ദുബായ്: പുതുവത്സരാഘോഷങ്ങളോടനുബന്ധിച്ച് ദുബായിലേക്ക് വിനോദസഞ്ചാരികളുടെ റെക്കോർഡ് ഒഴുക്ക്. ഡിസംബർ 29 മുതൽ ജനുവരി 3 വരെയുള്ള ആറ് ദിവസത്തിനുള്ളിൽ 13.7 ലക്ഷത്തിലധികം (13,70,440) യാത്രക്കാരാണ് വിവിധ മാർഗ്ഗങ്ങളിലൂടെ ദുബായിലെത്തിയത്. ദുബായ് ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിൻ അഫയേഴ്സ് (GDRFA) ആണ് ഇതുസംബന്ധിച്ച ഔദ്യോഗിക കണക്കുകൾ പുറത്തുവിട്ടത്.
യാത്രക്കാരിൽ ഭൂരിഭാഗം പേരും ദുബായ് അന്താരാഷ്ട്ര വിമാനത്താവളം വഴിയാണ് എത്തിയത്. 12,72,246 പേർ വിമാനമാർഗ്ഗവും 77,059 പേർ ഹത്ത ഉൾപ്പെടെയുള്ള കര അതിർത്തികൾ വഴിയും ദുബായിലെത്തി. സമുദ്രമാർഗ്ഗം 21,135 യാത്രക്കാരാണ് ഈ ദിവസങ്ങളിൽ എത്തിയത്. മുൻവർഷങ്ങളെ അപേക്ഷിച്ച് വിനോദസഞ്ചാരികളുടെ എണ്ണത്തിൽ വലിയ വർദ്ധനവാണ് ഇത്തവണ രേഖപ്പെടുത്തിയത്.
അപ്രതീക്ഷിതമായ ജനത്തിരക്ക് അനുഭവപ്പെട്ടെങ്കിലും അത്യാധുനിക സാങ്കേതിക വിദ്യകളുടെ സഹായത്തോടെ യാത്രാനടപടികൾ വേഗത്തിലാക്കാൻ അധികൃതർക്ക് സാധിച്ചു. വിമാനത്താവളങ്ങളിലെ സ്മാർട്ട് ഗേറ്റുകളുടെ സേവനം യാത്രക്കാർക്ക് വലിയ ആശ്വാസമായി. പാസ്പോർട്ട് നിയന്ത്രണ വിഭാഗത്തിലെ ഉദ്യോഗസ്ഥരുടെ കാര്യക്ഷമമായ ഇടപെടൽ തിരക്ക് ലഘൂകരിക്കുന്നതിൽ നിർണ്ണായക പങ്കുവഹിച്ചു.
വൻതോതിലുള്ള തിരക്ക് മുൻകൂട്ടി കണ്ട് വിപുലമായ തയ്യാറെടുപ്പുകളാണ് ദുബായ് സർക്കാർ നടത്തിയിരുന്നത്. സുഗമമായ യാത്രാനുഭവം ഉറപ്പാക്കുന്നതിനായി കൂടുതൽ ഉദ്യോഗസ്ഥരെ വിവിധ കേന്ദ്രങ്ങളിൽ വിന്യസിച്ചിരുന്നു. ലോകത്തെ ഏറ്റവും പ്രധാനപ്പെട്ട വിനോദസഞ്ചാര കേന്ദ്രമെന്ന നിലയിൽ ഏത് വലിയ ജനത്തിരക്കിനെയും സുരക്ഷിതമായി കൈകാര്യം ചെയ്യാനുള്ള ദുബായിയുടെ സജ്ജീകരണങ്ങളുടെ തെളിവാണ് ഈ പുതിയ കണക്കുകളെന്ന് ജി.ഡി.ആർ.എഫ്.എ വ്യക്തമാക്കി.
The world flocked to Dubai!; Dubai achieves record gains
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
