‘മോഹൻലാൽ ഒരിക്കലും പറയില്ല, എൻ്റെ മകൻ ചതിച്ചെന്ന്’! മല്ലിക സുകുമാരൻ പറയുന്നു

അഭിനേത്രി മല്ലിക സുകുമാരൻ വീണ്ടും ‘എമ്പുരാൻ’ സിനിമയുമായി ബന്ധപ്പെട്ട് ഉയർന്ന വിവാദങ്ങളെക്കുറിച്ച് പ്രതികരിച്ചു. രാഷ്ട്രീയം പ്രമേയമാക്കുന്ന സിനിമകൾ മുമ്പും മലയാളത്തിൽ ഉണ്ടായിട്ടുണ്ടെന്നും, എന്നാൽ തങ്ങളുടെ സിനിമയ്ക്കെതിരെ ഉയർന്ന വിമർശനങ്ങൾക്ക് പിന്നിൽ രാഷ്ട്രീയ ലക്ഷ്യങ്ങളാണുള്ളതെന്നുമാണ് മല്ലിക സുകുമാരൻ വ്യക്തമാക്കുന്നത്. തന്റെ പുതിയ ചിത്രമായ ‘വത്സല ക്ലബ്ബിന്റെ’ വിശേഷങ്ങൾ പങ്കുവെക്കുന്നതിനിടെ സൈന സൗത്ത് ലൈവ് യൂട്യൂബ് ചാനലിന് നൽകിയ അഭിമുഖത്തിലാണ് അവർ ഇക്കാര്യം തുറന്നുപറഞ്ഞത്. ചില രാഷ്ട്രീയ പാർട്ടികൾ ‘എമ്പുരാൻ’ എന്ന സിനിമയുടെ ആശയം ഇതാണെന്ന് ദുർവ്യാഖ്യാനം ചെയ്ത് മറ്റുള്ളവരിലേക്ക് കുത്തിവെക്കുകയായിരുന്നുവെന്നും, വേലുത്തമ്പി ദളവ പോലുള്ള സിനിമകൾ മുൻപ് ഇവിടെ വന്നിട്ടുള്ള കാര്യവും അവർ ഓർമ്മിപ്പിച്ചു.

മകൻ പൃഥ്വിരാജിനെതിരെയുള്ള അനാവശ്യ ട്രോളുകളിലും തെറ്റിദ്ധാരണകളിലും തനിക്ക് വിഷമമുണ്ടായതായും മല്ലിക സുകുമാരൻ പറഞ്ഞു. ട്രോളുകൾക്ക് പിന്നിൽ വ്യക്തമായ ലക്ഷ്യങ്ങളുള്ള ചിലരുണ്ടെന്നും അവർ ആരോപിച്ചു. എന്നാൽ, തന്നെ ട്രോളിയവരോട് വിരോധമില്ലെന്നും, ചെമ്പിൽ കൊണ്ടുപോയ വിഷയം ട്രോളുകൾ കാരണമാണ് പരിഹരിക്കപ്പെട്ടതെന്നും അവർ കൂട്ടിച്ചേർത്തു. ഈയിടെ ഒരു യൂട്യൂബ് ചാനലിൽ ഒരാൾ, തന്റെ മകൻ മോഹൻലാലിനെ ചതിച്ചു എന്ന് പറഞ്ഞതിനോടുള്ള പ്രതികരണവും അഭിമുഖത്തിൽ ശ്രദ്ധേയമായി. മോഹൻലാൽ ഒരിക്കലും അങ്ങനെ പറയില്ലെന്നും, സ്റ്റാമ്പ് പേപ്പറിൽ എഴുതി നൽകാൻ താൻ തയ്യാറാണെന്നും, അത്രയേറെ ആഴത്തിലുള്ള ബന്ധമാണ് തങ്ങൾ തമ്മിലുള്ളതെന്നും അവർ വ്യക്തമാക്കി.

മലയാള സിനിമയിലെ രാഷ്ട്രീയപരമായ ചുറ്റുപാടുകളെക്കുറിച്ചുള്ള സിനിമകളെ മുൻപ് എല്ലാവരും കലയായി മാത്രമാണ് കണ്ടതെന്നും, ഇപ്പോൾ മതവും ജാതിയും നോക്കാതെ എല്ലാവരും ഒറ്റക്കെട്ടായി പ്രതികരിച്ചാൽ ഈ പ്രശ്നങ്ങൾ പരിഹരിക്കാമെന്നും മല്ലിക സുകുമാരൻ അഭിപ്രായപ്പെട്ടു. കമന്റുകൾക്ക് മറുപടി നൽകാനോ നുണ പറയാനോ പൃഥ്വിരാജിന് സമയമില്ലാത്തത് അവനെ അറിയുന്ന എല്ലാവർക്കും അറിയാവുന്ന കാര്യമാണ്. വിപിൻ ദാസ് നിർമ്മിച്ച ‘വ്യസനസമേതം ബന്ധുമിത്രാദികൾ’ എന്ന ചിത്രത്തിലാണ് മല്ലിക സുകുമാരൻ അവസാനമായി അഭിനയിച്ചത്. കൂടാതെ, പൃഥ്വിരാജ് സംവിധാനം ചെയ്ത ‘ബ്രോ ഡാഡി’യിൽ മോഹൻലാലിന്റെ അമ്മ വേഷം തനിക്ക് ഏറെ പ്രിയപ്പെട്ടതാണെന്നും അഭിമുഖത്തിൽ അവർ പറഞ്ഞു.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

'Mohanlal will never say that my son cheated'! Says Mallika Sukumaran