ന്യൂയോർക്ക്: കുട്ടികളിലും കൗമാരക്കാരിലും സോഷ്യൽ മീഡിയ അടിമത്തം ഉണ്ടാക്കുന്നതുമായി ബന്ധപ്പെട്ട കേസിൽ മെറ്റയ്ക്കും ഗൂഗിളിനുമെതിരെ യുഎസ് കോടതിയുടെ ചരിത്രപരമായ വിധി. 20 വയസ്സുകാരിയായ യുവതി നൽകിയ പരാതിയിൽ പ്ലാറ്റ്ഫോമുകളുടെ മാതൃകമ്പനികൾ ഏകദേശം 6 മില്യൺ ഡോളർ നഷ്ടപരിഹാരം നൽകാനാണ് ലോസ് ഏഞ്ചൽസിലെ കോടതി ഉത്തരവിട്ടത്. ഇതിൽ മെറ്റ 4.2 മില്യൺ ഡോളറും ഗൂഗിൾ 1.8 മില്യൺ ഡോളറും നൽകണം. ആസക്തി ഉളവാക്കുന്ന രീതിയിൽ സോഷ്യൽ മീഡിയ പ്ലാറ്റ്ഫോമുകൾ മനഃപൂർവ്വം നിർമ്മിച്ചുവെന്നും ഇത് യുവതിയുടെ മാനസികാരോഗ്യത്തിന് ഹാനികരമായെന്നും കോടതി കണ്ടെത്തി.
ചെറുപ്പം മുതലുള്ള സോഷ്യൽ മീഡിയ ഉപയോഗം മൂലം കടുത്ത മാനസികാരോഗ്യ പ്രശ്നങ്ങൾ നേരിടുന്നു എന്ന് ചൂണ്ടിക്കാട്ടിയാണ് കാലിഫോർണിയ സ്വദേശിനിയായ യുവതി കോടതിയെ സമീപിച്ചത്. ഇൻസ്റ്റാഗ്രാം, ഫേസ്ബുക്ക്, വാട്ട്സ്ആപ്പ്, യൂട്യൂബ് എന്നിവയുടെ പ്രവർത്തനം ഉപയോക്താക്കളിൽ അടിമത്തം ഉണ്ടാക്കുന്ന രീതിയിലാണെന്ന് ഹർജിയിൽ ആരോപിച്ചിരുന്നു. ഒൻപത് ദിവസങ്ങളിലായി 40 മണിക്കൂറിലധികം നീണ്ട വാദപ്രതിവാദങ്ങൾക്കൊടുവിലാണ് കോടതി വിധി പുറപ്പെടുവിച്ചത്. കുട്ടികളുടെ മനസ്സിനെ ദോഷകരമായി ബാധിക്കുന്നു എന്നറിഞ്ഞിട്ടും പ്ലാറ്റ്ഫോമുകളുടെ രൂപകൽപ്പനയിൽ മാറ്റം വരുത്താൻ കമ്പനികൾ തയ്യാറായില്ലെന്ന് കോടതി നിരീക്ഷിച്ചു.
എന്നാൽ കോടതി വിധിയോട് ബഹുമാനപൂർവ്വം വിയോജിക്കുന്നുവെന്ന് മെറ്റയും ഗൂഗിളും പ്രതികരിച്ചു. കൗമാരക്കാരുടെ മാനസികാരോഗ്യം സങ്കീർണ്ണമായ വിഷയമാണെന്നും അത് കേവലം ആപ്ലിക്കേഷനുകളുടെ ഉപയോഗവുമായി മാത്രം ബന്ധപ്പെട്ടതല്ലെന്നുമാണ് കമ്പനികളുടെ വാദം. ഓരോ കേസും വ്യത്യസ്തമാണെന്നും വരുംദിവസങ്ങളിൽ കോടതിയിൽ ശക്തമായ പ്രതിരോധം തുടരുമെന്നും ഗൂഗിൾ വക്താവ് വ്യക്തമാക്കി. കൗമാരക്കാരെ സംരക്ഷിക്കുന്നതിനുള്ള സുരക്ഷാ മാനദണ്ഡങ്ങളിൽ തങ്ങൾക്ക് ആത്മവിശ്വാസമുണ്ടെന്നും കമ്പനികൾ അറിയിച്ചു. ലോസ് ഏഞ്ചൽസ് കോടതിയുടെ ഈ വിധിക്കെതിരെ അപ്പീൽ നൽകാനാണ് രണ്ട് കമ്പനികളുടെയും തീരുമാനം.
ആഗോള ഡിജിറ്റൽ മേഖലയിൽ വലിയ പ്രത്യാഘാതങ്ങൾ ഉണ്ടാക്കാൻ പോകുന്നതാണ് ഈ വിധിയെന്നാണ് നിയമവിദഗ്ധർ വിലയിരുത്തുന്നത്. സോഷ്യൽ മീഡിയ കമ്പനികളുടെ പ്രവർത്തനരീതിയെയും അവ കുട്ടികളുടെ മാനസികാരോഗ്യത്തിൽ ചെലുത്തുന്ന സ്വാധീനത്തെയും കുറിച്ച് ആഗോളതലത്തിൽ വലിയ ചർച്ചകൾക്ക് ഈ വിധി വഴിയൊരുക്കിയിട്ടുണ്ട്. മറ്റ് രാജ്യങ്ങളിലും സമാനമായ പരാതികളുമായി കൂടുതൽ ആളുകൾ രംഗത്തെത്താൻ ഈ വിധി കാരണമായേക്കാം. പ്ലാറ്റ്ഫോമുകളുടെ സുരക്ഷിതത്വവും ഉത്തരവാദിത്തവും സംബന്ധിച്ച പുതിയ നിയമനിർമ്മാണങ്ങൾക്കും ഈ വിധി പ്രേരണയായേക്കും.
Social media addiction: US court fines tech giants Meta and Google $6 million
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
