​ലൈസൻസ് വേണോ അതോ സ്പീഡ് വേണോ? ഒന്റാറിയോയിൽ ഗതാഗത നിയമങ്ങൾ കടുക്കുന്നു; ഡ്രൈവർമാർ ജാഗ്രതൈ!

ടൊറന്റോ: ഒന്റാറിയോയിലെ റോഡുകൾ കൂടുതൽ സുരക്ഷിതമാക്കുന്നതിന്റെ ഭാഗമായി പരിഷ്കരിച്ച ഗതാഗത നിയമങ്ങൾ (Highway Traffic Act) 2026 മുതൽ പൂർണ്ണമായി നടപ്പിലാക്കിത്തുടങ്ങി. ചെറിയ അശ്രദ്ധ പോലും ലൈസൻസ് എന്നെന്നേക്കുമായി നഷ്ടപ്പെടാൻ കാരണമാകുന്ന തരത്തിലുള്ള കടുത്ത നിയന്ത്രണങ്ങളാണ് പുതിയ നിയമത്തിലുള്ളത്. മുൻകാലങ്ങളിൽ നിന്ന് വ്യത്യസ്തമായി, കാലതാമസമുള്ള കോടതി നടപടികൾക്കായി കാത്തുനിൽക്കാതെ കുറ്റം ചെയ്യുന്ന സമയത്ത് റോഡരികിൽ വെച്ച് തന്നെ ശിക്ഷാ നടപടികൾ സ്വീകരിക്കാൻ പോലീസിന് അധികാരം നൽകുന്നതാണ് പുതിയ പരിഷ്കാരം.

മദ്യപിച്ചോ മയക്കുമരുന്ന് ഉപയോഗിച്ചോ വാഹനമോടിച്ച് മരണം സംഭവിച്ചാൽ, ഡ്രൈവിംഗ് ലൈസൻസ് എന്നെന്നേക്കുമായി റദ്ദാക്കുന്ന രീതിയിലാണ് നിയമം പരിഷ്കരിച്ചിരിക്കുന്നത്. മുമ്പ് നൽകിയിരുന്ന ഇളവുകൾ ഒഴിവാക്കി, കുറ്റം ചെയ്യുന്ന സമയത്ത് തന്നെ റോഡരികിൽ വെച്ച് നൽകുന്ന സസ്പെൻഷൻ കാലാവധിയും വർദ്ധിപ്പിച്ചു. ലഹരി ഉപയോഗിച്ച് വാഹനമോടിച്ച് ആദ്യമായി പിടിക്കപ്പെട്ടാൽ ലൈസൻസ് 7 ദിവസത്തേക്കും, രണ്ടാമത് പിടിക്കപ്പെട്ടാൽ 14 ദിവസത്തേക്കും ഉടൻ തന്നെ റദ്ദാക്കും. കൂടാതെ, ആദ്യമായി കുറ്റം ചെയ്യുന്നവർ പോലും നിർബന്ധമായും ട്രാഫിക് ബോധവൽക്കരണ ക്ലാസുകളിൽ (Remedial Education) പങ്കെടുക്കണമെന്ന് പുതിയ നിയമം വ്യവസ്ഥ ചെയ്യുന്നു.

വാഹന മോഷണം തടയുന്നതിനായി കടുത്ത ശിക്ഷാ നടപടികളാണ് പുതിയ നിയമത്തിൽ ഉൾപ്പെടുത്തിയിരിക്കുന്നത്. വാഹന മോഷണക്കേസിൽ ആദ്യമായി കുറ്റക്കാരനാണെന്ന് കണ്ടെത്തിയാൽ 10 വർഷത്തേക്കും, രണ്ടാം തവണയാണെങ്കിൽ 15 വർഷത്തേക്കും ഡ്രൈവിംഗ് ലൈസൻസ് റദ്ദാക്കും. കുറ്റം ആവർത്തിക്കുന്നവർക്ക് ആജീവനാന്ത വിലക്ക് ലഭിക്കും. വാഹനങ്ങളുടെ തിരിച്ചറിയൽ നമ്പറായ വിൻ (VIN) വ്യാജമായി നിർമ്മിക്കുന്നവർക്ക് ഒരു ലക്ഷം ഡോളർ വരെ പിഴയും തടവുശിക്ഷയും ലഭിക്കാം. കൂടാതെ, വാഹനങ്ങൾ മോഷ്ടിക്കാൻ ഉപയോഗിക്കുന്ന ഇലക്ട്രോണിക് ഉപകരണങ്ങൾ കണ്ടെത്തിയാൽ അവ പിടിച്ചെടുക്കാൻ പോലീസിന് പ്രത്യേക അധികാരം നൽകിയിട്ടുണ്ട്.

അമിതവേഗതയോ അപകടകരമായ രീതിയിലുള്ള ഡ്രൈവിങ്ങോ (Stunt driving) ശ്രദ്ധയിൽപ്പെട്ടാൽ ഇനി മുതൽ യാതൊരു വിട്ടുവീഴ്ചയുമില്ലാതെ ലൈസൻസ് റദ്ദാക്കും. പഴയ നിയമങ്ങളിൽ നിന്ന് വ്യത്യസ്തമായി, ഓരോ ഡ്രൈവറുടെയും മുൻകാല നിയമലംഘനങ്ങളുടെ വിവരങ്ങൾ ദീർഘകാലം രേഖകളിൽ സൂക്ഷിക്കും. അതിനാൽ ഒരിക്കൽ പിഴവ് വരുത്തിയവർ വീണ്ടും കുറ്റം ആവർത്തിച്ചാൽ അത് ലൈസൻസ് എന്നെന്നേക്കുമായി നഷ്ടപ്പെടാനും അതുവഴി തൊഴിലിനെയും യാത്രകളെയും ബാധിക്കാനും ഇടയാക്കും. റോഡപകടങ്ങൾ ഒഴിവാക്കി ജനങ്ങളുടെ സുരക്ഷ ഉറപ്പാക്കുക എന്ന ലക്ഷ്യത്തോടെയാണ് ഒന്റാറിയോ സർക്കാർ ഈ കർശന നടപടികളുമായി മുന്നോട്ട് പോകുന്നത്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Do you need a license or do you need speed? Traffic laws are getting tougher in Ontario; drivers beware!