ക്രെഡിറ്റ് കാർഡ് വിവരങ്ങൾ ചോർത്താൻ പുതിയ വഴി; മലയാളികളും സൂക്ഷിക്കുക, കാനഡയിൽ ‘ബ്രെഡ് കേസ്’ നഷ്ടപരിഹാരത്തിന്റെ പേരിൽ വ്യാപക തട്ടിപ്പ്!

ടൊറന്റോ: കാനഡയിൽ അടുത്തകാലത്ത് ഏറെ ചർച്ചയായ ബ്രെഡ് വില ഒത്തുകളി കേസിലെ (Bread Price-Fixing Case) വൻ തുകയുടെ നഷ്ടപരിഹാരം വാഗ്ദാനം ചെയ്ത് വ്യാപക തട്ടിപ്പ്. കേസിലെ ഗുണഭോക്താക്കൾക്ക് പണം ഉടൻ ലഭിക്കുമെന്ന വ്യാജേന മൊബൈൽ ഫോണുകളിലേക്ക് എത്തുന്ന വ്യാജ സന്ദേശങ്ങളാണ് (Phishing Texts) പുതിയ കെണിയായി മാറിയിരിക്കുന്നത്. നഷ്ടപരിഹാര തുകയായ 182 ഡോളർ ക്രെഡിറ്റ് ചെയ്യാനെന്ന പേരിൽ എത്തുന്ന ലിങ്കുകളിൽ ക്ലിക്ക് ചെയ്യുന്നവരുടെ ബാങ്ക്, ക്രെഡിറ്റ് കാർഡ് വിവരങ്ങളാണ് തട്ടിപ്പുകാർ ഇതിലൂടെ ചോർത്തുന്നത്.

കാനഡയിലെ ഒന്റാറിയോ സ്വദേശിയായ എലിസബത്ത് ഹാഡോക്ക് എന്ന 56-കാരിക്ക് ലഭിച്ച ഒരു വ്യാജ സന്ദേശത്തോടെയാണ് ഈ തട്ടിപ്പിന്റെ വ്യാപ്തി പുറംലോകം അറിയുന്നത്. നഷ്ടപരിഹാരത്തിന് അർഹതയുണ്ടോ എന്ന് പരിശോധിക്കാൻ ഏപ്രിൽ ഒന്നിന് മുൻപ് ലിങ്കിൽ കയറി ഫോം പൂരിപ്പിക്കണം എന്നായിരുന്നു ഹാഡോക്കിന് ലഭിച്ച നിർദ്ദേശം. മാസങ്ങൾക്ക് മുൻപ് ഈ കേസിൽ നഷ്ടപരിഹാരത്തിനായി രജിസ്റ്റർ ചെയ്തതുകൊണ്ട് തന്നെ അവർ ലിങ്കിൽ ക്ലിക്ക് ചെയ്യുകയും ചെയ്തു.

കേസിനെക്കുറിച്ചുള്ള കൃത്യമായ വിവരങ്ങൾ അടങ്ങിയ വെബ്‌സൈറ്റിൽ തുക കൈപ്പറ്റാനായി ബാങ്ക് കാർഡ് വിവരങ്ങൾ ചോദിച്ചതോടെയാണ് ഇതൊരു വലിയ സാമ്പത്തിക തട്ടിപ്പാണെന്ന് അവർക്ക് ബോധ്യപ്പെട്ടത്. ഹാഡോക്കിന്റെ പരാതിക്ക് പിന്നാലെ കനേഡിയൻ ആന്റി ഫ്രോഡ് സെന്റർ (CAFC) നടത്തിയ അന്വേഷണത്തിൽ സമാനമായ നിരവധി പരാതികൾ ഇതിനോടകം റിപ്പോർട്ട് ചെയ്തിട്ടുണ്ട്. ഇതിൽ നാല് പേർക്ക് തങ്ങളുടെ ക്രെഡിറ്റ് കാർഡ് വിവരങ്ങൾ നഷ്ടമായിക്കഴിഞ്ഞു.

കാനഡയിലെ പ്രമുഖ ബ്രെഡ് നിർമ്മാതാക്കളായ ലോബ്ലോ കമ്പനീസ് ലിമിറ്റഡ്, ജോർജ്ജ് വെസ്റ്റൺ ലിമിറ്റഡ് എന്നിവർക്കെതിരെയുള്ള 50 കോടി ഡോളറിന്റെ ഈ നഷ്ടപരിഹാര കേസ് നടത്തുന്ന പ്രമുഖ നിയമ സ്ഥാപനമായ ‘സ്ട്രോസ്ബെർഗ് വിംഗ്ഫീൽഡ് സാസ്സോ എൽഎൽപി’ വിഷയത്തിൽ റോയൽ കനേഡിയൻ മൗണ്ടഡ് പൊലീസുമായി (RCMP) ചേർന്ന് അന്വേഷണം ആരംഭിച്ചിട്ടുണ്ട്.

ഈ കേസിൽ നഷ്ടപരിഹാരത്തിനായി അപേക്ഷിക്കാനുള്ള ഔദ്യോഗിക സമയം കഴിഞ്ഞ വർഷം ഡിസംബറിൽ അവസാനിച്ചതാണെന്ന് കേസിന്റെ ഔദ്യോഗിക അഡ്മിനിസ്ട്രേറ്റർമാരായ ‘വെരിറ്റ’ (Verita) വ്യക്തമാക്കിയിട്ടുണ്ട്. അർഹരായ ആളുകൾക്ക് ഏപ്രിൽ മാസം മുതൽ തുക അക്കൗണ്ടുകളിലേക്ക് നേരിട്ടോ ചെക്കുകളായോ അയച്ചു തുടങ്ങുമെന്നും, എന്നാൽ ഇതിനായി ഗുണഭോക്താക്കൾക്ക് യാതൊരുവിധ മൊബൈൽ സന്ദേശങ്ങളും അയക്കില്ലെന്നും അധികൃതർ മുന്നറിയിപ്പ് നൽകുന്നു.

ഒറിജിനൽ വെബ്‌സൈറ്റിന്റെ സമാനമായ പേരുകളിൽ വ്യാജ വെബ്‌സൈറ്റുകൾ നിർമ്മിച്ചാണ് ഇത്തരം ഓൺലൈൻ ലിങ്കുകൾ പ്രചരിക്കുന്നത്. ഇത്തരത്തിൽ എത്തുന്ന ഒരു സന്ദേശങ്ങളോടും പ്രതികരിക്കരുതെന്നും വ്യക്തിഗത വിവരങ്ങൾ കൈമാറരുതെന്നും കാനഡയിലെ സുരക്ഷാ ഏജൻസികൾ കർശന നിർദ്ദേശം നൽകിയിട്ടുണ്ട്.

scam-bread-price-fixing-lawsuit

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt