മാഡ്രിഡ്: യുഎസും ഇസ്രായേലും ഇറാനെതിരെ നടത്തിയ ആക്രമണങ്ങൾക്ക് പിന്നാലെ, തങ്ങളുടെ സൈനിക താവളങ്ങൾ ഇത്തരം നീക്കങ്ങൾക്കായി ഉപയോഗിക്കാൻ അനുവദിക്കില്ലെന്ന് സ്പെയിൻ സർക്കാർ വ്യക്തമാക്കി. സ്പെയിനിലെ സംയുക്ത സൈനിക താവളങ്ങളിൽ നിന്ന് യുഎസിന്റെ 15 വിമാനങ്ങൾ ഇതിനകം പുറപ്പെട്ടതായി റിപ്പോർട്ടുകൾ പുറത്തുവന്ന സാഹചര്യത്തിലാണ് സർക്കാർ നിലപാട് അറിയിച്ചത്.
തെക്കൻ സ്പെയിനിലെ റോട്ട നേവൽ ബേസ് (Rota Naval Base), മോറോൺ എയർ ബേസ് (Morón Air Base) എന്നിവിടങ്ങളിൽ നിന്നാണ് യുഎസ് വിമാനങ്ങൾ പറന്നുയർന്നത്. ഇവയിൽ ഒമ്പത് ബോയിംഗ് KC-135 സ്ട്രാറ്റോടാങ്കർ (Boeing KC-135 Stratotanker) വിമാനങ്ങൾ ജർമ്മനിയിലെ റാംസ്റ്റൈൻ എയർ ബേസിൽ ഇറങ്ങിയതായി ഫ്ലൈറ്റ് ട്രാക്കിംഗ് വെബ്സൈറ്റായ ഫ്ലൈറ്റ് റേഡാർ 24-ന്റെ മാപ്പുകൾ സൂചിപ്പിക്കുന്നു. മറ്റ് വിമാനങ്ങൾ ഫ്രാൻസിലേക്കും അജ്ഞാത കേന്ദ്രങ്ങളിലേക്കുമാണ് നീങ്ങിയത്.
സ്പെയിനിന്റെ പരമാധികാര പരിധിയിലുള്ള താവളങ്ങൾ ഇറാനെതിരായ സൈനിക നടപടികൾക്കായി ഉപയോഗിക്കാൻ അനുമതി നൽകില്ലെന്ന് വിദേശകാര്യമന്ത്രി ജോസ് മാനുവൽ അൽബാരസ് പറഞ്ഞു. ഐക്യരാഷ്ട്രസഭയുടെ ചട്ടങ്ങൾക്കും യുഎസുമായുള്ള ഉഭയകക്ഷി കരാറുകൾക്കും വിരുദ്ധമായ ഒരു പ്രവർത്തനത്തിനും താവളങ്ങൾ വിട്ടുനൽകില്ലെന്നും അദ്ദേഹം കൂട്ടിച്ചേർത്തു. സോഷ്യലിസ്റ്റ് പ്രധാനമന്ത്രി പെഡ്രോ സാഞ്ചസ് യുഎസ്-ഇസ്രായേൽ നടപടികളെ ശക്തമായി വിമർശിച്ചു.
അതേസമയം, സ്പെയിനിൽ സ്ഥിരമായി വിന്യസിച്ചിട്ടുള്ള വിമാനങ്ങളാണ് ഇവയെന്നും നിലവിലെ സാഹചര്യത്തിൽ ഇവ മാറ്റി വിന്യസിച്ചതാണെന്നും പ്രതിരോധ മന്ത്രി മാർഗരീറ്റ റോബ്ലസ് അറിയിച്ചു. നേരത്തെ ബ്രിട്ടൻ ഇത്തരം ആക്രമണങ്ങൾക്ക് താവളങ്ങൾ വിട്ടുനൽകില്ലെന്ന് അറിയിച്ചിരുന്നെങ്കിലും, പിന്നീട് ‘സാമൂഹിക സ്വയംരക്ഷ’ (Collective self-defence) എന്ന പേരിൽ അനുമതി നൽകിയിരുന്നു. സ്പെയിനിന്റെ ഈ തീരുമാനം അമേരിക്കയുമായുള്ള സൗഹൃദത്തെ ബാധിച്ചേക്കും എന്നാണ് വിദ്ഗ്ധരുടെ വിലയിരുത്തൽ.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
Spain clashes with US over Iran issue; Will not hand over bases, government toughens stance
