മകന് പാസ്‌പോർട്ടില്ല, പുറത്ത് യുദ്ധം; ബ്രിട്ടീഷ് എംബസിയുടെ സഹായം തേടി ഖത്തറിൽ കുടുങ്ങിയ കനേഡിയൻ കുടുംബം

ആൽബർട്ട: മിഡിൽ ഈസ്റ്റിലെ യുദ്ധസാഹചര്യങ്ങൾക്കിടയിൽ മകന്റെ കനേഡിയൻ പാസ്‌പോർട്ട് പുതുക്കി ലഭിക്കാൻ വൈകിയതോടെ, ഖത്തറിൽ കഴിയുന്ന ആൽബർട്ട സ്വദേശിനി സഹായത്തിനായി ബ്രിട്ടീഷ് എംബസിയെ സമീപിച്ചു. കഴിഞ്ഞ ആറ് വർഷമായി ദോഹയിൽ താമസിക്കുന്ന ക്രിസ്റ്റൻ ഗ്രിഫിത്സും കുടുംബവുമാണ് പ്രതിസന്ധിയിലായത്. യുദ്ധം രൂക്ഷമായതോടെ മേഖലയിൽ മിസൈൽ, ഡ്രോൺ ആക്രമണങ്ങൾ പതിവായതായും സുരക്ഷാ മുൻകരുതലിന്റെ ഭാഗമായി രാജ്യം വിടാൻ ശ്രമിക്കുമ്പോഴാണ് പാസ്‌പോർട്ട് തടസ്സമായതെന്നും ഇവർ വ്യക്തമാക്കി.

രണ്ട് വയസ്സുകാരനായ മകൻ കാർട്ടറുടെ പാസ്‌പോർട്ട് പുതുക്കുന്നതിനായി യുദ്ധം തുടങ്ങുന്നതിന് മുൻപ് തന്നെ അപേക്ഷ നൽകിയിരുന്നതായി ഗ്രിഫിത്സ് പറഞ്ഞു. എന്നാൽ വ്യോമപാതയിലുണ്ടായ തടസ്സങ്ങൾ കാരണം രേഖകൾ എത്തുന്നതിൽ കാലതാമസമുണ്ടായി. കനേഡിയൻ കോൺസുലേറ്റ് നേരിട്ടുള്ള സേവനങ്ങൾക്കായി അടച്ചിട്ടിരിക്കുകയാണെന്നും ഗ്രിഫിത്സ് അറിയിച്ചു. കാനഡയിലെ ഗ്ലോബൽ അഫയേഴ്സ് വകുപ്പുമായി പലതവണ ബന്ധപ്പെട്ടെങ്കിലും അടിയന്തര സാഹചര്യത്തിൽ മകന് യാത്ര ചെയ്യാൻ ആവശ്യമായ രേഖകൾ ലഭ്യമാക്കാൻ സാധിച്ചില്ലെന്നും ഇവർ ആരോപിച്ചു.

കാർട്ടറുടെ പാസ്‌പോർട്ട് തപാൽ മാർഗ്ഗം ദോഹയിലെ കനേഡിയൻ എംബസിയിലേക്ക് അയച്ചിട്ടുണ്ടെന്നും എന്നാൽ വ്യോമപാതയിലെ നിയന്ത്രണങ്ങൾ കാരണം ഇത് എന്ന് എത്തുമെന്ന് ഉറപ്പുനൽകാൻ കഴിയില്ലെന്നും ഗ്ലോബൽ അഫയേഴ്സ് കാനഡ സിടിവി ന്യൂസിനോട് വ്യക്തമാക്കിയിരുന്നു. അതേസമയം, മേഖലയിൽ അടിയന്തര കോൺസുലർ സേവനങ്ങളും പാസ്‌പോർട്ട് നടപടികളും ലഭ്യമാണെന്ന് അധികൃതർ പ്രസ്താവനയിൽ അറിയിച്ചു. വ്യോമയാന മേഖല സാധാരണ നിലയിലാകുന്നതോടെ പാസ്‌പോർട്ട് വിതരണത്തിലെ തടസ്സങ്ങൾ നീങ്ങുമെന്നും സർക്കാർ വ്യക്തമാക്കി.

നിലവിലെ അനിശ്ചിതാവസ്ഥ കണക്കിലെടുത്ത് ബ്രിട്ടീഷ് പൗരത്വമുള്ള ഭർത്താവിന്റെ സഹായത്താൽ ബ്രിട്ടീഷ് എംബസിയിൽ നിന്ന് കാർട്ടർക്കായി അടിയന്തര പാസ്‌പോർട്ട് ഗ്രിഫിത്സ് സ്വന്തമാക്കി. നിലവിലെ സാഹചര്യം പരിഗണിച്ച് പ്രത്യേക ഇളവ് നൽകിയാണ് ബ്രിട്ടീഷ് എംബസി ഈ രേഖ നൽകിയത്. ഇത് ഉപയോഗിച്ച് കുടുംബത്തിന് യുകെയിലേക്ക് യാത്ര ചെയ്യാമെങ്കിലും കനേഡിയൻ പാസ്‌പോർട്ട് ഇല്ലാതെ മകന് കാനഡയിൽ പ്രവേശിക്കാൻ കഴിയില്ല. ഒരു കനേഡിയൻ പൗരന് മറ്റ് രാജ്യങ്ങളെ ആശ്രയിക്കേണ്ടി വരുന്നത് നിരാശാജനകമാണെന്ന് ഗ്രിഫിത്സ് പറഞ്ഞു.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla

Son has no passport, war outside; Canadian family stranded in Qatar seeks help from British Embassy