ടൊറന്റോ : കാനഡയിലെ ഏറ്റവും പുതിയ തിരഞ്ഞെടുപ്പിൽ മാർക്ക് കാർണിയുടെ നേതൃത്വത്തിലുള്ള ലിബറൽ പാർട്ടി ടൊറന്റോയിൽ തരംഗം സൃഷ്ടിച്ചു. നഗരത്തിലെ എല്ലാ മണ്ഡലങ്ങളിലും ഒരെണ്ണം ഒഴികെ വിജയം നേടി. യോർക്ക് സെന്റർ മാത്രമാണ് കൺസർവേറ്റിവുകൾക്ക് കീഴടങ്ങിയത്. യൂണിവേഴ്സിറ്റി–റോസ്ഡേലിൽ ക്രിസ്റ്റിയ ഫ്രീലാൻഡ് വീണ്ടും തിരഞ്ഞെടുക്കപ്പെട്ടു.
എന്നിരുന്നാലും, ഗ്രേറ്റർ ടൊറന്റോ ഏരിയയിൽ (ജിടിഎ) കൺസർവേറ്റിവ് പാർട്ടി ശ്രദ്ധേയമായ മുന്നേറ്റം കാഴ്ചവച്ചു.അരോറ–ഓക്ക് റിഡ്ജസ്–റിച്ച്മണ്ട് ഹിൽ, ന്യൂമാർക്കറ്റ്–അരോറ, വോൺ–വുഡ്ബ്രിഡ്ജ് എന്നീ പ്രധാന മണ്ഡലങ്ങൾ അവർ പിടിച്ചെടുത്തു. ബ്രാംപ്ടണിലെ മൂന്ന് മണ്ഡലങ്ങളിൽ വോട്ടെണ്ണൽ തുടരുന്നതിനാൽ ഫലം ഇനിയും വ്യക്തമായിട്ടില്ല.
“ബ്രാംപ്ടണിലെ ജനങ്ങൾ മാറ്റത്തിനായി വോട്ടു ചെയ്തിരിക്കുന്നു. ഇവിടെ കൺസർവേറ്റിവുകൾക്ക് കൂടുതൽ സീറ്റുകൾ നേടാനാകുമെന്ന് ഞങ്ങൾ പ്രതീക്ഷിക്കുന്നു,” എന്ന് വോൺ–വുഡ്ബ്രിഡ്ജിൽ 60% വോട്ടോടെ വിജയിച്ച മൈക്കിൾ ഗുഗ്ലിയൽമിൻ പറഞ്ഞു. ഒന്റാറിയോയിൽ നിരാശാജനകമായ പ്രകടനത്തെ തുടർന്ന് എൻഡിപി നേതാവ് ജഗ്മീത് സിംഗ് നേതൃസ്ഥാനത്തുനിന്ന് വിടവാങ്ങി.
