ആർട്ടിഫിഷ്യൽ ഇന്റലിജൻസിന്റെ (AI) അതിവേഗ വളർച്ച ലോകമെമ്പാടും സാങ്കേതികവിദ്യാ രംഗത്ത് വൻ മാറ്റങ്ങളാണ് കൊണ്ടുവരുന്നത്. ഈ കുതിച്ചുചാട്ടത്തിന്റെ ഭാഗമായി, കാനഡയിലെ ആൽബർട്ടയിൽ തദ്ദേശീയരായ വുഡ്ലാൻഡ് ക്രീ ഫസ്റ്റ് നേഷന്റെ നേതൃത്വത്തിൽ ഒരു അത്യാധുനിക ഡാറ്റാ സെന്റർ സ്ഥാപിക്കാൻ ഒരുങ്ങുന്നു. ആൽബർട്ടയിൽ തദ്ദേശീയരുടെ നേതൃത്വത്തിൽ വരുന്ന ആദ്യത്തെ ഡാറ്റാ സെന്റർ എന്ന നിലയിൽ ഈ പദ്ധതിക്ക് വലിയ പ്രാധാന്യമുണ്ട്. ഉപേക്ഷിക്കപ്പെട്ട ഒരു വൈദ്യുത നിലയം ഏറ്റെടുത്ത് ഡാറ്റാ സെന്ററാക്കി മാറ്റാനാണ് ഇവരുടെ പദ്ധതി. ഊർജ്ജ, സാങ്കേതിക മേഖലകളിൽ പ്രവർത്തിക്കുന്ന ആൽബെർട്ട ആസ്ഥാനമായുള്ള സോവറിൻ ഡിജിറ്റൽ ഇൻഫ്രാസ്ട്രക്ചറുമായി സഹകരിച്ചാണ് ഈ ബൃഹദ്പദ്ധതി നടപ്പിലാക്കുന്നത്.
എഡ്മണ്ടണിൽ നിന്ന് ഏകദേശം 500 കിലോമീറ്റർ വടക്ക് പടിഞ്ഞാറായി, വുഡ്ലാൻഡ് ക്രീ ഫസ്റ്റ് നേഷന്റെ പരമ്പരാഗത ഭൂമിയിലാണ് ‘മിഹ്ത അസ്കൈ ഡാറ്റാ സെന്റർ’ എന്ന് പേരിട്ടിരിക്കുന്ന ഈ പദ്ധതി യാഥാർത്ഥ്യമാകുന്നത്. “വുഡ് ലാൻഡ്” എന്ന് അർത്ഥം വരുന്ന ഈ പേര്, തദ്ദേശീയ സംസ്കാരത്തെയും പ്രാദേശിക സ്വത്വത്തെയും അടയാളപ്പെടുത്തുന്നു. 650 മെഗാവാട്ട് പ്രകൃതിവാതക ഊർജ്ജം ഉത്പാദിപ്പിക്കാൻ ശേഷിയുള്ള രണ്ട് 200 മെഗാവാട്ട് ടർബൈനുകൾ ഇവിടെ സ്ഥാപിക്കും. ഈ ഡാറ്റാ സെന്റർ തങ്ങളുടെ സമൂഹത്തിന് വലിയ വരുമാനവും നിരവധി തൊഴിലവസരങ്ങളും നൽകുമെന്ന് വുഡ്ലാൻഡ് ക്രീ ഫസ്റ്റ് നേഷൻ തലവൻ ഐസക് ലബോക്കൻ-അവിറോം പറഞ്ഞു. വിദ്യാഭ്യാസം, മുതിർന്നവരുടെ പരിചരണം, ഭവനം, അടിസ്ഥാന സൗകര്യങ്ങൾ എന്നിവ മെച്ചപ്പെടുത്തുന്നതിനും ഭാവി തലമുറയ്ക്ക് ഒരു വലിയ സമ്പാദ്യം ഉറപ്പാക്കുന്നതിനും ഇത് സഹായിക്കുമെന്നും അദ്ദേഹം കൂട്ടിച്ചേർത്തു.
