മെൽബൺ: 16 വയസ്സിൽ താഴെയുള്ള കുട്ടികൾക്ക് സോഷ്യൽ മീഡിയ ഉപയോഗിക്കുന്നതിന് നിയന്ത്രണം ഏർപ്പെടുത്തിയുള്ള നിയമം പ്രാബല്യത്തിൽ വന്നതിനുപിന്നാലെ ഓസ്ട്രേലിയയിൽ വ്യാപക നടപടി. നിയമം നടപ്പിലാക്കി ആദ്യ മാസത്തിനുള്ളിൽ മാത്രം ഏകദേശം 47 ലക്ഷം അക്കൗണ്ടുകൾ വിവിധ പ്ലാറ്റ്ഫോമുകളിൽ നിന്നായി നീക്കം ചെയ്തതായി രാജ്യത്തെ ഇന്റർനെറ്റ് റെഗുലേറ്ററായ ഇ-സേഫ്റ്റി (eSafety) കമ്മീഷണർ അറിയിച്ചു. ലോകത്താദ്യമായാണ് ഒരു രാജ്യം ഇത്രയും കർശനമായ സോഷ്യൽ മീഡിയ പ്രായപരിധി നിയമം നടപ്പിലാക്കുന്നത്.
കഴിഞ്ഞ ഡിസംബർ 10-നാണ് ഓസ്ട്രേലിയയിൽ പുതിയ നിയമം നിലവിൽ വന്നത്. ഇതനുസരിച്ച് 16 വയസ്സിൽ താഴെയുള്ളവർക്ക് സോഷ്യൽ മീഡിയ അക്കൗണ്ടുകൾ അനുവദിക്കില്ല. നിയമം ലംഘിക്കുന്ന കമ്പനികൾക്ക് ഏകദേശം 275 കോടി രൂപ വരെ പിഴ ചുമത്താൻ വ്യവസ്ഥയുണ്ട്. എന്നാൽ കുട്ടികൾക്കോ രക്ഷിതാക്കൾക്കോ എതിരെ നിയമനടപടികൾ ഉണ്ടാകില്ല. മെറ്റയുടെ കീഴിലുള്ള ഇൻസ്റ്റാഗ്രാം, ഫേസ്ബുക്ക് എന്നിവയ്ക്ക് പുറമെ യൂട്യൂബ്, ടിക്ടോക്ക്, സ്നാപ്ചാറ്റ്, എക്സ് (X) തുടങ്ങിയ പ്രമുഖ പ്ലാറ്റ്ഫോമുകളെല്ലാം ഈ നിയന്ത്രണത്തിന്റെ പരിധിയിൽ വരുന്നുണ്ട്.
പ്രാഥമിക കണക്കുകൾ പ്രകാരം പത്ത് മുതൽ പതിനാറ് വയസ്സുവരെയുള്ള ഓരോ ഓസ്ട്രേലിയൻ കുട്ടിക്കും ശരാശരി രണ്ട് സോഷ്യൽ മീഡിയ അക്കൗണ്ടുകൾ വീതം ഉണ്ടായിരുന്നു എന്നാണ് ഈ കണക്കുകൾ സൂചിപ്പിക്കുന്നത്. നിയമം നടപ്പിലാക്കുന്നതിന്റെ ഭാഗമായി മെറ്റ മാത്രം 5.5 ലക്ഷം അക്കൗണ്ടുകൾ നീക്കം ചെയ്തിട്ടുണ്ട്. ഭൂരിഭാഗം കമ്പനികളും നിയമത്തോട് സഹകരിക്കുന്നുണ്ടെങ്കിലും, നിരോധനത്തിനെതിരെ ‘റഡിറ്റ്’ (Reddit) കോടതിയെ സമീപിച്ചിട്ടുണ്ട്. എന്നാൽ നിയമം നടപ്പിലാക്കുന്ന കാര്യത്തിൽ വിട്ടുവീഴ്ചയില്ലെന്നാണ് സർക്കാർ നിലപാട്.
പ്രായപരിധി നിശ്ചയിച്ചതോടെ കുട്ടികൾ ചെറിയ ആപ്പുകളിലേക്ക് മാറുന്ന പ്രവണത ശ്രദ്ധയിൽപ്പെട്ടിട്ടുണ്ടെന്നും എന്നാൽ ഇത് താൽക്കാലികം മാത്രമാണെന്നും ഇ-സേഫ്റ്റി കമ്മീഷണർ ജൂലി ഇൻമാൻ ഗ്രാന്റ് പറഞ്ഞു. നിലവിൽ വലിയ മാറ്റങ്ങൾ പ്രകടമാണെങ്കിലും എല്ലാ അക്കൗണ്ടുകളും പൂർണ്ണമായി നീക്കം ചെയ്യാൻ കൂടുതൽ സമയം വേണ്ടിവരുമെന്നും അവർ വ്യക്തമാക്കി. കുട്ടികളുടെ മാനസികാരോഗ്യം സംരക്ഷിക്കുന്നതിന്റെ ഭാഗമായി നടപ്പിലാക്കിയ ഈ പദ്ധതിയുടെ ദീർഘകാല ഫലങ്ങൾ നിരീക്ഷിക്കാൻ വിദഗ്ധ സമിതിയെയും നിയോഗിച്ചിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Social media ban for children; 4.7 million accounts suspended in Australia; Violators face heavy fines
