നോവ സ്കോഷ്യ: ഹാലിഫാക്സിലുള്ള ഗുഡ് റോബോട്ട് ബ്രൂവിംഗ് എന്ന സ്ഥാപനം കഴിഞ്ഞ വാരാന്ത്യത്തിൽ അസാധാരണമായ ഒരു ചടങ്ങിന് വേദിയായി. അവ എന്ന പെൺ പട്ടിയും ഹണ്ടർ എന്ന ആൺ നായയും തമ്മിലുള്ള വിവാഹം കാണാൻ നൂറുകണക്കിന് ആളുകളാണ് ഇവിടെ തടിച്ചുകൂടിയത്. നായകളുടെ ഈ വിവാഹ ചടങ്ങിന്റെ ടിക്കറ്റുകൾ ചടങ്ങിന് തലേദിവസം തന്നെ വിറ്റഴിഞ്ഞിരുന്നു. വേറിട്ട പരിപാടികൾ നടത്താൻ താൽപ്പര്യമുള്ള സ്ഥാപനമാണ് ഗുഡ് റോബോട്ട് ബ്രൂവിംഗ് എന്നും, ആളുകൾക്ക് ഒരുമിച്ചുകൂടാൻ ഇത്തരം പരിപാടികൾ സഹായകമാകുമെന്നും ബ്രൂവറിയുടെ സഹസ്ഥാപകൻ ജോഷ് കൗൺസിൽ പറഞ്ഞു.
ഈ നായകളുടെ ഉടമകളായ ലോറൻ സ്റ്റുപ്പിയെല്ലോയും സ്റ്റെഫാനി ഗസ്റ്റോയും തങ്ങളുടെ ഓമന മൃഗങ്ങൾക്കായി ഇങ്ങനെയൊരു ആഘോഷം നടത്താനായതിൽ സന്തോഷം പ്രകടിപ്പിച്ചു. പട്ടിക്കുട്ടികളായിരുന്നപ്പോൾ മുതൽ പിരിയാത്ത കൂട്ടുകാരാണ് അവയും ഹണ്ടറും. അതിനാൽ ഇവർ തമ്മിൽ വിവാഹിതരാകുന്നത് വളരെ ഉചിതമായ ഒരു കാര്യമാണെന്നും അവർ പറയുന്നു. ബ്രൂവറിയുടെ പോസ്റ്റ് യാദൃച്ഛികമായി കണ്ടപ്പോൾ, വെറുതെ ഒന്ന് പേര് കൊടുത്തതാണെന്നും ഇത്രയും വലിയൊരു വിജയം പ്രതീക്ഷിച്ചിരുന്നില്ലെന്നും അവർ കൂട്ടിച്ചേർത്തു.
ഈ വിവാഹത്തിൽ നിന്നും ലഭിച്ച മുഴുവൻ വരുമാനവും നായകളെ രക്ഷിക്കാനും സംരക്ഷിക്കാനും പ്രവർത്തിക്കുന്ന ഫ്ലൈ വിത്ത് മി ആനിമൽ റെസ്ക്യൂ എന്ന ലാഭേച്ഛയില്ലാതെ പ്രവർത്തിക്കുന്ന സംഘടനയ്ക്ക് സംഭാവനയായി നൽകി. ചടങ്ങ് കാണാൻ വലിയ തിരക്കാണ് അനുഭവപ്പെട്ടതെന്നും, റോഡിൽ വരെ ആളുകൾ തടിച്ചുകൂടിയെന്നും ഗസ്റ്റോ പറഞ്ഞു. ചടങ്ങ് പൂർത്തിയായ ശേഷം ഇരുവരും അവരവരുടെ വീടുകളിലേക്ക് മടങ്ങിയെന്നും, അവർ ഒരുമിച്ചു താമസം തുടങ്ങില്ലെന്നും ഉടമകൾ ചിരിച്ചുകൊണ്ട് കൂട്ടിച്ചേർത്തു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Dog wedding; Tickets sold out, shocking Halifax!