ഡാറ്റാ സെന്ററുകൾക്ക് ആവശ്യമായ വൈദ്യുതിയുടെ ലഭ്യതയാണ് സാധാരണയായി ഇത്തരം പദ്ധതികൾക്ക് നേരിടുന്ന പ്രധാന വെല്ലുവിളി. എന്നാൽ ഈ പുതിയ പദ്ധതിയിൽ, ആവശ്യമായ പ്രകൃതിവാതക ഊർജ്ജം ഡാറ്റാ സെന്റർ പരിസരത്ത് തന്നെ ഉത്പാദിപ്പിക്കുമെന്നതാണ് ഒരു പ്രധാന പ്രത്യേകത. ഇത് വൈദ്യുതി ലഭ്യതയുമായി ബന്ധപ്പെട്ട തടസ്സങ്ങളെ ഇല്ലാതാക്കുന്നു. കൂടാതെ, തദ്ദേശീയ സമൂഹങ്ങളുമായി സഹകരിക്കുന്നതിലൂടെ ഇത്തരം വലിയ വികസന പദ്ധതികൾ വേഗത്തിൽ പൂർത്തിയാക്കാൻ കഴിയുമെന്ന് സോവറിൻ ഡിജിറ്റൽ ഇൻഫ്രാസ്ട്രക്ചറിന്റെ ചീഫ് ഫിനാൻഷ്യൽ ഓഫീസർ ജോൺ ഹോർസ്മാൻ അഭിപ്രായപ്പെട്ടു. കഴിഞ്ഞ വർഷങ്ങളിൽ മറ്റ് ഡാറ്റാ സെന്റർ പദ്ധതികളിൽ തദ്ദേശീയ സമൂഹങ്ങളുമായി വേണ്ടത്ര കൂടിയാലോചനകൾ നടന്നിട്ടില്ലെന്ന് അദ്ദേഹം ചൂണ്ടിക്കാട്ടിയിരുന്നു. അത്തരം പാളിച്ചകൾ ഒഴിവാക്കി, പ്രാദേശിക സമൂഹങ്ങളുമായുള്ള പങ്കാളിത്തം ഉറപ്പാക്കിയാണ് ഈ പദ്ധതി മുന്നോട്ട് പോകുന്നത്.
ഈ പദ്ധതിക്ക് 51% തദ്ദേശീയ ഉടമസ്ഥാവകാശമുണ്ടെന്നത് ശ്രദ്ധേയമാണ്. ഇത് അനുരഞ്ജനത്തിലും സാമ്പത്തിക പങ്കാളിത്തത്തിലും ഒരു സുപ്രധാന ചുവടുവെപ്പാണെന്ന് ടെക്നോളജി ആൻഡ് ഇന്നൊവേഷൻ മന്ത്രി നേറ്റ് ഗ്ലുബിഷ് പ്രസ്താവിച്ചു. ആൽബർട്ടയുടെ AI അടിസ്ഥാന സൗകര്യങ്ങൾ മുന്നോട്ട് കൊണ്ടുപോകുന്നതിൽ ഈ പദ്ധതിക്ക് നിർണായക പങ്കുണ്ടെന്നും അദ്ദേഹം കൂട്ടിച്ചേർത്തു. നാല് ഘട്ടങ്ങളിലായി പൂർത്തിയാകുന്ന ഈ പദ്ധതിയുടെ ആദ്യ ഘട്ടം 2027 പകുതിയോടെ പ്രകൃതിവാതക ഉത്പാദനം ആരംഭിക്കുന്നതോടെ പ്രവർത്തനക്ഷമമാകും. സാങ്കേതിക മുന്നേറ്റങ്ങളുടെ ഈ കാലത്ത്, തദ്ദേശീയ സമൂഹങ്ങൾക്ക് സ്വന്തം നിലയിൽ വികസന പാതയിലേക്ക് കടന്നുവരാൻ ഇത്തരം പദ്ധതികൾ വലിയ പ്രോത്സാഹനമാകും.
