ടൊറന്റോ: 2026-ലെ ഫിഫ ലോകകപ്പിന് ആതിഥേയത്വം വഹിക്കാനുള്ള തയ്യാറെടുപ്പുകൾ പൂർത്തിയാക്കി കാനഡയിലെ ടൊറന്റോ സ്റ്റേഡിയം. ലോകകപ്പ് മത്സരങ്ങൾക്കായി സ്റ്റേഡിയത്തിൽ നടപ്പിലാക്കിയ പ്രധാന നവീകരണ പ്രവർത്തനങ്ങളുടെയും സൗകര്യങ്ങളുടെയും ഉദ്ഘാടനം സിറ്റി ഓഫ് ടൊറന്റോയും മാപ്പിൾ ലീഫ് സ്പോർട്സ് ആൻഡ് എന്റർടൈൻമെന്റും (MLSE) ചേർന്ന് നിർവ്വഹിച്ചു. വലിപ്പത്തിൽ ചെറുതാണെങ്കിലും ലോകകപ്പ് വേദികളിൽ ടൊറന്റോ സ്റ്റേഡിയം വേറിട്ടുനിൽക്കുമെന്ന് അധികൃതർ വ്യക്തമാക്കി.
ലോകകപ്പിന്റെ മാനദണ്ഡങ്ങൾ പാലിക്കുന്നതിനായി സ്റ്റേഡിയത്തിന്റെ ശേഷി 45,000 ആയി ഉയർത്തിയിട്ടുണ്ട്. ഇതിന്റെ ഭാഗമായി 17,000 താൽക്കാലിക സീറ്റുകളുടെ നിർമ്മാണം പൂർത്തിയായി. സാധാരണഗതിയിൽ ‘ബിഎംഒ ഫീൽഡ്’ എന്നറിയപ്പെടുന്ന ഈ സ്റ്റേഡിയം ലോകകപ്പ് വേദികളിൽ വലിപ്പം കുറഞ്ഞ ഒന്നാണെങ്കിലും, ആധുനിക സൗകര്യങ്ങളാൽ ഇത് കാണികൾക്ക് മികച്ച അനുഭവം സമ്മാനിക്കും. വടക്കേ അമേരിക്കയിലെ ഏറ്റവും വലിയ നാലാമത്തെ നഗരമായ ടൊറന്റോ, ലോകകപ്പ് ആവേശത്തെ മറ്റൊരു തലത്തിലേക്ക് എത്തിക്കുമെന്ന് എംഎൽഎസ്ഇ ചീഫ് ഓപ്പറേറ്റിംഗ് ഓഫീസർ നിക്ക് ഈവ്സ് പറഞ്ഞു.
രണ്ട് ഘട്ടങ്ങളിലായാണ് സ്റ്റേഡിയത്തിന്റെ വികസന പ്രവർത്തനങ്ങൾ പൂർത്തിയാക്കിയത്. ആദ്യഘട്ടത്തിൽ നാല് എൽഇഡി ബോർഡുകൾ, അത്യാധുനിക ഓഡിയോ-വൈഫൈ സംവിധാനങ്ങൾ, മെച്ചപ്പെട്ട ലൈറ്റിംഗ് എന്നിവ സജ്ജമാക്കി. രണ്ടാം ഘട്ടത്തിൽ താൽക്കാലിക സീറ്റുകൾക്ക് പുറമെ ഡ്രെസ്സിംഗ് റൂമുകളുടെ നവീകരണം, പുതിയ പിച്ച്, 32 പുതിയ വിഐപി സ്യൂട്ടുകൾ എന്നിവയും ഉൾപ്പെടുത്തിയിട്ടുണ്ട്. കാണികൾക്കായി 140 മുതൽ 180 വരെ വൈവിധ്യമാർന്ന ഭക്ഷണ മെനുകളും സ്റ്റേഡിയത്തിൽ ലഭ്യമാക്കും. മെയ് 13-ഓടെ സ്റ്റേഡിയം ഔദ്യോഗികമായി ഫിഫയ്ക്ക് കൈമാറും.
മെയ് ഒമ്പതിന് ഇന്റർ മിയാമിയും ടൊറന്റോ എഫ്സിയും തമ്മിൽ നടക്കുന്ന മത്സരം സ്റ്റേഡിയത്തിന്റെ പ്രവർത്തനക്ഷമത പരിശോധിക്കാനുള്ള വലിയൊരു അവസരമായിരിക്കും. ലയണൽ മെസ്സിയുടെ സാന്നിധ്യം കൊണ്ട് ശ്രദ്ധേയമാകുന്ന ഈ മത്സരത്തിന് ശേഷം ലോകകപ്പിനായുള്ള അവസാനവട്ട ഒരുക്കങ്ങളിലേക്ക് അധികൃതർ കടക്കും. ജൂൺ 12-ന് കാനഡയുടെ ആദ്യ മത്സരമുൾപ്പെടെ ആറ് ലോകകപ്പ് പോരാട്ടങ്ങൾക്കാണ് ടൊറന്റോ വേദിയാകുന്നത്. ജൂലൈ രണ്ടിന് നടക്കുന്ന റൗണ്ട് ഓഫ് 32 മത്സരത്തോടെ നഗരത്തിലെ ലോകകപ്പ് പോരാട്ടങ്ങൾക്ക് സമാപനമാകും.
ലോകകപ്പ് ഒരുക്കങ്ങൾക്കായി നിശ്ചയിച്ച 380 മില്യൺ ഡോളർ ബജറ്റ് കവിയില്ലെന്ന് ടൊറന്റോ മേയർ ഒലിവിയ ചൗ വ്യക്തമാക്കി. സ്റ്റേഡിയം നവീകരണത്തിന് മാത്രം 146 മില്യൺ ഡോളറാണ് ചിലവാക്കിയത്. ഫെഡറൽ ഗവൺമെന്റ് 220 മില്യൺ ഡോളറും സുരക്ഷാ ക്രമീകരണങ്ങൾക്കായി ഒന്റാറിയോ പ്രവിശ്യയിൽ നിന്ന് പ്രത്യേക ഫണ്ടും അനുവദിച്ചിട്ടുണ്ട്. ടൊറന്റോ നഗരത്തിലെ ഗതാഗത കുരുക്ക് ഒഴിവാക്കാനുള്ള പ്രത്യേക മൊബിലിറ്റി പ്ലാൻ ഈ ആഴ്ച തന്നെ പുറത്തിറക്കുമെന്നും മേയർ അറിയിച്ചു.
toronto-stadium-upgrades-revealed-ahead-of-2026-fifa-world-cup
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
