിഷ്കാരങ്ങൾ വിദേശ സംരംഭകർക്കിടയിൽ വലിയ ചർച്ചകൾക്ക് വഴിവെച്ചിട്ടുണ്ട്. കൂടുതൽ വിവരങ്ങൾ ഐആർസിസിയുടെ ഔദ്യോഗിക വെബ്സൈറ്റിൽ ലഭ്യമാണ്.
ഒരു അംഗീകൃത ഇമിഗ്രേഷൻ കൺസൽട്ടന്റിന്റെ സേവനങ്ങൾക്ക് ബന്ധപ്പെടാം: +1 (289) 690-8119 ( eHouse Immigrations Services Ltd) (https://ehouseimmigration.ca/)
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Update on Immigration Measures for Entrepreneurs
