ഐഎസ് ബന്ധം: ടൊറന്റോയിൽ അക്രമത്തിന് പദ്ധതിയിട്ട യുവാവിനെതിരെ ഭീകരക്കുറ്റം ചുമത്തി

ടൊറന്റോ: ഇസ്ലാമിക് സ്റ്റേറ്റ് (ഐഎസ്) ഭീകരസംഘടനയുമായി ബന്ധപ്പെട്ട് പ്രവർത്തിച്ചതിനും ജൂതവിഭാഗങ്ങളെയും സ്ത്രീകളെയും ലക്ഷ്യമിട്ട് അക്രമങ്ങൾ ആസൂത്രണം ചെയ്തതിനും ടൊറന്റോ സ്വദേശിയായ യുവാവിനെതിരെ കനേഡിയൻ പോലീസ് ഭീകരവിരുദ്ധ കുറ്റങ്ങൾ ചുമത്തി. ഗ്രേറ്റർ ടൊറന്റോ ഏരിയ (ജിടിഎ) കേന്ദ്രീകരിച്ച് നിരവധി കുറ്റകൃത്യങ്ങളിൽ ഏർപ്പെട്ട 26 വയസ്സുകാരനായ വലീദ് ഖാനെയാണ് റോയൽ കനേഡിയൻ മൗണ്ടഡ് പോലീസ് (ആർസിഎംപി) പിടികൂടിയത്.

ഇയാൾക്കെതിരെ ഭീകരവാദം ഉൾപ്പെടെ എഴുപതോളം ക്രിമിനൽ കുറ്റങ്ങളാണ് ചുമത്തിയിരിക്കുന്നത്. ഭീകരസംഘടനയുടെ നിർദ്ദേശപ്രകാരം കൊലപാതകം നടത്താൻ ഗൂഢാലോചന നടത്തിയതുൾപ്പെടെ ഏഴ് പ്രധാന ഭീകരവിരുദ്ധ വകുപ്പുകളാണ് ഖാനെതിരെ ചുമത്തിയിട്ടുള്ളത്. ഐഎസ് പ്രവർത്തനങ്ങൾക്കായി തന്റെ സോഷ്യൽ മീഡിയ അക്കൗണ്ടുകൾ വിട്ടുനൽകിയതായും വിദേശത്ത് ഭീകരപ്രവർത്തനങ്ങൾ സുഗമമാക്കാൻ ശ്രമിച്ചതായും അന്വേഷണസംഘം കണ്ടെത്തി.

ഈ വർഷം ജൂൺ 17-നും ഓഗസ്റ്റ് 17-നും ഇടയിലാണ് ഈ കുറ്റകൃത്യങ്ങൾ നടന്നതെന്ന് പോലീസ് സ്ഥിരീകരിച്ചു. മെയ്, ജൂൺ മാസങ്ങളിൽ നടന്ന രണ്ട് വധശ്രമങ്ങളെയും തട്ടിക്കൊണ്ടുപോകൽ ശ്രമങ്ങളെയും തുടർന്ന് നടത്തിയ ‘പ്രോജക്ട് നിയാപോളിറ്റൻ’ എന്ന സംയുക്ത അന്വേഷണമാണ് ഖാന്റെ ഭീകരവാദ ബന്ധങ്ങൾ പുറത്തുകൊണ്ടുവന്നത്. മെയ് 31-ന് ടൊറന്റോയിൽ ഒരു സ്ത്രീയെ ആയുധധാരികളായ സംഘം തട്ടിക്കൊണ്ടുപോകാൻ ശ്രമിച്ചിരുന്നു.

പിന്നീട് ജൂൺ 24-ന് മിസിസാഗയിൽ രണ്ട് സ്ത്രീകൾക്ക് നേരെ സമാനമായ അക്രമശ്രമം നടന്നു. ഈ രണ്ട് സംഭവങ്ങളിലും വലീദ് ഖാന്റെ പങ്കാളിത്തം വ്യക്തമായതിനെ തുടർന്ന് ഓഗസ്റ്റ് 18-ന് ഇയാളെ കസ്റ്റഡിയിലെടുത്തു. വലീദ് ഖാനോടൊപ്പം ഉസ്മാൻ അസീസോവ് (18), ഫഹദ് സാദത്ത് (19) എന്നിവരെയും പോലീസ് പിടികൂടിയിട്ടുണ്ട്. മൂവരും ചേർന്ന് ആകെ 79 കുറ്റകൃത്യങ്ങളിൽ ഏർപ്പെട്ടതായാണ് റിപ്പോർട്ട്.

ഖാന്റെ വസതിയിൽ നടത്തിയ പരിശോധനയിൽ തോക്കുകളും വെടിയുണ്ടകളും മാരകായുധങ്ങളും പോലീസ് കണ്ടെടുത്തു. വലീദ് ഖാന് മാത്രമാണ് നിലവിൽ ഭീകരവാദ ബന്ധം സ്ഥിരീകരിച്ചിട്ടുള്ളത്. മറ്റുള്ളവർക്കെതിരെ തട്ടിക്കൊണ്ടുപോകൽ, ഗൂഢാലോചന തുടങ്ങിയ വകുപ്പുകളാണ് ചുമത്തിയിരിക്കുന്നത്.

വിദ്വേഷം മുൻനിർത്തിയുള്ള അക്രമങ്ങളും ഭീകരവാദ ഭീഷണിയും തടയാൻ പോലീസിന്റെ ഏകോപിപ്പിച്ചുള്ള നീക്കത്തിലൂടെ സാധിച്ചുവെന്ന് പീൽ റീജിയണൽ പോലീസ് ചീഫ് നിഷാൻ ദുരെയപ്പ പറഞ്ഞു. നിലവിൽ വലീദ് ഖാനും ഫഹദ് സാദത്തും പോലീസ് കസ്റ്റഡിയിലാണ്. അന്വേഷണത്തിൽ സഹായിച്ച വിവിധ ഏജൻസികളെയും പോലീസ് ഉദ്യോഗസ്ഥരെയും ടൊറന്റോ മേയർ ഒലിവിയ ചൗ അഭിനന്ദിച്ചു.

toronto-man-charged-with-terrorism-related-offences-linked-to-isis

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt