ആൽബർട്ട: ആൽബർട്ടയിൽ പക്ഷിപ്പനി ബാധിച്ച് വളർത്തുനായ ചത്തു. ആൽബർട്ട സൊസൈറ്റി ഫോർ ദി പ്രിവൻഷൻ ഓഫ് ക്രൂവൽറ്റി ടു ആനിമൽസ് (SPCA) ആണ് ഇക്കാര്യം ഔദ്യോഗികമായി പുറത്തുവിട്ടത്. അതീവ ഗുരുതരമായ ‘ഹൈലി പത്തോജെനിക് ഏവിയൻ ഇൻഫ്ലുവൻസ’ (HPAI) യാണ് സംഭവത്തിനുകാരണമെന്നാണ് അധികൃതർ വ്യക്തമാക്കിയത്. പ്രവിശ്യയിൽ ഇത്തരത്തിലുള്ള ആദ്യ റിപ്പോർട്ടാണിതെന്നും, സാധാരണയായി പക്ഷികളെ ബാധിക്കുന്ന ‘HPAI’ വളർത്തുമൃഗങ്ങളിലേക്ക് പടരുന്നത് വലിയ ആശങ്കയ്ക്ക് ഇടയാക്കുന്നുണ്ടെന്നും അധികൃതർ കൂട്ടിച്ചേർത്തു.
കാനഡയിൽ പക്ഷിപ്പനി ബാധിച്ച് ഒരു നായ ചാവുന്ന രണ്ടാമത്തെ സംഭവമാണിത്. ഇതിനുമുമ്പ് 2023 ഏപ്രിലിൽ ഒന്റാറിയോയിലെ ഓഷാവയിലായിരുന്നു സമാനമായ സംഭവം റിപ്പോർട്ട് ചെയ്തത്. അന്ന് ചത്ത ഒരു വനതാറാവിനെ (Wild Goose) കടിച്ചുതിന്നതിലൂടെയാണ് ആ നായയ്ക്ക് രോഗം ബാധിച്ചത്. എന്നാൽ ഇപ്പോൾ ആൽബർട്ടയിൽ ചത്ത നായയുടെ കൂടുതൽ വിവരങ്ങളോ അത് ഏത് പ്രദേശത്താണെന്നോ അധികൃതർ വെളിപ്പെടുത്തിയിട്ടില്ല.
സാധാരണഗതിയിൽ പക്ഷികളിലാണ് ഈ രോഗം കണ്ടുവരുന്നത്. എന്നാൽ രോഗം ബാധിച്ച പക്ഷികളുമായോ അവയുടെ സ്രവങ്ങളുമായോ സമ്പർക്കമുണ്ടായാൽ വളർത്തുമൃഗങ്ങളിലേക്കും വൈറസ് പകരാം. പക്ഷിപ്പനി ബാധിച്ച പക്ഷികളെ കടിച്ചുതിന്നുന്നതും രോഗം പടരാൻ കാരണമാകുമെന്ന് എസ്.പി.സി.എ (SPCA) മുന്നറിയിപ്പ് നൽകി.
പക്ഷിപ്പനി പടരുന്ന പശ്ചാത്തലത്തിൽ വളർത്തുമൃഗങ്ങളെ സംരക്ഷിക്കാൻ അധികൃതർ ചില നിർദ്ദേശങ്ങൾ നൽകിയിട്ടുണ്ട്. വളർത്തുമൃഗങ്ങളെ കാട്ടുപക്ഷികളുമായോ അവയുടെ ജഡങ്ങളുമായോ സമ്പർക്കമുണ്ടാകാതെ നോക്കുകയാണ് ഏറ്റവും പ്രധാനം. കൂടാതെ, പാകം ചെയ്യാത്ത പക്ഷിയറച്ചിയോ തിളപ്പിക്കാത്ത പാലോ വളർത്തുമൃഗങ്ങൾക്ക് ഭക്ഷണമായി നൽകരുതെന്നും അധികൃതർ വ്യക്തമാക്കി.
ശ്വാസതടസ്സം, നാഡീസംബന്ധമായ അസ്വസ്ഥതകൾ തുടങ്ങിയ രോഗലക്ഷണങ്ങൾ വളർത്തുമൃഗങ്ങളിൽ കണ്ടാൽ ഉടൻ തന്നെ വെറ്ററിനറി ഡോക്ടറുടെ സഹായം തേടണമെന്നും അധികൃതർ അറിയിച്ചു. കാനഡയിലെ ഭക്ഷ്യപരിശോധന ഏജൻസിയും സ്ഥിതിഗതികൾ നിരീക്ഷിച്ചുവരികയാണ്. വളർത്തുമൃഗങ്ങളിൽ പെട്ടെന്നുണ്ടാകുന്ന പെരുമാറ്റ വ്യത്യാസങ്ങളും ഉടമകൾ ശ്രദ്ധിക്കണമെന്നും അധികൃതർ ഓർമ്മിപ്പിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Bird flu scare spreads: SPCA confirms pet dog has died in Alberta
