ചില്ലിവാക്ക്: ബ്രിട്ടീഷ് കൊളംബിയയിലെ ചില്ലിവാക്കിൽ ഞായറാഴ്ച രാവിലെ നടന്ന വെടിവെപ്പിൽ ഒരാൾ കൊല്ലപ്പെടുകയും മറ്റൊരാൾക്ക് ഗുരുതരമായി പരിക്കേൽക്കുകയും ചെയ്തു.ഞായറാഴ്ച രാവിലെ 08:30-യോടെ മെല്ലാർഡ് അവന്യൂവിലെ ഒരു വസതിയിലായിരുന്നു സംഭവം. വെടിയൊച്ച കേട്ടെന്ന വിവരത്തെത്തുടർന്ന് സ്ഥലത്തെത്തിയ റോയൽ കനേഡിയൻ മൗണ്ടഡ് പോലീസ് (RCMP), വീടിനുള്ളിൽ വെടിയേറ്റ നിലയിൽ രണ്ടുപേരെ കണ്ടെത്തുകയായിരുന്നു. ഇതിൽ ഒരാൾ സംഭവസ്ഥലത്തുതന്നെ മരണമടഞ്ഞതായി പോലീസ് സ്ഥിരീകരിച്ചു.
സംഭവത്തെത്തുടർന്ന് മെല്ലാർഡ് അവന്യൂവും പരിസരപ്രദേശങ്ങളും പോലീസ് വളയുകയും സുരക്ഷാ നടപടികളുടെ ഭാഗമായി ഇവിടേക്കുള്ള ഗതാഗതം നിയന്ത്രിക്കുകയും ചെയ്തു. കേസ് അന്വേഷണം പ്രത്യേക വിഭാഗമായ ഇന്റഗ്രേറ്റഡ് ഹോമിസൈഡ് ഇൻവെസ്റ്റിഗേഷൻ ടീമിന് (IHIT) കൈമാറിയിട്ടുണ്ട്. ആക്രമണത്തിന് പിന്നിലെ പ്രകോപനത്തെക്കുറിച്ചോ പ്രതികളെക്കുറിച്ചോ ഉള്ള വിവരങ്ങൾ പോലീസ് നിലവിൽ പുറത്തുവിട്ടിട്ടില്ല. ഫ്രേസർ വാലി മേഖലയിൽ വർദ്ധിച്ചുവരുന്ന തോക്ക് അക്രമങ്ങളിൽ പ്രദേശവാസികൾക്കിടയിൽ വലിയ ആശങ്ക നിലനിൽക്കുന്നുണ്ട്. അക്രമത്തെക്കുറിച്ച് അറിവുള്ളവർ ഉടൻ തന്നെ പോലീസുമായി ബന്ധപ്പെടണമെന്ന് അധികൃതർ അഭ്യർത്ഥിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Shooting in Chilliwack BC: One person killed, another seriously injured
