ട്വന്റി20 ലോകകപ്പിൽ നമീബിയയെ 93 റൺസിന് തകർത്ത് ഇന്ത്യ ഉജ്ജ്വല വിജയം സ്വന്തമാക്കി. ഇന്ത്യ ഉയർത്തിയ 210 റൺസ് എന്ന കൂറ്റൻ വിജയലക്ഷ്യം പിന്തുടർന്ന നമീബിയയ്ക്ക് 18.2 ഓവറിൽ 116 റൺസെടുക്കുന്നതിനിടെ എല്ലാ വിക്കറ്റുകളും നഷ്ടമായി. റൺസ് അടിസ്ഥാനത്തിൽ ട്വന്റി20 ലോകകപ്പ് ചരിത്രത്തിൽ ഇന്ത്യ നേടുന്ന ഏറ്റവും വലിയ വിജയമാണിത്. 2012-ൽ ഇംഗ്ലണ്ടിനെതിരെ നേടിയ 90 റൺസ് വിജയത്തിന്റെ റെക്കോർഡാണ് ഇതോടെ തിരുത്തപ്പെട്ടത്. ഈ വിജയത്തോടെ ഗ്രൂപ്പ് എ-യിൽ പാക്കിസ്ഥാനെ പിന്നിലാക്കി ഇന്ത്യ ഒന്നാം സ്ഥാനത്തെത്തി.
ആദ്യം ബാറ്റു ചെയ്ത ഇന്ത്യ ഒൻപത് വിക്കറ്റ് നഷ്ടത്തിലാണ് 209 റൺസെടുത്തത്. മലയാളി താരം സഞ്ജു സാംസണിന്റെ ലോകകപ്പ് അരങ്ങേറ്റമായിരുന്നു ഈ മത്സരത്തിലെ പ്രധാന ആകർഷണം. നേരിട്ട ആദ്യ മൂന്ന് പന്തുകളിലും സിക്സറുകൾ പറത്തി വെടിക്കെട്ട് തുടക്കമിട്ട സഞ്ജു 8 പന്തിൽ 22 റൺസെടുത്ത് പുറത്തായി. തുടർന്ന് തകർത്തടിച്ച ഇഷാൻ കിഷൻ 24 പന്തിൽ 61 റൺസും, ഹാർദിക് പാണ്ഡ്യ 28 പന്തിൽ 52 റൺസുമെടുത്ത് ഇന്ത്യയെ മികച്ച സ്കോറിലേക്ക് നയിച്ചു. എന്നാൽ അവസാന ഓവറുകളിൽ നമീബിയൻ ക്യാപ്റ്റൻ ജെറാർഡ് ഇറാസ്മസ് നടത്തിയ വിക്കറ്റ് വേട്ട ഇന്ത്യൻ സ്കോർ 209-ൽ ഒതുക്കി. വെറും 4 റൺസിനിടെ 5 വിക്കറ്റുകളാണ് ഇന്ത്യയ്ക്ക് അവസാന ഘട്ടത്തിൽ നഷ്ടമായത്.
മറുപടി ബാറ്റിങ്ങിൽ വരുൺ ചക്രവർത്തിയുടെ സ്പിൻ തന്ത്രങ്ങൾക്ക് മുന്നിൽ നമീബിയ പതറി. മൂന്ന് വിക്കറ്റെടുത്ത വരുണിനൊപ്പം അക്ഷർ പട്ടേലും ഹാർദിക് പാണ്ഡ്യയും രണ്ട് വിക്കറ്റ് വീതം വീഴ്ത്തി പിന്തുണ നൽകി. അർഷ്ദീപ് സിങ്ങും ജസ്പ്രീത് ബുമ്രയും ഓരോ വിക്കറ്റുകൾ വീതം നേടി. നമീബിയൻ നിരയിൽ 29 റൺസെടുത്ത ലോറൻ സ്റ്റീൻകാംപിന് മാത്രമാണ് അൽപ്പമെങ്കിലും പ്രതിരോധം തീർക്കാനായത്. ഗ്രൂപ്പിലെ നിർണായകമായ അടുത്ത മത്സരത്തിൽ ഫെബ്രുവരി 15-ന് ഇന്ത്യ പാക്കിസ്ഥാനെ നേരിടും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
T20 World Cup 2026: India vs Namibia
