അന്താരാഷ്ട്ര വിദ്യാർത്ഥികൾക്ക് തിരിച്ചടി; പി.ജി.ഡബ്ല്യൂ.പി പഠന മേഖലകൾ പരിഷ്ക്കരിച്ച് കാനഡ

കാനഡയിലെ അതിവേഗം മാറുന്ന തൊഴിൽ വിപണിയുടെ ആവശ്യങ്ങൾ കണക്കിലെടുത്ത്, ഇമിഗ്രേഷൻ, റിഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) പോസ്റ്റ്-ഗ്രാജുവേഷൻ വർക്ക് പെർമിറ്റ് (PGWP) അർഹതയ്ക്കുള്ള പഠന മേഖലകളിൽ വലിയ മാറ്റങ്ങൾ പ്രഖ്യാപിച്ചു. 2025 ജൂൺ 25 മുതലാണ് ഈ മാറ്റങ്ങൾ പ്രാബല്യത്തിൽ വരുന്നത്.

പുതിയ പ്രഖ്യാപനം അനുസരിച്ച്, 119 പുതിയ പഠന മേഖലകൾക്ക് പി.ജി.ഡബ്ല്യു.പി. അർഹത ലഭിക്കുമ്പോൾ, 178 പഠന മേഖലകളെ പി.ജി.ഡബ്ല്യു.പി. പട്ടികയിൽ നിന്ന് നീക്കം ചെയ്തിട്ടുണ്ട്. ബിരുദ, മാസ്റ്റർസ്, ഡോക്ടറൽ ഡിഗ്രികൾക്ക് കീഴിൽ വരാത്ത നോൺ-ഡിഗ്രി പ്രോഗ്രാമുകളിൽ പഠിക്കുന്ന അന്താരാഷ്ട്ര വിദ്യാർത്ഥികളെയാണ് ഈ മാറ്റങ്ങൾ പ്രധാനമായും ബാധിക്കുക. പ്രത്യേകിച്ച്, 2024 നവംബർ 1-ന് ശേഷം സ്റ്റഡി പെർമിറ്റിന് അപേക്ഷിച്ചവർക്കാണ് പുതിയ നിയമങ്ങൾ ബാധകമാകുന്നത്. എന്നാൽ, 2025 ജൂൺ 25-ന് മുമ്പ് അപേക്ഷിച്ചവർക്ക് പഴയ പട്ടികയിലെ അർഹത തുടരും.

പി.ജി.ഡബ്ല്യു.പി.-യ്ക്ക് പുതുതായി അർഹത ലഭിച്ച പഠന മേഖലകളിൽ ആരോഗ്യ പരിചരണവും, സാമൂഹിക സേവനങ്ങളും, വിദ്യാഭ്യാസം (പ്രധാനമായി ടീച്ചർ ട്രെയിനിങ് കോഴ്സുകൾ), വിവിധ ട്രേഡുകൾ (ഉദാഹരണത്തിന്, കൺസ്ട്രക്ഷൻ മാനേജ്‌മെൻ്റ്, കാബിനറ്റ് മേക്കിംഗ്, സി.എൻ.സി. മെഷീനിസ്റ്റ്) എന്നിവ ഉൾപ്പെടുന്നു. കൂടാതെ, വെറ്ററിനറി മെഡിസിൻ, ഡെന്റൽ സയൻസ്, ഓറൽ പാത്തോളജി തുടങ്ങിയ ആരോഗ്യ മേഖലകളും, ആർക്കിടെക്ചർ മേഖലയിലെ പി.എച്ച്.ഡി. വരെയുള്ള പഠനങ്ങളും പുതുതായി ഉൾപ്പെടുത്തിയിട്ടുണ്ട്.

അതേസമയം, പി.ജി.ഡബ്ല്യു.പി. അർഹത പട്ടികയിൽ നിന്ന് നീക്കം ചെയ്ത മേഖലകളിൽ ‘ട്രാൻസ്പോർട്ട്’ വിഭാഗത്തിലെ മുഴുവൻ പ്രോഗ്രാമുകളും ഉൾപ്പെടുന്നു. കൃഷിയും അഗ്രി-ഫുഡ് മേഖലയും, റിന്യൂവബിൾ എനർജി, ഇലക്ട്രിക്കൽ ഇൻസ്റ്റാളേഷൻ തുടങ്ങിയ പ്രോഗ്രാമുകളും വലിയ തോതിൽ പട്ടികയിൽ നിന്ന് പുറത്തായി. ഇനി ഈ മേഖലയിൽ ഒന്ന് മാത്രമാണ് അർഹതയുള്ളതായി നിലനിൽക്കുന്നത്.

ഭാഷാ നിബന്ധനകളും വ്യക്തമാക്കിയിട്ടുണ്ട്. പി.ജി.ഡബ്ല്യു.പി.-യ്ക്ക് അർഹതയുള്ളവരാകാൻ, പഠന നിലക്കനുസരിച്ച് ഇംഗ്ലീഷ് അല്ലെങ്കിൽ ഫ്രഞ്ച് ഭാഷാ പരിജ്ഞാനം തെളിയിക്കേണ്ടതുണ്ട്. കോളേജ് ഡിഗ്രി, യൂണിവേഴ്‌സിറ്റി ബിരുദം, മാസ്റ്റർസ്, പി.എച്ച്.ഡി. എന്നിവയ്ക്ക് സി.എൽ.ബി. 7 (CLB 7) ലെവൽ ഭാഷാ യോഗ്യതയുണ്ടെങ്കിൽ പി.ജി.ഡബ്ല്യു.പി. അർഹതയെ ബാധിക്കില്ല. എന്നാൽ മറ്റ് യൂണിവേഴ്‌സിറ്റി പ്രോഗ്രാമുകൾക്ക് സി.എൽ.ബി. 7 ഉം, കോളേജ്/നോൺ-യൂണിവേഴ്‌സിറ്റി പ്രോഗ്രാമുകൾക്ക് സി.എൽ.ബി. 5 ഉം ആവശ്യമാണ്, അതോടൊപ്പം അർഹത പട്ടികയിലെ വിഷയത്തിൽ ഗ്രാജുവേറ്റ് ആയിരിക്കണം. പി.ജി.ഡബ്ല്യു.പി.-യ്ക്ക് അർഹതയുള്ള ഫ്ലൈറ്റ് സ്കൂളുകളിൽ നിന്ന് ബിരുദം നേടിയവർക്ക് ഭാഷാ നിബന്ധനകളിൽ ഇളവുണ്ട്.

എക്സ്പ്രസ് എൻട്രി സംവിധാനവുമായും ഈ മാറ്റങ്ങൾക്ക് കാര്യമായ ബന്ധമുണ്ട്. പി.ജി.ഡബ്ല്യു.പി. അർഹതയും എക്സ്പ്രസ് എൻട്രി റാങ്കിംഗും ഐ.ആർ.സി.സി.യുടെ മേൽനോട്ടത്തിലാണ്. കാനഡയിലെ തൊഴിൽ വിപണിയുടെ ആവശ്യങ്ങൾക്കനുസരിച്ച് രണ്ട് സംവിധാനങ്ങളിലും മാറ്റങ്ങൾ വരുത്തുന്നതിനാൽ, പി.ജി.ഡബ്ല്യു.പി. അർഹതാ പട്ടികയിലെ മാറ്റങ്ങൾ എക്സ്പ്രസ് എൻട്രിക്ക് പ്രാധാന്യമുള്ള ജോലികളുമായി അടുത്ത ബന്ധം പുലർത്തുന്നു.