ഹാലിഫാക്സ്: ഹാലിഫാക്സിനെ നടുക്കിയ ആൻ മേരി മാസ്സൺ എന്ന 27-കാരിയുടെ കൊലപാതകം നടന്നിട്ട് നാല് പതിറ്റാണ്ട് പിന്നിടുന്നു. 1986 മാർച്ച് 28-ന് പുലർച്ചെ റോബി സ്ട്രീറ്റിലെ സുഹൃത്തിന്റെ വീട്ടിൽ വെച്ചാണ് ആൻ മേരി ക്രൂരമായി കുത്തേറ്റു മരിച്ചത്. വർഷങ്ങൾ ഇത്ര കഴിഞ്ഞിട്ടും പ്രതിയെ പിടികൂടാൻ കഴിയാത്തത് പോലീസിനും നിയമസംവിധാനത്തിനും ഇന്നും ഒരു വെല്ലുവിളിയായി തുടരുകയാണ്.
1986 മാർച്ച് 27-ന് ഉച്ചയ്ക്ക് 3 മണിയോടെ സ്പ്രൈഫീൽഡിലെ തന്റെ വീട്ടിൽ നിന്നും റോബി സ്ട്രീറ്റിലെ സുഹൃത്തുക്കളെ കാണാനിറങ്ങിയതായിരുന്നു ആൻ മേരി. എന്നാൽ അടുത്ത ദിവസം പുലർച്ചെ 2 മണിയോടെ ആൻ മേരിയെ സുഹൃത്തിന്റെ വീട്ടിൽ കൊല്ലപ്പെട്ട നിലയിൽ കണ്ടെത്തുകയായിരുന്നു. ശരീരത്തിൽ ഒന്നിലധികം തവണ കുത്തേറ്റ നിലയിലായിരുന്നു മൃതദേഹം.
കേസുമായി ബന്ധപ്പെട്ട് അന്ന് ഒരാളെ പോലീസ് അറസ്റ്റ് ചെയ്തിരുന്നെങ്കിലും പ്രാഥമിക വാദത്തിന് ശേഷം തെളിവുകളുടെ അഭാവത്തിൽ ഇയാളെ വിട്ടയച്ചു. അതോടെ അന്വേഷണം വഴിമുട്ടി. കാലം ഏറെ കഴിഞ്ഞെങ്കിലും ഈ കേസിനെക്കുറിച്ച് എന്തെങ്കിലും വിവരങ്ങൾ അറിയാവുന്നവർ മുന്നോട്ട് വരണമെന്ന് ഹാലിഫാക്സ് റീജിയണൽ പോലീസ് ഇപ്പോൾ വീണ്ടും അഭ്യർത്ഥിച്ചിരിക്കുകയാണ്.
ഈ കൊലപാതകത്തെക്കുറിച്ച് വ്യക്തമായ വിവരം നൽകുന്നവർക്ക് നോവ സ്കോഷ്യ നീതിന്യായ വകുപ്പ് വലിയൊരു തുക പ്രതിഫലം പ്രഖ്യാപിച്ചിട്ടുണ്ട്. പ്രതിയെ പിടികൂടാൻ സഹായിക്കുന്ന വിവരങ്ങൾ നൽകുന്നവർക്ക് 1,50,000 ഡോളർ വരെയാണ് പ്രതിഫലം വാഗ്ദാനം ചെയ്തിരിക്കുന്നത്.
കാലങ്ങൾ കടന്നുപോയെങ്കിലും ചെറിയൊരു സൂചന പോലും കേസ് തെളിയാൻ സഹായിച്ചേക്കാമെന്ന പ്രതീക്ഷയിലാണ് ഉദ്യോഗസ്ഥർ. ആൻ മേരിയുടെ കുടുംബത്തിന് നീതി ലഭിക്കാൻ പൊതുജനങ്ങളുടെ സഹായം തേടുകയാണ് പോലീസ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Stabbing death of Halifax woman still unsolved 40 years later
