അഭയമില്ലാതെ ആയിരങ്ങൾ; സസ്‌കാറ്റൂണിൽ ഭവനരഹിതരുടെ എണ്ണത്തിൽ വൻ വർധനവ്, ഞെട്ടിക്കുന്ന കണക്കുകൾ പുറത്ത്

സസ്‌കാറ്റൂൺ: സസ്‌കാറ്റൂൺ നഗരത്തിൽ ഭവനരഹിതരുടെ എണ്ണം റെക്കോർഡ് വേഗത്തിൽ വർധിക്കുന്നതായി പുതിയ റിപ്പോർട്ട്. കഴിഞ്ഞ ഒക്ടോബറിൽ നടത്തിയ ‘പോയിന്റ് ഇൻ ടൈം’ (PiT) കണക്കെടുപ്പ് പ്രകാരം 1,931 പേരാണ് നഗരത്തിൽ വീടില്ലാതെ കഴിയുന്നത്. ഇത് സമീപത്തെ വാട്രസ് (Watrous) നഗരത്തിലെ ആകെ ജനസംഖ്യയ്ക്ക് തുല്യമാണെന്നത് സ്ഥിതിവിവരക്കണക്കുകളുടെ ഗൗരവം വർധിപ്പിക്കുന്നു. 2024-ൽ നടത്തിയ സർവേയിൽ 1,499 പേരായിരുന്നു ഈ പട്ടികയിൽ ഉണ്ടായിരുന്നത്. ഒരു വർഷത്തിനിടെ ഉണ്ടായ ഈ വലിയ വർധനവ് നഗരസഭയെയും സാമൂഹിക പ്രവർത്തകരെയും ഒരുപോലെ ആശങ്കയിലാഴ്ത്തിയിട്ടുണ്ട്.

പുറത്തുവന്ന റിപ്പോർട്ടിലെ കണക്കുകൾ പ്രകാരം 725 പേർ നേരിട്ട് തെരുവുകളിലാണ് കഴിയുന്നത്. 444 പേർ താൽക്കാലിക താമസകേന്ദ്രങ്ങളിലും, 327 പേർ എമർജൻസി ഷെൽട്ടറുകളിലും അഭയം തേടിയിട്ടുണ്ട്. സുഹൃത്തുക്കളുടെയോ ബന്ധുക്കളുടെയോ വീടുകളിൽ താൽക്കാലികമായി കഴിയുന്നവരും ഉപേക്ഷിക്കപ്പെട്ട കെട്ടിടങ്ങളിൽ അന്തിയുറങ്ങുന്നവരുമായ 237 പേരെയും റിപ്പോർട്ടിൽ ഹിഡൻ ഹോംലെസ് എന്ന വിഭാഗത്തിൽ ഉൾപ്പെടുത്തിയിട്ടുണ്ട്. എന്നാൽ യഥാർത്ഥ കണക്കുകൾ ഇതിലും ഉയർന്നതാകാമെന്നും, കൃത്യമായ വിവരങ്ങൾ ശേഖരിക്കാൻ പ്രായോഗിക ബുദ്ധിമുട്ടുകൾ ഉണ്ടെന്നും നഗരസഭാ പ്ലാനിംഗ് ആൻഡ് ഡെവലപ്‌മെന്റ് ഡയറക്ടർ ലെസ്ലി ആൻഡേഴ്സൺ വ്യക്തമാക്കി.

റിപ്പോർട്ടിലെ ഏറ്റവും ശ്രദ്ധേയമായ വസ്‌തുത ഭവനരഹിതരിൽ 83 ശതമാനവും തദ്ദേശീയ വിഭാഗത്തിൽ നിന്നുള്ളവരാണ് എന്നതാണ്. വ്യവസ്ഥാപിതമായ അസമത്വങ്ങളും സുരക്ഷിതമായ പാർപ്പിടം ലഭിക്കുന്നതിനുള്ള തടസ്സങ്ങളുമാണ് ഇതിലേക്ക് നയിക്കുന്നതെന്ന് നഗരസഭ വിലയിരുത്തുന്നു. സസ്‌കാറ്റൂണിൽ എത്തുന്നവരിൽ ഭൂരിഭാഗവും പഠനത്തിനായോ ചികിത്സയ്ക്കായോ എത്തുന്നവരാണെന്നും പിന്നീട് വിവിധ കാരണങ്ങളാൽ ഇവിടെത്തന്നെ തുടരേണ്ടി വരുന്നവരുമാണെന്ന് പഠനം പറയുന്നു. ഇതിൽ 43 ശതമാനം പേർ അഞ്ച് വർഷത്തിലേറെയായി നഗരത്തിൽ താമസിക്കുന്നവരാണ്.

കുട്ടികളുടെയും യുവാക്കളുടെയും എണ്ണത്തിൽ നേരിയ കുറവ് രേഖപ്പെടുത്തിയത് ആശ്വാസകരമാണെങ്കിലും ഇവർക്കായി കൂടുതൽ സ്ഥിരം സംവിധാനങ്ങൾ ഒരുക്കേണ്ടതുണ്ട്. പ്രതിസന്ധി പരിഹരിക്കാൻ ഫെഡറൽ സർക്കാരിന്റെ സഹായത്തോടെ ‘ഹൗസിംഗ് ആക്സിലറേറ്റർ ഫണ്ട്’ വഴി 756 മിതമായ നിരക്കിലുള്ള വീടുകൾ നിർമ്മിക്കാൻ നഗരസഭ അനുമതി നൽകിയിട്ടുണ്ട്. ഇതിൽ 298 എണ്ണത്തിന്റെ നിർമ്മാണ പ്രവർത്തനങ്ങൾ ഇതിനകം ആരംഭിച്ചു കഴിഞ്ഞു.

തെരുവുകളിൽ കഴിയുന്നവർക്ക് അടിസ്ഥാന സൗകര്യങ്ങൾ ഉറപ്പാക്കിയില്ലെങ്കിൽ പൊതുവിടങ്ങളിൽ കൂടുതൽ ക്രമസമാധാന പ്രശ്നങ്ങൾക്ക് ഇത് കാരണമാകുമെന്ന് അധികൃതർ മുന്നറിയിപ്പ് നൽകുന്നു. നഗരസഭയുടെ നയരൂപീകരണത്തിൽ ഈ പുതിയ കണക്കുകൾ നിർണ്ണായക സ്വാധീനം ചെലുത്തും. വരും വർഷങ്ങളിൽ കൂടുതൽ വിപുലമായ സർവേകൾ നടത്തി കൃത്യമായ പുനരധിവാസ പദ്ധതികൾ നടപ്പിലാക്കാനാണ് അധികൃതരുടെ തീരുമാനം.

saskatoons-homeless-population-is-now-roughly-the-size-of-watrous

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt