വാഷിംഗ്ടൺ: അമേരിക്കയിലെ ഭവനപ്രതിസന്ധി പരിഹരിക്കാൻ ലക്ഷ്യമിട്ട് പുതിയ പദ്ധതിയുമായി പ്രസിഡന്റ് ഡൊണാൾഡ് ട്രംപ്. വീട് വാങ്ങുന്നവർക്ക് തങ്ങളുടെ വിരമിക്കൽ കാലത്തേക്കുള്ള സമ്പാദ്യമായ ‘401(കെ)’ (401(k)) അക്കൗണ്ടുകളിൽ നിന്ന് പണം പിൻവലിക്കാൻ അനുമതി നൽകുന്നതാണ് ഈ പുതിയ നിർദ്ദേശം. സ്വിറ്റ്സർലൻഡിലെ ദാവോസിൽ അടുത്തയാഴ്ച നടക്കുന്ന ലോക സാമ്പത്തിക ഫോറത്തിൽ ട്രംപ് ഈ പദ്ധതിയുടെ അന്തിമരൂപം ഔദ്യോഗികമായി പ്രഖ്യാപിക്കുമെന്ന് വൈറ്റ് ഹൗസ് സാമ്പത്തിക ഉപദേഷ്ടാവ് കെവിൻ ഹാസെറ്റ് അറിയിച്ചു.
നിലവിൽ പെൻഷൻ അക്കൗണ്ടുകളിൽ നിന്ന് പണം നേരത്തെ പിൻവലിക്കുന്നത് വലിയ നികുതി ബാധ്യതകൾക്കും പിഴകൾക്കും കാരണമാകാറുണ്ട്. എന്നാൽ പുതിയ പദ്ധതി പ്രകാരം, വീട് വാങ്ങുന്നതിനായി ഈ തുക ഉപയോഗിക്കുന്നവർക്ക് നികുതി ഇളവുകൾ നൽകിയേക്കും. വീടിന്റെ ഉടമസ്ഥാവകാശത്തിന്റെ (Equity) ഒരു നിശ്ചിത ശതമാനം പെൻഷൻ അക്കൗണ്ടിലെ ആസ്തിയായി കണക്കാക്കുന്ന രീതിയാണ് സർക്കാർ പരിഗണിക്കുന്നത്. ഇതുവഴി സാധാരണക്കാർക്ക് വീട് വാങ്ങാനുള്ള മുൻകൂർ തുക (Down payment) കണ്ടെത്തുന്നത് എളുപ്പമാകുമെന്നാണ് ഭരണകൂടത്തിന്റെ വിലയിരുത്തൽ.
രാജ്യത്ത് വീടുകളുടെ വില വർധിക്കുന്നതിലും സാമ്പത്തിക നയങ്ങളിലും പൊതുജനങ്ങളിൽ നിന്നുള്ള അതൃപ്തി വർധിക്കുന്ന സാഹചര്യത്തിലാണ് ഈ നീക്കം. ഇതിന് മുന്നോടിയായി, വലിയ കോർപ്പറേറ്റ് നിക്ഷേപകർ വീടുകൾ വാങ്ങുന്നത് നിരോധിക്കുമെന്നും ട്രംപ് പ്രഖ്യാപിച്ചിരുന്നു. കൂടാതെ പലിശ നിരക്ക് കുറയ്ക്കുന്നതിനായി മോർട്ട്ഗേജ് ബോണ്ടുകൾ വാങ്ങാൻ സർക്കാർ ഏജൻസികളോട് നിർദ്ദേശിക്കുകയും ചെയ്തു. ഇതിനെത്തുടർന്ന് മുപ്പത് വർഷത്തെ ഭവന വായ്പാ പലിശ നിരക്ക് മൂന്ന് വർഷത്തിന് ശേഷം ആദ്യമായി ആറ് ശതമാനത്തിന് താഴെയെത്തി.
അതേസമയം, പുതിയ പദ്ധതിയെക്കുറിച്ച് സാമ്പത്തിക വിദഗ്ധർക്കിടയിൽ ഭിന്നാഭിപ്രായമുണ്ട്. പെൻഷൻ സമ്പാദ്യം വീട് വാങ്ങാൻ ഉപയോഗിക്കുന്നത് വിരമിക്കൽ കാലത്തെ സാമ്പത്തിക ഭദ്രതയെ ബാധിക്കുമെന്ന് ഒരു വിഭാഗം ആശങ്കപ്പെടുന്നു. കൂടാതെ, അമേരിക്കയിലെ പകുതിയോളം പേർക്ക് മാത്രമേ പെൻഷൻ അക്കൗണ്ടുകൾ ഉള്ളൂവെന്നും കുറഞ്ഞ വരുമാനക്കാരായ തൊഴിലാളികൾക്ക് ഈ പദ്ധതിയുടെ പ്രയോജനം ലഭിക്കില്ലെന്നും വിമർശനമുണ്ട്. വിപണിയിൽ ആവശ്യത്തിന് വീടുകൾ ലഭ്യമല്ലാത്ത സാഹചര്യത്തിൽ, ആളുകളുടെ വാങ്ങൽ ശേഷി കൂട്ടുന്നത് വീടുകളുടെ വില വീണ്ടും ഉയരാൻ കാരണമാകുമെന്നും വിദഗ്ധർ മുന്നറിയിപ്പ് നൽകുന്നു.
Trump to unveil home buying plan involving retirement funds
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
