ന്യൂഡൽഹി: പശ്ചിമേഷ്യയിലെ യുദ്ധസാഹചര്യത്തിൽ രാജ്യത്ത് ഇന്ധനക്ഷാമമുണ്ടാകില്ലെന്ന് ഉറപ്പുനൽകി കേന്ദ്ര സർക്കാർ. പെട്രോൾ, ഡീസൽ എന്നിവയ്ക്ക് റേഷൻ ഏർപ്പെടുത്താൻ ഉദ്ദേശിക്കുന്നില്ലെന്നും രാജ്യത്ത് നിലവിൽ ആവശ്യത്തിന് ഇന്ധന ശേഖരമുണ്ടെന്നും കേന്ദ്ര സർക്കാർ വൃത്തങ്ങൾ വ്യക്തമാക്കി. യുദ്ധം പശ്ചാത്തലമാക്കി വിതരണത്തിൽ തടസ്സങ്ങൾ നേരിടാൻ സാധ്യതയുണ്ടെന്ന പ്രചാരണങ്ങൾക്കിടയിലാണ് സർക്കാരിന്റെ ഈ വിശദീകരണം.
അത്യാവശ്യ മേഖലകളിൽ പാചകവാതക വിതരണം തടസ്സപ്പെടാതിരിക്കാൻ ഗെയ്ൽ (GAIL) നിയമപരമായ മുൻകരുതലുകൾ സ്വീകരിച്ചു വരികയാണ്. ഇതിന്റെ ഭാഗമായി കമ്പനി ‘ഫോഴ്സ് മജ്യൂർ’ (Force Majeure) വ്യവസ്ഥ പ്രഖ്യാപിച്ചേക്കും. ഇന്ത്യയിലേക്ക് വലിയ തോതിൽ ഗ്യാസ് നൽകുന്ന ഖത്തർ എനർജി ഇതേ നടപടി സ്വീകരിച്ച സാഹചര്യത്തിലാണ് ഇന്ത്യയും ബദൽ മാർഗങ്ങൾ തേടുന്നത്. ഖത്തറിൽ നിന്നുള്ള വിതരണത്തിൽ കുറവുണ്ടായാൽ അത് പരിഹരിക്കാൻ ഓസ്ട്രേലിയ, കാനഡ എന്നീ രാജ്യങ്ങൾ ഇന്ത്യയെ സഹായിക്കാമെന്ന് അറിയിച്ചിട്ടുണ്ട്. കൂടാതെ യു.എ.ഇ, അമേരിക്ക എന്നീ രാജ്യങ്ങളുമായി പുതിയ കരാറുകളിൽ ഇന്ത്യ ഒപ്പുവെച്ചിട്ടുമുണ്ട്.
നിലവിൽ 56 ദിവസത്തേക്ക് ഉപയോഗിക്കാനുള്ള ക്രൂഡ് ഓയിലും പെട്രോളിയം ഉൽപ്പന്നങ്ങളും ഇന്ത്യയുടെ കൈവശം ഭദ്രമാണ്. ഇതിനുപുറമെ 25 ദിവസത്തേക്കുള്ള അധിക സ്റ്റോക്കും രാജ്യത്തുണ്ട്. റഷ്യയിൽ നിന്നുള്ള എണ്ണ ഇറക്കുമതി പഴയ കരാർ പ്രകാരം തുടരുമെന്നും സർക്കാർ വ്യക്തമാക്കി. എണ്ണക്കപ്പലുകൾക്ക് ആവശ്യമായ ഇൻഷുറൻസ് പരിരക്ഷ ഉറപ്പാക്കാൻ അമേരിക്കയുമായി ചർച്ചകൾ നടക്കുന്നുണ്ട്. അന്താരാഷ്ട്ര ഊർജ്ജ ഏജൻസിയുമായും എണ്ണ ഉൽപ്പാദക രാജ്യങ്ങളുമായും നിരന്തരം സമ്പർക്കം പുലർത്തുന്നതിനാൽ വിതരണത്തിൽ പ്രതിസന്ധിയുണ്ടാകില്ലെന്നും അധികൃതർ അറിയിച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
Will there be a fuel shortage if the war lasts? This is what the government says about India's oil reserves
