സെന്റ് ജോൺസ്: അവലോൺ പെനിൻസുല മുതൽ ക്ലാരൻവിൽ വരെയുള്ള മേഖലകളിൽ കനത്ത മഞ്ഞുവീഴ്ചയെത്തുടർന്ന് തിങ്കളാഴ്ച വിദ്യാലയങ്ങൾ അടച്ചിട്ടു. കഴിഞ്ഞ രാത്രി ആരംഭിച്ച ശക്തമായ മഞ്ഞുവീഴ്ചയെത്തുടർന്ന് ജനജീവിതം തടസ്സപ്പെട്ട പശ്ചാത്തലത്തിലാണ് നടപടി. മേഖലയിൽ ശീതകാല കൊടുങ്കാറ്റ് മുന്നറിയിപ്പ് (Winter storm warning) ഇപ്പോഴും തുടരുകയാണ്.
സെന്റ് ജോൺസ് നഗരത്തിൽ മാത്രം കഴിഞ്ഞ രാത്രി 12 സെന്റിമീറ്ററോളം മഞ്ഞ് വീണതായി എൻവയോൺമെന്റ് കാനഡ റിപ്പോർട്ട് ചെയ്തു. തിങ്കളാഴ്ച രാവിലെ രണ്ട് മുതൽ നാല് സെന്റിമീറ്റർ വരെ കൂടുതൽ മഞ്ഞ് വീഴാൻ സാധ്യതയുണ്ടെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ കണക്കുകൂട്ടൽ. മണിക്കൂറിൽ 60 കിലോമീറ്റർ വേഗതയിൽ വീശുന്ന കാറ്റും കാഴ്ചാപരിധി കുറഞ്ഞതും മഞ്ഞ് നീക്കം ചെയ്യുന്ന നടപടികൾക്ക് വെല്ലുവിളിയാകുന്നുണ്ട്.
മഞ്ഞുവീഴ്ചയെത്തുടർന്ന് മേഖലയിലെ പൊതുഗതാഗത സംവിധാനങ്ങളും തപാൽ സേവനങ്ങളും തടസ്സപ്പെട്ടു. സെന്റ് ജോൺസിലെ മെട്രോ ബസ്, ഗോ ബസ് സർവീസുകൾ രാവിലെ നിർത്തിവെച്ചെങ്കിലും ഉച്ചയ്ക്ക് 1.30-ഓടെ സർവീസുകൾ പുനരാരംഭിക്കുമെന്ന് അധികൃതർ അറിയിച്ചു. സുരക്ഷാ കാരണങ്ങളാൽ അവലോൺ പെനിൻസുലയിൽ തപാൽ വിതരണം കാനഡ പോസ്റ്റ് താൽക്കാലികമായി നിർത്തിവെച്ചിരിക്കുകയാണ്.
വിമാന ഗതാഗതത്തെയും കാലാവസ്ഥാ വ്യതിയാനം സാരമായി ബാധിച്ചു. സെന്റ് ജോൺസ് അന്താരാഷ്ട്ര വിമാനത്താവളത്തിൽ നിന്നുള്ള നിരവധി വിമാനങ്ങൾ റദ്ദാക്കുകയോ സമയം മാറ്റുകയോ ചെയ്തു. വിദ്യാലയങ്ങൾക്ക് പുറമെ മെമ്മോറിയൽ സർവകലാശാലയുടെ ക്യാമ്പസുകളും സെന്റ് ജോൺസിലെ നാല് കോടതികളും തിങ്കളാഴ്ച പ്രവർത്തിക്കില്ലെന്ന് ഔദ്യോഗിക അറിയിപ്പുണ്ടായിരുന്നു.
റോഡുകളിലെ മഞ്ഞ് നീക്കം ചെയ്ത് ഗതാഗതം പുനഃസ്ഥാപിക്കാനുള്ള ശ്രമങ്ങൾ പുരോഗമിക്കുകയാണ്. മഞ്ഞ് വീഴാൻ സാധ്യതയുള്ളതിനാൽ ജനങ്ങൾ ജാഗ്രത പാലിക്കണമെന്നും അത്യാവശ്യ യാത്രകൾക്ക് മാത്രം പുറത്തിറങ്ങണമെന്നും പ്രാദേശിക ഭരണകൂടം നിർദ്ദേശിച്ചു.
snow-storm-jan
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
