ടൊറന്റോ: ടൊറന്റോ ഡിസ്ട്രിക്റ്റ് സ്കൂൾ ബോർഡിലെ (TDSB) എലമെന്ററി, സെക്കൻഡറി സ്കൂളുകളിലായി അടുത്ത അധ്യയന വർഷം 289 അധ്യാപക തസ്തികകൾ വെട്ടിക്കുറയ്ക്കാൻ തീരുമാനിച്ചതായി ബോർഡ് വക്താവ് റയാൻ ബേർഡ് അറിയിച്ചു. സ്കൂളുകളിലെ കുട്ടികളുടെ എണ്ണത്തിനനുസരിച്ചാണ് ജീവനക്കാരുടെ വിന്യാസം തീരുമാനിക്കുന്നതെന്നും വരും വർഷത്തിൽ അയ്യായിരത്തോളം വിദ്യാർഥികളുടെ കുറവുണ്ടാകുമെന്നാണ് കണക്കാക്കുന്നതെന്നും അദ്ദേഹം വ്യക്തമാക്കി. ഇതിൽ ഭൂരിഭാഗം തസ്തികകളും എലമെന്ററി സ്കൂളുകളിൽ നിന്നുള്ളവയാണ്. എന്നാൽ വെട്ടിക്കുറയ്ക്കേണ്ട തസ്തികകളുടെ എണ്ണം സംബന്ധിച്ച് അന്തിമ തീരുമാനമായിട്ടില്ലെന്നും റയാൻ ബേർഡ് കൂട്ടിച്ചേർത്തു.
അധ്യാപക തസ്തികകൾ വെട്ടിക്കുറയ്ക്കാനുള്ള നീക്കം രഹസ്യമായാണ് നടക്കുന്നതെന്ന് എലമെന്ററി ടീച്ചേഴ്സ് ഓഫ് ടൊറന്റോ (ETT) ആരോപിച്ചു. 484 എലമെന്ററി അധ്യാപക തസ്തികകൾ ഒഴിവാക്കാൻ ബോർഡ് ആലോചിക്കുന്നതായാണ് യൂണിയന് ലഭിച്ച വിവരം. നിലവിൽ പ്രവിശ്യാ സർക്കാരിന്റെ നേരിട്ടുള്ള മേൽനോട്ടത്തിലുള്ള ബോർഡിൽ, പൊതുജനങ്ങളുടെയോ ട്രസ്റ്റികളുടെയോ അഭിപ്രായം തേടാതെ വിദ്യാഭ്യാസ മന്ത്രി പോൾ കലന്ദ്രയും സൂപ്പർവൈസർ രോഹിത് ഗുപ്തയും ചേർന്നാണ് തീരുമാനങ്ങൾ കൈക്കൊള്ളുന്നതെന്ന് ഇ.ടി.ടി പ്രസിഡന്റ് ഹെലൻ വിക്ടോറോസ് കുറ്റപ്പെടുത്തി. തീരുമാനങ്ങളിലെ സുതാര്യതയില്ലായ്മ രക്ഷിതാക്കൾക്കിടയിലും വലിയ ആശങ്കയ്ക്ക് കാരണമായിട്ടുണ്ട്.
തസ്തികകൾ കുറയ്ക്കുന്നത് ക്ലാസ് മുറികളിലെ വിദ്യാർഥികളുടെ എണ്ണം വർധിക്കാനും പ്രത്യേക സഹായം ആവശ്യമുള്ള കുട്ടികൾക്ക് മതിയായ പിന്തുണ ലഭിക്കാതെ വരാനും ഇടയാക്കുമെന്ന് രക്ഷിതാക്കൾ ആശങ്ക പ്രകടിപ്പിച്ചു. നേരത്തെ, ഏപ്രിൽ ആദ്യവാരത്തിൽ 40 വൈസ് പ്രിൻസിപ്പൽ തസ്തികകൾ വെട്ടിക്കുറയ്ക്കാനും ബോർഡ് തീരുമാനിച്ചിരുന്നു. കോവിഡ് കാലത്തെ പ്രത്യേക ഫണ്ട് നിർത്തലാക്കിയതും വിദ്യാർഥികളുടെ എണ്ണം കുറഞ്ഞതുമാണ് ഇതിന് കാരണമായി ബോർഡ് ചൂണ്ടിക്കാട്ടിയത്. പുതിയ തീരുമാനങ്ങൾ പൊതുവിദ്യാഭ്യാസ മേഖലയെ തകർക്കുമെന്നും ട്രസ്റ്റികൾക്ക് ബോർഡിൽ വീണ്ടും അധികാരം നൽകണമെന്നും രക്ഷിതാക്കൾ ആവശ്യപ്പെട്ടു.
Toronto District School Board to cut 289 teaching positions due to drop in student enrollment
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
