ടൊറന്റോ: ഈ വർഷത്തെ അവസാന ദിനങ്ങളിൽ ടൊറന്റോ ഉൾപ്പെടെയുള്ള തെക്കൻ ഒന്റാരിയോയുടെ വിവിധ ഭാഗങ്ങളിൽ ശക്തമായ മഴയ്ക്കും കാറ്റിനും സാധ്യതയുള്ളതായി എൻവയോൺമെന്റ് കാനഡ മുന്നറിയിപ്പ് നൽകി. ഞായറാഴ്ച ഉച്ചയോടെ ആരംഭിക്കുന്ന മഴ തിങ്കളാഴ്ച രാവിലെ വരെ തുടരുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ വിലയിരുത്തൽ. ജിടിഎ (GTA) ഉൾപ്പെടെയുള്ള പ്രദേശങ്ങളിൽ യെല്ലോ വാണിംഗ് പ്രഖ്യാപിച്ചിട്ടുണ്ട്.
ഞായറാഴ്ച ഉച്ചയ്ക്ക് ശേഷം ആരംഭിക്കുന്ന മഴ ചിലയിടങ്ങളിൽ ഫ്രീസിംഗ് റെയിൻ ആയി മാറാൻ സാധ്യതയുണ്ടെന്ന് അധികൃതർ അറിയിച്ചു. ഏകദേശം 20 മുതൽ 40 മില്ലിമീറ്റർ വരെ മഴ ലഭിക്കുമെന്നാണ് പ്രതീക്ഷിക്കുന്നത്. താഴ്ന്ന പ്രദേശങ്ങളിൽ വെള്ളപ്പൊക്കത്തിന് സാധ്യതയുള്ളതിനാൽ നദികൾ, തോടുകൾ, കൽവർട്ടുകൾ എന്നിവയുടെ അടുത്തുനിന്നും മാറിനിൽക്കണമെന്ന് താമസക്കാർക്ക് നിർദ്ദേശം നൽകി.
തിങ്കളാഴ്ച രാവിലെ ശക്തമായ ശീതക്കാറ്റ് മേഖലയിലൂടെ കടന്നുപോകുന്നതോടെ മണിക്കൂറിൽ 70 മുതൽ 80 കിലോമീറ്റർ വരെ വേഗതയിൽ കാറ്റ് വീശാൻ സാധ്യതയുണ്ടെന്ന് പ്രത്യേക കാലാവസ്ഥാ പ്രസ്താവനയിൽ പറയുന്നു. തിങ്കളാഴ്ച വൈകുന്നേരത്തോടെ കാറ്റിന്റെ വേഗത കുറയുമെന്നാണ് പ്രവചനം. മഞ്ഞ് വീഴ്ചയുണ്ടായ പ്രദേശങ്ങളിൽ കാറ്റ് കൂടുതൽ ആഘാതം സൃഷ്ടിച്ചേക്കാം.
ശക്തമായ കാറ്റിൽ മരച്ചില്ലകൾ ഒടിയാനും വീടുകളുടെ മേൽക്കൂരകൾക്കും വേലികൾക്കും നാശനഷ്ടങ്ങൾ സംഭവിക്കാനും സാധ്യതയുണ്ട്. ചിലയിടങ്ങളിൽ വൈദ്യുതി ബന്ധം തടസ്സപ്പെട്ടേക്കാമെന്നും അധികൃതർ മുന്നറിയിപ്പ് നൽകി. ടൊറന്റോയ്ക്ക് പുറമെ പീൽ (Peel), യോർക്ക് (York), ഡർഹാം (Durham) മേഖലകളിലും സമാനമായ ജാഗ്രതാ നിർദ്ദേശങ്ങൾ പുറപ്പെടുവിച്ചിട്ടുണ്ട്.
പരിസരങ്ങളിലുള്ള ലൂസ് ഒബ്ജക്റ്റുകൾ സുരക്ഷിതമായി മാറ്റി വെക്കണമെന്നും മാറുന്ന കാലാവസ്ഥാ സാഹചര്യങ്ങൾ നിരന്തരം നിരീക്ഷിക്കണമെന്നും എൻവയോൺമെന്റ് കാനഡ പൊതുജനങ്ങളോട് നിർദ്ദേശിച്ചു. ഒന്റാരിയോയുടെ മറ്റ് ഭാഗങ്ങളിൽ കനത്ത മഞ്ഞുവീഴ്ചയ്ക്കും സാധ്യതയുണ്ടെന്ന് റിപ്പോർട്ടുകൾ വ്യക്തമാക്കുന്നു.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Strong winds and rain in Toronto: Weather warning issued
