ഫെഡറൽ റിസർവ് തലപ്പത്തേക്ക് കെവിൻ വാർഷ്; ജെറോം പവലിനെ മാറ്റി ട്രംപ്, യുഎസ് സാമ്പത്തിക നയങ്ങളിൽ നിർണ്ണായക മാറ്റം

വാഷിംഗ്ടൺ: യുഎസ് സെൻട്രൽ ബാങ്കായ ഫെഡറൽ റിസർവിനെ (Fed) നയിക്കാൻ വിശ്വസ്തനായ കെവിൻ വാർഷിനെ നിയമിച്ച് പ്രസിഡന്റ് ഡൊണാൾഡ് ട്രംപ്. നിലവിലെ ചെയർമാൻ ജെറോം പവലിന്റെ കാലാവധി മെയ് മാസത്തിൽ അവസാനിക്കാനിരിക്കെയാണ് മുൻ ഫെഡ് ഗവർണർ കൂടിയായ വാർഷിനെ ട്രംപ് ഔദ്യോഗികമായി നാമനിർദ്ദേശം ചെയ്തത്. ട്രംപിന്റെ ആദ്യ ഭരണകാലത്തും പരിഗണനയിലുണ്ടായിരുന്ന വാർഷ്, നിലവിൽ ഫെഡറൽ റിസർവിന്റെ നയങ്ങളെ പരസ്യമായി വിമർശിക്കുന്ന വ്യക്തികളിലൊരാളാണ്. ജെറോം പവലും ട്രംപും തമ്മിലുള്ള ബന്ധം വഷളായ പശ്ചാത്തലത്തിലാണ് ഈ പുതിയ മാറ്റം.

ട്രൂത്ത് സോഷ്യലിലൂടെയാണ് ട്രംപ് തന്റെ പ്രഖ്യാപനം നടത്തിയത്. “ഫെഡറൽ റിസർവിന്റെ ചരിത്രത്തിലെ ഏറ്റവും മികച്ച ചെയർമാൻമാരിൽ ഒരാളായിരിക്കും വാർഷ്” എന്ന് ട്രംപ് വിശേഷിപ്പിച്ചു. പലിശ നിരക്ക് കുറയ്ക്കാൻ മടിക്കുന്നു എന്നാരോപിച്ച് ജെറോം പവലിനെതിരെ ട്രംപ് മാസങ്ങളായി വിമർശനം ഉന്നയിച്ചുവരികയായിരുന്നു. ഇതിനിടെ ഫെഡ് കെട്ടിടങ്ങളുടെ നവീകരണവുമായി ബന്ധപ്പെട്ട് സെനറ്റിൽ നൽകിയ മൊഴിയിൽ പവലിനെതിരെ ക്രിമിനൽ അന്വേഷണം ആരംഭിച്ചതും വലിയ വിവാദമായിട്ടുണ്ട്. പുതിയ നിയമനത്തിലൂടെ പലിശ നിരക്കുകളിൽ കാര്യമായ കുറവുണ്ടാകുമെന്നാണ് വിപണിയുടെ പ്രതീക്ഷ.

55-കാരനായ വാർഷ് മുൻപ് പലിശ നിരക്ക് വർദ്ധിപ്പിക്കണം എന്ന പക്ഷക്കാരൻ (Hawkish) ആയിരുന്നെങ്കിലും, നിലവിൽ സാമ്പത്തിക വളർച്ചയ്ക്ക് ആക്കം കൂട്ടുന്നതിനായി കുറഞ്ഞ പലിശ നിരക്കിനെയാണ് പിന്തുണയ്ക്കുന്നത്. ഹൂവർ ഇൻസ്റ്റിറ്റ്യൂട്ടിലെ ഫെലോയും യുപിഎസ് ബോർഡ് അംഗവുമായ വാർഷ്, ട്രംപിന്റെ ഉറ്റ സുഹൃത്തും ദാതാവുമായ റൊണാൾഡ് ലോഡറുടെ മകളുടെ ഭർത്താവുമാണ്. കെവിൻ വാർഷിന്റെ വരവ് യുഎസ് വിപണിയിൽ ഇതിനോടകം ചലനങ്ങൾ സൃഷ്ടിച്ചു കഴിഞ്ഞു.

വാർത്ത പുറത്തുവന്നതിന് പിന്നാലെ ഡോളർ കരുത്താർജിച്ചപ്പോൾ സ്വർണ്ണവിലയിൽ 6 ശതമാനം ഇടിവ് രേഖപ്പെടുത്തി. സെനറ്റിന്റെ അംഗീകാരം ലഭിച്ചാൽ മാത്രമേ വാർഷിന് ഔദ്യോഗികമായി ചുമതലയേൽക്കാൻ സാധിക്കൂ. എന്നാൽ ഫെഡറൽ റിസർവിന്റെ സ്വതന്ത്ര സ്വഭാവം വാർഷ് നിലനിർത്തുമോ അതോ ട്രംപിന്റെ താത്പര്യങ്ങൾക്കനുസരിച്ച് നീങ്ങുമോ എന്ന ആശങ്ക വിപണി വിദഗ്ധർക്കിടയിലുണ്ട്. പണപ്പെരുപ്പവും തൊഴിലില്ലായ്മ നിരക്കും വെല്ലുവിളിയായി തുടരുന്ന സാഹചര്യത്തിൽ, കെവിൻ വാർഷ് സ്വീകരിക്കുന്ന സാമ്പത്തിക നിലപാടുകൾ ആഗോള വിപണിയെയും നേരിട്ട് ബാധിക്കും.

Trump replaces Jerome Powell, a decisive change in US economic policies

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82