വിന്നിപെഗ്: വിന്നിപെഗിൽ പ്ലാസ്മ ശേഖരണ കേന്ദ്രങ്ങളിൽ പ്ലാസ്മ ദാനം ചെയ്തതിന് പിന്നാലെ രണ്ട് പേർ മരണപ്പെട്ടതായി റിപ്പോർട്ട് ചെയ്ത് ഹെൽത്ത് കാനഡ. നഗരത്തിലെ രണ്ട് വ്യത്യസ്ത ഗ്രിഫോൾസ് (Grifols) കേന്ദ്രങ്ങളിലായി പ്ലാസ്മ ദാനം ചെയ്തവർക്കാണ് ജീവൻ നഷ്ടമായത്. ടെയ്ലർ അവന്യൂവിലും ഇന്നൊവേഷൻ ഡ്രൈവിലുമുള്ള കേന്ദ്രങ്ങളിൽ വെച്ച് പ്ലാസ്മ നൽകിയതിന് ശേഷമാണ് ഈ സംഭവങ്ങൾ ഉണ്ടായതെന്ന് ഔദ്യോഗിക വൃത്തങ്ങൾ സ്ഥിരീകരിച്ചു.
2025 ഒക്ടോബർ 25-നും 2026 ജനുവരി 30-നുമാണ് ഈ മരണങ്ങൾ സംഭവിച്ചത്. നിലവിലെ നിയമങ്ങൾ അനുസരിച്ച്, പ്ലാസ്മ ദാനം ചെയ്ത് 72 മണിക്കൂറിനുള്ളിൽ ദാതാവിന് എന്തെങ്കിലും ആരോഗ്യപ്രശ്നങ്ങളോ മരണമോ സംഭവിച്ചാൽ അത് രക്തശേഖരണ സ്ഥാപനങ്ങൾ നിർബന്ധമായും റിപ്പോർട്ട് ചെയ്യേണ്ടതുണ്ട്. ഇതിന്റെ അടിസ്ഥാനത്തിലാണ് ഹെൽത്ത് കാനഡ പരിശോധന കർശനമാക്കിയത്. വിന്നിപെഗിലെ കേന്ദ്രങ്ങളിൽ ഉദ്യോഗസ്ഥർ നേരിട്ടെത്തി രേഖകളും പ്രവർത്തന രീതികളും പരിശോധിച്ച് വരികയാണ്.
മരണങ്ങൾ പ്ലാസ്മ ദാന പ്രക്രിയയുമായി നേരിട്ട് ബന്ധമുള്ളതാണെന്ന് ഇതുവരെ കണ്ടെത്താനായിട്ടില്ലെന്ന് ഹെൽത്ത് കാനഡ വ്യക്തമാക്കി. സംഭവത്തിൽ ഗ്രിഫോൾസ് കമ്പനി ഖേദം പ്രകടിപ്പിക്കുകയും അന്വേഷണവുമായി പൂർണ്ണമായി സഹകരിക്കുകയും ചെയ്യുന്നുണ്ട്. പ്ലാസ്മ ദാനം സാധാരണഗതിയിൽ സുരക്ഷിതമായ പ്രക്രിയയാണെന്നും ദാതാക്കളുടെ ആരോഗ്യ ചരിത്രം കൃത്യമായി പരിശോധിച്ച ശേഷമാണ് നടപടികൾ സ്വീകരിക്കുന്നതെന്നും കമ്പനി അറിയിച്ചു. നിലവിൽ ഹെൽത്ത് കാനഡയുടെ വിശദമായ പരിശോധനാ ഫലത്തിനായി കാത്തിരിക്കുകയാണ് അധികൃതർ.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Two deaths after plasma donation in Winnipeg; Health Canada intensifies investigation at centres
