വാഷിങ്ടൺ: കാനഡയിലെ ഫെഡറൽ തിരഞ്ഞെടുപ്പിൽ വിജയം നേടിയ പ്രധാനമന്ത്രി മാർക്ക് കാർണിയെ ഫോണിൽ വിളിച്ച് അഭിനന്ദിച്ച് അമേരിക്കൻ പ്രസിഡന്റ് ഡൊണാൾഡ് ട്രംപ്. ഇരു രാഷ്ട്രീയ തലവന്മാരും തമ്മിൽ ഭാവിയിൽ ഔദ്യോഗിക കൂടിക്കാഴ്ച നടത്താൻ തീരുമാനിച്ചതായി അന്തർദേശീയ മാധ്യമങ്ങൾ റിപ്പോർട്ട് ചെയ്യുന്നു. പരമാധികാര രാഷ്ട്രങ്ങൾ എന്ന നിലയിൽ രണ്ട് രാജ്യങ്ങളും തമ്മിലുള്ള സഹകരണത്തിന്റെ പ്രാധാന്യത്തെക്കുറിച്ച് ഇരു നേതാക്കളും സംസാരിച്ചു. മുൻകാല അഭിപ്രായ വ്യത്യാസങ്ങൾക്കിടയിലും നയതന്ത്ര ബന്ധങ്ങളിൽ പുതിയ അധ്യായം തുറക്കുന്നതിനുള്ള സാധ്യതയാണ് ഈ സംഭാഷണം സൂചിപ്പിക്കുന്നത്.
ഇരു രാജ്യങ്ങളും തമ്മിൽ നിലനിൽക്കുന്ന വ്യാപാര തർക്കങ്ങളുടെ പശ്ചാത്തലത്തിലാണ് ഈ നിർണായക സംഭാഷണം നടന്നിരിക്കുന്നത്. തിരഞ്ഞെടുപ്പിനു മുമ്പ് കാർണി ട്രംപിനെതിരെ ശക്തമായ നിലപാടുകൾ സ്വീകരിച്ചിരുന്നു. “അമേരിക്കയുമായുള്ള വ്യാപാര യുദ്ധത്തിൽ നമ്മൾ വിജയിക്കും” എന്ന പ്രസ്താവന ഉൾപ്പെടെ ട്രംപിന്റെ നയങ്ങളെ വിമർശിച്ചിരുന്നു. കാനഡയെ അമേരിക്കയുടെ 51-ാമത്തെ സംസ്ഥാനമായി ചിത്രീകരിച്ച ട്രംപിന്റെ സോഷ്യൽ മീഡിയ പോസ്റ്റിനെയും കാർണി രൂക്ഷമായി എതിർത്തിരുന്നു. ഈ സാഹചര്യത്തിൽ, ഇരു നേതാക്കളും തമ്മിലുള്ള ഫോൺ സംഭാഷണം രാഷ്ട്രീയ നിരീക്ഷകരുടെ ശ്രദ്ധ പിടിച്ചുപറ്റിയിരിക്കുന്നു.
കാനഡയിൽ ഇന്നലെ നടന്ന ഫെഡറൽ തിരഞ്ഞെടുപ്പിൽ ലിബറൽ പാർട്ടി നേതാവ് മാർക്ക് കാർണി വിജയം നേടി തന്റെ സ്ഥാനം നിലനിർത്തിയതായിരുന്നു. പ്രതിപക്ഷമായ കൺസർവേറ്റീവ് പാർട്ടി നേതാവ് പിയറി പൊയിലീവ്രെ 2,000-ത്തിലധികം വോട്ടുകൾക്ക് പിന്നിലായി പരാജയപ്പെട്ടു. അമേരിക്കയുമായുള്ള ബന്ധം, പ്രത്യേകിച്ച് ട്രംപിന്റെ വ്യാപാര നയങ്ങൾ തിരഞ്ഞെടുപ്പിൽ പ്രധാന വിഷയമായിരുന്നു. കാനഡയെ സംബന്ധിച്ചിടത്തോളം, അമേരിക്കൻ നിർമ്മിത ഉൽപ്പന്നങ്ങൾക്ക് പ്രതികാര താരിഫ് ഏർപ്പെടുത്തുമെന്ന് കാർണി പ്രഖ്യാപിച്ചിരുന്നു.
ഇരു രാജ്യങ്ങളുടെയും ഭാവി ബന്ധത്തെക്കുറിച്ച് ഊഹാപോഹങ്ങൾ ശക്തമാകുന്ന സാഹചര്യത്തിലാണ് ഈ ഫോൺ സംഭാഷണം. വ്യാപാരം, സുരക്ഷ, പരിസ്ഥിതി എന്നീ വിഷയങ്ങളിൽ ഇരു രാജ്യങ്ങളും തമ്മിലുള്ള ബന്ധം എങ്ങനെ വികസിക്കുമെന്ന് കാത്തിരുന്നു കാണേണ്ടിയിരിക്കുന്നു. നിർണായക കൂടിക്കാഴ്ച എപ്പോൾ നടക്കുമെന്ന് ഇതുവരെ വ്യക്തമാക്കിയിട്ടില്ലെങ്കിലും, ആഗോള രാഷ്ട്രീയത്തിൽ നിർണായക മാറ്റങ്ങൾ ഉണ്ടാകാൻ സാധ്യതയുള്ള ഒന്നായിരിക്കും അതെന്ന് രാഷ്ട്രീയ നിരീക്ഷകർ വിലയിരുത്തുന്നു.
