വിന്നിപെഗ്: വിന്നിപെഗിലെ ജൂബിലി സ്റ്റേഷന് സമീപം ഞായറാഴ്ച പുലർച്ചെ ചരക്ക് ട്രെയിൻ പാളം തെറ്റി. അപകടത്തിൽ ഒൻപത് ബോഗികളാണ് പാളത്തിൽ നിന്ന് പുറത്തായത്. ഇതിൽ എട്ട് ബോഗികൾ പൂർണ്ണമായും മറിഞ്ഞ നിലയിലാണെന്നും ഒരെണ്ണം പാളത്തിന് പുറത്ത് നിൽക്കുകയാണെന്നും കനേഡിയൻ നാഷണൽ റെയിൽവേ (CN) വക്താവ് അറിയിച്ചു. ഞായറാഴ്ച പുലർച്ചെ മൂന്ന് മണിയോടെയായിരുന്നു അപകടം നടന്നത്.
അപകടത്തിൽ ആർക്കും പരിക്കേറ്റിട്ടില്ലെന്നും പൊതുജന സുരക്ഷയ്ക്ക് ഭീഷണിയില്ലെന്നും സിഎൻ അധികൃതർ വ്യക്തമാക്കി. ട്രെയിനിൽ അപകടകരമായ വസ്തുക്കളോ രാസവസ്തുക്കളോ ഉണ്ടായിരുന്നില്ല. തീപിടുത്തമോ ചോർച്ചയോ റിപ്പോർട്ട് ചെയ്തിട്ടില്ലെന്നും വക്താവ് അറിയിച്ചു. സംഭവസ്ഥലത്ത് റെയിൽവേ ഉദ്യോഗസ്ഥരും അടിയന്തര വിഭാഗവും ചേർന്ന് പാളങ്ങൾ വൃത്തിയാക്കുന്ന നടപടികൾ തുടരുകയാണ്.
അപകടത്തെത്തുടർന്ന് പ്രദേശത്തെ കെട്ടിടങ്ങൾക്ക് കുലുക്കം അനുഭവപ്പെട്ടതായി സമീപവാസികൾ പറഞ്ഞു. പുലർച്ചെ വലിയ ശബ്ദം കേട്ടാണ് ഉണർന്നതെന്നും തന്റെ അപ്പാർട്ട്മെന്റ് ശക്തമായി കുലുങ്ങിയെന്നും വിമാനത്താവളത്തിന് സമീപം താമസിക്കുന്ന ഡേവിഡ് ന്യൂഫെൽഡ് വെളിപ്പെടുത്തി. റെയിൽവേ യാർഡിൽ നിന്നുള്ള ശബ്ദം പതിവാണെങ്കിലും ഇത്രയും തീവ്രമായ അനുഭവം ആദ്യമായാണെന്നും അദ്ദേഹം കൂട്ടിച്ചേർത്തു.
അപകടകാരണത്തെക്കുറിച്ച് സിഎൻ റെയിൽ അന്വേഷണം ആരംഭിച്ചു. സംഭവത്തിൽ യാത്രക്കാർക്കുണ്ടായ ബുദ്ധിമുട്ടിൽ റെയിൽവേ കമ്പനി ഖേദം പ്രകടിപ്പിച്ചു. നിലവിൽ പാസഞ്ചർ ട്രെയിൻ സർവീസുകളെ അപകടം ബാധിച്ചിട്ടില്ലെന്നും അധികൃതർ വ്യക്തമാക്കി. അപകടസ്ഥലത്ത് പുനരുദ്ധാരണ പ്രവർത്തനങ്ങൾ നടക്കുകയാണ്.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Train derails in Winnipeg: Nine cars overturn, no injuries
