ഒട്ടാവ: ഫെഡറൽ ഫണ്ടിങ്ങിലുണ്ടായ വൻ കുറവിനെത്തുടർന്ന് ഗ്രേറ്റർ ടൊറന്റോ മേഖലയിലെ (GTA) കുടിയേറ്റ സേവന കേന്ദ്രങ്ങൾ അടച്ചു പൂട്ടൽ ഭീഷണി നേരിടുന്നതായി റിപ്പോർട്ട്. യുണൈറ്റഡ് വേ ഗ്രേറ്റർ ടൊറന്റോ ഉൾപ്പെടെയുള്ള സംഘടനകൾ നടത്തിയ സർവേ പ്രകാരം, പകുതിയോളം കുടിയേറ്റ സേവന പദ്ധതികൾ വരും മാസങ്ങളിൽ പ്രവർത്തനം നിർത്തേണ്ടി വരും. സർക്കാർ ധനസഹായം വെട്ടിക്കുറച്ചതോടെ നഗരത്തിലെ 44 ശതമാനം ഏജൻസികളും പദ്ധതികൾ പൂർണ്ണമായി അവസാനിപ്പിക്കുമെന്നും ബാക്കിയുള്ളവർ സേവനങ്ങളിൽ വലിയ നിയന്ത്രണങ്ങൾ ഏർപ്പെടുത്തുമെന്നും അറിയിച്ചു.
ഭാഷാ പരിശീലനം, തൊഴിൽ സഹായം, താമസസൗകര്യം എന്നിവ ഉറപ്പാക്കുന്ന പദ്ധതികളെയാണ് ഈ പ്രതിസന്ധി പ്രധാനമായും ബാധിക്കുന്നത്. ഉയർന്ന തലത്തിലുള്ള ഭാഷാ പരിജ്ഞാനം ലഭിക്കാത്തത് പുതുതായി എത്തുന്നവർക്ക് ജോലി കണ്ടെത്താൻ തടസ്സമാകുമെന്ന് പീൽ ന്യൂകമർ സ്ട്രാറ്റജി ഗ്രൂപ്പ് ഡയറക്ടർ ജെസിക്ക ക്വിക് ചൂണ്ടിക്കാട്ടി. വരുമാനം കുറയുന്നതോടെ കുടുംബങ്ങളുടെ ജീവിതസാഹചര്യങ്ങൾ മോശമാകാനും ഇത് കാരണമാകും. നിലവിൽ മൂന്ന് ലക്ഷത്തോളം അഭയ അപേക്ഷകൾ തീർപ്പാക്കാതെ കിടക്കുമ്പോഴാണ് സേവന മേഖലയിലെ ഈ പിൻവാങ്ങൽ എന്നത് സ്ഥിതി സങ്കീർണ്ണമാക്കുന്നു.
ഫെഡറൽ ബജറ്റിൽ വരുത്തിയ 317.3 മില്യൺ ഡോളറിന്റെ കുറവാണ് നിലവിലെ പ്രതിസന്ധിക്ക് കാരണം. കുടിയേറ്റക്കാരുടെ എണ്ണം കുറയ്ക്കാനുള്ള സർക്കാരിന്റെ പുതിയ നയത്തെത്തുടർന്ന് സെറ്റിൽമെന്റ് ഏജൻസികൾക്കുള്ള വിഹിതവും വെട്ടിക്കുറയ്ക്കുകയായിരുന്നു. ഇത് 2028-ഓടെ ഈ മേഖലയിൽ 300-ലധികം പേരുടെ ജോലി നഷ്ടപ്പെടാൻ ഇടയാക്കും. സേവനങ്ങൾക്കായി എത്തുന്നവരുടെ എണ്ണത്തിൽ 70 ശതമാനം വർധനവുണ്ടായെങ്കിലും അതിനനുസരിച്ചുള്ള സൗകര്യങ്ങൾ ഒരുക്കാൻ സാധിക്കാത്തത് രാജ്യത്തിന്റെ സാമൂഹിക ക്ഷേമത്തെ ബാധിക്കുമെന്ന് ഗവേഷണ ഡയറക്ടർ സ്റ്റെഫനി പ്രോസിക് മുന്നറിയിപ്പ് നൽകി.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
Funding cuts: Setback for immigrants in Toronto; Service projects in crisis
