കാനഡയിലെ ഒന്റാരിയോയിലുള്ള മിസിസാഗയിൽ 51 അടി ഉയരമുള്ള ശ്രീരാമ പ്രതിമ അനാച്ഛാദനം ചെയ്തു. ഹിന്ദു ഹെറിറ്റേജ് സെന്ററിലാണ് വടക്കേ അമേരിക്കയിലെ ഏറ്റവും ഉയരം കൂടിയ ഈ പ്രതിമ സ്ഥാപിച്ചിട്ടുള്ളത്. അയോധ്യയിലെ രാമജന്മഭൂമി ക്ഷേത്രത്തിൽ നിന്ന് പ്രചോദനമുൾക്കൊണ്ടാണ് ഇത് നിർമ്മിച്ചത്. ഈ മാസം മൂന്നാം തീയതി നടന്ന അനാച്ഛാദന ചടങ്ങിൽ, കനേഡിയൻ രാഷ്ട്രീയ നേതാക്കൾ ഉൾപ്പെടെ പതിനായിരത്തിലധികം ആളുകൾ പങ്കെടുത്തു. ടൊറന്റോ അന്താരാഷ്ട്ര വിമാനത്താവളത്തിലിറങ്ങുന്ന യാത്രക്കാർക്ക് വിമാനത്തിൽ നിന്ന് ഈ പ്രതിമ കാണാൻ സാധിക്കും.
നാല് വർഷം കൊണ്ടാണ് പ്രതിമയുടെ നിർമ്മാണം പൂർത്തിയാക്കിയത്. ഹരിയാനയിലെ മനേസറിലുള്ള മാട്ടു റാം ആർട്ട് സെന്ററിൽ ശിൽപി നരേഷ് കുമാർ കുമാവത്താണ് ഇത് രൂപകൽപ്പന ചെയ്തത്. സ്റ്റീൽ ഫ്രെയിമിന് മുകളിൽ ഫൈബർഗ്ലാസ് ഉപയോഗിച്ചാണ് പ്രതിമ നിർമ്മിച്ചിരിക്കുന്നത്. 200 കിലോമീറ്റർ വേഗത്തിലുള്ള കാറ്റിനെയും കനേഡിയൻ കാലാവസ്ഥയെയും പ്രതിരോധിക്കാൻ ഇതിന് കഴിയും. പ്രതിമയുടെ ഭാഗങ്ങൾ ഇന്ത്യയിൽ നിർമ്മിച്ച ശേഷം കാനഡയിൽ എത്തിച്ച് വിദഗ്ധരുടെ സഹായത്തോടെ കൂട്ടിയോജിപ്പിക്കുകയായിരുന്നു. ഇന്തോ-കനേഡിയൻ വ്യവസായിയായ ലാജ് പ്രാഷറാണ് ഇതിനുള്ള സംഭാവന നൽകിയത്.
ഹിന്ദു ഹെറിറ്റേജ് സെന്റർ സ്ഥാപകൻ ആചാര്യ സുരീന്ദർ ശർമ ശാസ്ത്രി, ഇത് സമൂഹത്തിന് ലഭിച്ച ഒരു ആത്മീയ സമ്മാനമാണെന്ന് പറഞ്ഞു. എല്ലാ സന്ദർശകർക്കും ഇവിടെ ഊഷ്മളമായ സ്വീകരണം ലഭിക്കുമെന്ന് മിസിസാഗ മേയർ തൻ്റെ എക്സ് പോസ്റ്റിലൂടെ അറിയിച്ചു.
51-foot-tall statue of Lord Ram unveiled in Canada’s Mississauga
