ഒട്ടാവ: ഓ.സി. ട്രാൻസ്പോ ബസ് സർവീസുകളിൽ ടിക്കറ്റ് കൈമാറാനുള്ള (Transfer) സമയപരിധി വർദ്ധിപ്പിക്കുന്നത് നഗരത്തിന് വലിയ സാമ്പത്തിക ബാധ്യത വരുത്തുമെന്ന് നഗരസഭാ അധികൃതർ. യാത്രാ കാലതാമസം കാരണം പല യാത്രക്കാർക്കും ഒരു ട്രിപ്പിന് തന്നെ രണ്ടുതവണ പണം നൽകേണ്ടി വരുന്ന ദുരിതം നിലനിൽക്കെയാണ് ഈ മുന്നറിയിപ്പ്.
നിലവിൽ, ഓ.സി. ട്രാൻസ്പോ ടിക്കറ്റ് കൈമാറ്റത്തിന് 90 മുതൽ 105 മിനിറ്റ് വരെയാണ് സമയം അനുവദിച്ചിരിക്കുന്നത്. കഴിഞ്ഞ ഏപ്രിലിൽ നടപ്പാക്കിയ പുതിയ ബസ് റൂട്ട് പരിഷ്കാരങ്ങൾക്ക് ശേഷം പല റൂട്ടുകളിലും യാത്രാ സമയം വർദ്ധിച്ചു. ഇതോടെ സമയപരിധി തികയാതെ വരുന്ന യാത്രക്കാർ വീണ്ടും പണം നൽകാൻ നിർബന്ധിതരാവുകയാണ്. ഇത് പരിഹരിക്കാൻ സമയപരിധി കൂട്ടണമെന്ന ആവശ്യം ഉയർന്നപ്പോഴാണ് ചെലവ് ഒരു പ്രതിസന്ധിയായി വന്നത്. കൈമാറ്റ സമയം സ്ഥിരമായി 105 മിനിറ്റ് ആക്കിയാൽ $330,000 ഡോളറും, 120 മിനിറ്റ് ആക്കിയാൽ ഏകദേശം $900,000 ഡോളറും വരുമാനത്തിൽ കുറവുണ്ടാകുമെന്നാണ് ജീവനക്കാരുടെ കണക്കുകൂട്ടൽ.
ബാർഹാവൻ വെസ്റ്റ് കൗൺസിലർ ഡേവിഡ് ഹില്ലാണ് ഈ വിഷയത്തിൽ മുൻകൈയെടുത്തത്. “വളരെ ദൂരം യാത്ര ചെയ്യേണ്ടിവരുന്നവർക്ക് കിട്ടുന്ന സമ്മാനം രണ്ടുതവണ പണം നൽകുക എന്നതാണ്. ബാധിക്കപ്പെട്ട ഏതൊരാൾക്കും ഇത് ധാർമ്മികമായി തെറ്റാണ്, നമ്മൾ ഇത് പരിഹരിക്കണം,” ഹിൽ പറഞ്ഞു. എന്നാൽ, ഈ വലിയ തുക ചെലവഴിക്കാതെ പ്രശ്നം പരിഹരിക്കാൻ സാധിക്കുമെന്നും അദ്ദേഹം ചൂണ്ടിക്കാട്ടുന്നു.
എല്ലാ സമയത്തും സമയപരിധി കൂട്ടുന്നതിന് പകരം, തിരക്കേറിയ സമയങ്ങളിൽ (Peak Hours) മാത്രം 15 മിനിറ്റ് അധികമായി അനുവദിക്കാമെന്ന് കൗൺസിലർ ഹിൽ ബദൽ നിർദ്ദേശം മുന്നോട്ട് വെച്ചു. അടുത്ത വർഷം LRT ലൈൻ അൽഗോൺക്വിൻ കോളേജ് വരെ എത്തുന്നത് വരെ ഈ താൽക്കാലിക പരിഹാരം നടപ്പാക്കാം എന്നും അദ്ദേഹം അഭിപ്രായപ്പെട്ടു. ടൊറോന്റോ, ക്യുബെക്ക് എന്നിവിടങ്ങളിലെ ട്രാൻസിറ്റ് സർവീസുകൾ 120 മിനിറ്റ് കൈമാറ്റ സമയം നൽകുന്നുണ്ട് എന്നതും അദ്ദേഹം ശ്രദ്ധയിൽപ്പെടുത്തി.
ടിക്കറ്റിനായി രണ്ടുതവണ പണം നൽകിയവർക്ക് അപേക്ഷ നൽകിയാൽ തുക തിരികെ നൽകുമെന്നും ഓ.സി. ട്രാൻസ്പോ അറിയിച്ചിട്ടുണ്ട്. 2026-ലെ ബജറ്റ് വോട്ടിംഗിന് മുൻപ് ഈ വിഷയത്തിൽ ഒരു തീരുമാനമുണ്ടാകുമെന്നാണ് പ്രതീക്ഷ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Travel woes will continue: O.C. Transport will lose dollars if the deadline is extended; City in crisis
