നോവ സ്കോഷ്യയിലെ കേപ് ബ്രെട്ടണിൽ വീടിന് നേരെ വെടിവെപ്പ്. സംഭവത്തിൽ പോലീസ് അന്വേഷണം ആരംഭിച്ചു. ന്യൂ വാട്ടർഫോർഡിലെ എട്ടാം സ്ട്രീറ്റിലുള്ള ഒരു വീടിന് നേരെയാണ് വെടിവെപ്പുണ്ടായത്. ശനിയാഴ്ച പുലർച്ചെ 4 മണിയോടെ വെടിയൊച്ച കേട്ടതിനെത്തുടർന്ന് വീട്ടുടമസ്ഥരാണ് പോലീസിനെ വിവരമറിയിച്ചത്. വെടിയുണ്ടകൾ തുളഞ്ഞുകയറിയ പാടുകൾ വീട്ടിൽ പോലീസ് കണ്ടെത്തി.
സംഭവത്തിൽ ആർക്കും പരിക്കേറ്റിട്ടില്ല. സ്ഥലത്തെത്തിയ പോലീസ് വീട്ടുടമസ്ഥരുമായി സംസാരിക്കുകയും, സമീപപ്രദേശങ്ങളിൽ അന്വേഷണം നടത്തുകയും, തെളിവുകൾ ശേഖരിക്കുകയും ചെയ്തു. ഇതൊരു യാദൃച്ഛികമായ സംഭവമല്ലെന്നാണ് പ്രാഥമിക അന്വേഷണത്തിൽ നിന്നും മനസ്സിലാക്കുന്നത് എന്ന് കേപ് ബ്രെട്ടൺ റീജിയണൽ പോലീസ് സർവീസ് (സിബിആർപിഎസ്) അറിയിച്ചു.
ഈ സംഭവത്തിൽ ഉൾപ്പെട്ട ആളുകൾക്ക് പരസ്പരം പരിചയമുണ്ടായിരിക്കാമെന്നും പോലീസ് പറയുന്നു. സംഭവത്തിൽ ഇതുവരെ ആരെയും അറസ്റ്റ് ചെയ്തിട്ടില്ല. ഈ സംഭവത്തെക്കുറിച്ച് എന്തെങ്കിലും വിവരങ്ങളോ അല്ലെങ്കിൽ സിസിടിവി ദൃശ്യങ്ങളോ ലഭിക്കുന്നവർ 902-563-5151 എന്ന നമ്പറിൽ പോലീസിനെ നേരിട്ടോ അല്ലെങ്കിൽ 1-800-222-8477 എന്ന നമ്പറിൽ ക്രൈം സ്റ്റോപ്പേഴ്സിനെയോ ബന്ധപ്പെടണമെന്ന് പോലീസ് അഭ്യർത്ഥിച്ചു.
Shots fired at home in Cape Breton; Police intensify investigation
