ഒട്ടാവ: അന്താരാഷ്ട്ര വിദ്യാർത്ഥികളുടെ എണ്ണം നിയന്ത്രിക്കുന്നതിന്റെ ഭാഗമായി കാനഡ പ്രഖ്യാപിച്ച സ്റ്റഡി പെർമിറ്റ് പരിധിയിൽ നിന്ന് 2026 ജനുവരി മുതൽ മാസ്റ്റേഴ്സ്, പിഎച്ച്ഡി വിദ്യാർത്ഥികളെ ഒഴിവാക്കാൻ തീരുമാനിച്ചു. പുതിയ ‘ഇമിഗ്രേഷൻ ലെവൽസ് പ്ലാൻ 2026-28’ പ്രകാരമാണ് ഈ സുപ്രധാന പ്രഖ്യാപനം. വിദേശ വിദ്യാർത്ഥികളുടെ എണ്ണം മൊത്തത്തിൽ കുറയ്ക്കുന്നതിനുള്ള സർക്കാർ നീക്കത്തിന് പിന്നാലെയാണ് ഈ നയം പ്രഖ്യാപിച്ചത്.
പൊതുമേഖലാ യൂണിവേഴ്സിറ്റികളിൽ മാസ്റ്റേഴ്സ്, പിഎച്ച്ഡി പ്രോഗ്രാമുകളിൽ ചേരുന്ന വിദ്യാർത്ഥികൾക്കാണ് ഈ ഇളവ് ബാധകമാവുക. ഇതോടൊപ്പം, ഡോക്ടറൽ ബിരുദത്തിനായി അപേക്ഷിക്കുന്ന വിദേശ വിദ്യാർത്ഥികൾക്കും അവരുടെ ഒപ്പമുള്ള കുടുംബാംഗങ്ങൾക്കും സ്റ്റഡി പെർമിറ്റ് നടപടികൾ 14 ദിവസത്തിനുള്ളിൽ വേഗത്തിൽ പൂർത്തിയാക്കി നൽകാനും ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) ലക്ഷ്യമിടുന്നു. ഗവേഷണത്തിലും അക്കാദമിക മികവിലും കാനഡയുടെ ആകർഷണീയത നിലനിർത്താൻ ഈ നീക്കം സഹായിക്കുമെന്നാണ് വിലയിരുത്തൽ. ബിരുദാനന്തര വിദ്യാർത്ഥികൾ ഗവേഷണ-നവീകരണ മേഖലകളിൽ നിർണായക പങ്ക് വഹിക്കുന്നുണ്ടെന്നും പഠനം പൂർത്തിയാക്കിയ ശേഷം കാനഡയിൽ സ്ഥിരതാമസമാക്കാൻ ഇവർക്ക് കൂടുതൽ സാധ്യതയുണ്ടെന്നും സർക്കാർ ചൂണ്ടിക്കാട്ടുന്നു.
പുതിയ നിയമപ്രകാരം, കാനഡയിലേക്ക് പുതുതായി വരുന്ന അന്താരാഷ്ട്ര വിദ്യാർത്ഥികളുടെ എണ്ണത്തിൽ വ്യക്തമായ ലക്ഷ്യം നിശ്ചയിച്ചിട്ടുണ്ട്. 2026-ൽ 1,55,000 പുതിയ വിദ്യാർത്ഥികൾക്കും, തുടർന്ന് 2027-ലും 2028-ലും ഓരോ വർഷവും 1,50,000 വിദ്യാർത്ഥികൾക്കുമാണ് പരിധി നിശ്ചയിച്ചിരിക്കുന്നത്. ഈ കണക്കിൽ നിലവിലുള്ള വിദ്യാർത്ഥികളുടെ പെർമിറ്റ് പുതുക്കൽ ഉൾപ്പെടുന്നില്ല. രാജ്യത്തെ താൽക്കാലിക താമസക്കാരുടെ (വിദേശ വിദ്യാർത്ഥികൾ, താൽക്കാലിക തൊഴിലാളികൾ ഉൾപ്പെടെ) എണ്ണം 2027 അവസാനത്തോടെ കാനഡയുടെ മൊത്തം ജനസംഖ്യയുടെ 5% താഴെയായി നിലനിർത്തുക എന്ന വിശാലമായ ലക്ഷ്യത്തിന്റെ ഭാഗമായാണ് ഈ നിയന്ത്രണം ഏർപ്പെടുത്തിയിട്ടുള്ളത്. താമസ, ആരോഗ്യ സംരക്ഷണ മേഖലകളിലുണ്ടായ സമ്മർദ്ദം കുറച്ച്, സുസ്ഥിരമായ ഇമിഗ്രേഷൻ നിലവാരം ഉറപ്പാക്കുകയാണ് സർക്കാരിന്റെ പ്രധാന ഉദ്ദേശ്യം.
ഒരു അംഗീകൃത ഇമിഗ്രേഷൻ കൺസൽട്ടന്റിന്റെ സേവനങ്ങൾക്ക് ബന്ധപ്പെടാം: +1 (289) 690-8119 ( eHouse Immigrations Services Ltd) (https://ehouseimmigration.ca/)
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Relaxation in study permit limits: Study permits for Masters and PhD students will now be as follows from 2026
