പണി തീരാത്ത സ്കൂളും തുറക്കാത്ത ക്ലാസും: കാനഡയിൽ ‘സൂപ്പർ സ്കൂളി’ന്റെ ഉദ്ഘാടനം വൈകുന്നു

ഒന്റാറിയോ: ഒന്റാറിയോ പ്രവിശ്യയിലെ പാരി സൗണ്ടിൽ പുതിയതായി നിർമ്മിച്ച ‘സൂപ്പർ സ്കൂളി’ന്റെ ഉദ്ഘാടനം വൈകുന്നതിനെതിരെ വ്യാപക പ്രതിഷേധം. ജൂനിയർ കിന്റർഗാർട്ടൻ മുതൽ പന്ത്രണ്ടാം ക്ലാസ് വരെയുള്ള കുട്ടികൾക്കായി നിർമ്മിച്ച സ്കൂൾ സെപ്റ്റംബർ രണ്ടിന് തുറക്കുമെന്നാണ് പ്രതീക്ഷിച്ചിരുന്നത്. എന്നാൽ നിർമ്മാണത്തിലെ കാലതാമസം കാരണം പുതിയ അധ്യയന വർഷം ഓൺലൈനായി ആരംഭിക്കാൻ സ്കൂൾ ബോർഡ് തീരുമാനിച്ചതോടെ നൂറുകണക്കിന് വിദ്യാർത്ഥികളും രക്ഷിതാക്കളും ആശങ്കയിലും പ്രതിഷേധത്തിലുമാണ്.

പഴയ ഹൈസ്കൂൾ ഭാഗികമായി പൊളിച്ചുമാറ്റിയതിനാലാണ് പുതിയ സ്കൂൾ തുറക്കുന്നത് വരെ ഓൺലൈൻ ക്ലാസുകൾ തുടരാൻ തീരുമാനിച്ചത്. മുതിർന്ന ക്ലാസുകളിലെ വിദ്യാർത്ഥികൾക്ക് വിദൂര പഠനം മാത്രമാണ് നിലവിൽ ആശ്രയം. എന്നാൽ, ചെറിയ കുട്ടികൾക്ക് താൽക്കാലികമായി പഴയ സ്കൂളുകളായ മക്ഡൗഗൽ, നോബൽ എന്നിവിടങ്ങളിൽ ക്ലാസുകൾ നടത്താൻ തീരുമാനിച്ചു. നെർത്ത് ഡിസ്ട്രിക്ട് സ്കൂൾ ബോർഡിന്റെ ഈ തീരുമാനം തങ്ങൾക്ക് വലിയ മാനസിക ബുദ്ധിമുട്ടുണ്ടാക്കുന്നതായി രക്ഷിതാക്കൾ പറയുന്നു.

ഈ സാഹചര്യത്തിൽ, സ്കൂൾ ബോർഡിന്റെ ഭരണപരമായ കാര്യങ്ങൾ പൂർണമായി പരിശോധിക്കാൻ വിദ്യാഭ്യാസ മന്ത്രി പോൾ കലാൻഡ്ര ഉത്തരവിട്ടു. 30 ദിവസത്തിനുള്ളിൽ റിപ്പോർട്ട് സമർപ്പിക്കണമെന്നും അദ്ദേഹം ആവശ്യപ്പെട്ടു. “ഈ കാലതാമസം അസ്വീകാര്യമാണ്. നിലവിലെ സ്കൂൾ ബോർഡ് ഭരണഘടനയുടെ ദൗർബല്യമാണ് ഇത് കാണിക്കുന്നത്. ഞാൻ ഇത് പരിഹരിക്കാൻ പ്രതിജ്ഞാബദ്ധനാണ്,” കലാൻഡ്ര രക്ഷിതാക്കൾക്ക് അയച്ച കത്തിൽ വ്യക്തമാക്കി.

പുതിയ സ്കൂൾ വൈകുമെന്ന് വ്യക്തമായിട്ടും പഴയ ഹൈസ്കൂൾ പൊളിച്ചുമാറ്റിയത് എന്തിനാണെന്ന് രക്ഷിതാക്കൾ ചോദ്യമുയർത്തുന്നു. ഓൺലൈൻ പഠനത്തിന് ആവശ്യമായ ഉപകരണങ്ങളോ ഇന്റർനെറ്റ് സൗകര്യങ്ങളോ ഇല്ലാത്ത നിരവധി കുട്ടികൾ ഗ്രാമീണ മേഖലയിലുണ്ട്. ഇവർക്കായി പ്രാദേശിക ഭരണകൂടം വൈഫൈ സൗകര്യമുള്ള സ്ഥലങ്ങൾ തുറന്നുകൊടുത്തിട്ടുണ്ട്. സ്കൂൾ ബോർഡിന്റെ ഈ കെടുകാര്യസ്ഥതക്കെതിരെ കഴിഞ്ഞ ആഴ്ചകളിൽ വിദ്യാർത്ഥികളും രക്ഷിതാക്കളും ചേർന്ന് രണ്ട് പ്രതിഷേധ റാലികൾ സംഘടിപ്പിച്ചു.

നൂറ്റാണ്ടുകളുടെ പഴക്കമുള്ള രണ്ട് പ്രൈമറി സ്കൂളുകളും ഒരു ഹൈസ്കൂളും ഒരുമിപ്പിച്ച് ഒരു ‘മെഗാ സ്കൂൾ’ നിർമ്മിക്കാനുള്ള ആശയം രക്ഷിതാക്കളുടെ ശക്തമായ എതിർപ്പുകൾക്കിടയിലും സ്കൂൾ ബോർഡ് മുന്നോട്ട് കൊണ്ടുപോവുകയായിരുന്നു. പുതിയ കെട്ടിടത്തിൽ ഫ്രഞ്ച്, സംഗീതം തുടങ്ങിയ വിഷയങ്ങൾക്കായി പ്രത്യേക ക്ലാസ് മുറികളില്ലാത്തതും ആശങ്കയുണ്ടാക്കുന്നു. അക്കാദമിക് മികവുകൾക്ക് പുറമെ കായികരംഗത്ത് പ്രോത്സാഹനം ലഭിക്കുമെന്ന പ്രതീക്ഷയിലാണ് പല വിദ്യാർത്ഥികളും. എന്നാൽ, സ്കൂൾ തുറക്കാത്തത് അവരുടെ ഭാവിയെ ബാധിക്കുമോയെന്ന ആശങ്കയും രക്ഷിതാക്കൾ പങ്കുവെക്കുന്നു.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82