ടൊറന്റോയിലെ സ്കാർബറോ ടൗൺ സെന്റർ ഷോപ്പിംഗ് മാളിൽ നടന്ന വെടിവെപ്പിൽ ഒരാൾക്ക് ദാരുണാന്ത്യം. ഇന്ന് (വ്യാഴാഴ്ച) ഉച്ചയ്ക്ക് 1:51-നാണ് സംഭവം. വെടിയേറ്റതായി പോലീസിന് വിവരം ലഭിച്ചതിനെ തുടർന്ന് സ്ഥലത്തെത്തിയ ഉദ്യോഗസ്ഥർ ഗുരുതരമായി പരിക്കേറ്റ ഒരാളെ കണ്ടെത്തുകയായിരുന്നു. ഉടൻ തന്നെ വൈദ്യസഹായം നൽകിയെങ്കിലും ജീവൻ രക്ഷിക്കാനായില്ലെന്ന് പോലീസ് അറിയിച്ചു.
മരിച്ചയാളുടെ വിവരങ്ങൾ പോലീസ് ഇതുവരെ പുറത്തുവിട്ടിട്ടില്ല. ആക്രമിയെക്കുറിച്ചുള്ള വിവരങ്ങളും ലഭ്യമായിട്ടില്ല. സംഭവസ്ഥലത്തും പരിസരത്തും പോലീസ് സുരക്ഷ ശക്തമാക്കിയിട്ടുണ്ട്. പ്രതിയെ കണ്ടെത്താനുള്ള അന്വേഷണം പുരോഗമിക്കുകയാണ്.
കഴിഞ്ഞ കുറച്ചുവർഷങ്ങളായി വെടിവെപ്പുമായി ബന്ധപ്പെട്ട അക്രമങ്ങൾ വർധിച്ചുവരുന്നതായി സ്റ്റാറ്റ്കാൻ (StatCan) റിപ്പോർട്ടുകൾ സൂചിപ്പിക്കുന്നു.
ഈ പശ്ചാത്തലത്തിൽ, ടൊറന്റോയിലെ തിരക്കേറിയ ഒരു മാളിൽ പട്ടാപ്പകൽ നടന്ന ഈ സംഭവം നഗരവാസികളിൽ വലിയ ആശങ്ക സൃഷ്ടിച്ചിട്ടുണ്ട്. സംഭവത്തെക്കുറിച്ച് കൂടുതൽ വിവരങ്ങൾ ലഭിക്കുന്നതിനായി പോലീസ് അന്വേഷണം ഊർജ്ജിതമാക്കി. പൊതുജനങ്ങൾക്ക് എന്തെങ്കിലും വിവരം ലഭിക്കുകയാണെങ്കിൽ പോലീസുമായി ബന്ധപ്പെടണമെന്ന് അധികൃതർ അഭ്യർത്ഥിച്ചു.
Shooting at Toronto shopping mall; One dead, police intensify investigation
