സഹപാഠിയെ തീകൊളുത്തിയ സംഭവം: സാസ്കാറ്റൂണിൽ പതിനഞ്ചുകാരിക്ക് പരമാവധി ശിക്ഷ; സുരക്ഷാ വീഴ്ചയെന്ന് കുടുംബം

സാസ്കാറ്റൂൺ: സാസ്കാറ്റൂണിൽ സഹപാഠിയുടെ ദേഹത്ത് പെട്രോൾ ഒഴിച്ച് തീകൊളുത്തി കൊലപ്പെടുത്താൻ ശ്രമിച്ച കേസിൽ പ്രതിയായ പെൺകുട്ടിക്ക് കൗമാര നിയമപ്രകാരമുള്ള പരമാവധി ശിക്ഷ വിധിച്ച് കോടതി. മൂന്ന് വർഷത്തെ ശിക്ഷയാണ് ജസ്റ്റിസ് ക്രിസ്റ്റ സെർ വിധിച്ചത്. ഇതിൽ രണ്ടു വർഷം തടവും ഒരു വർഷം കമ്മ്യൂണിറ്റി നിരീക്ഷണവുമാണ് ഉൾപ്പെടുന്നത്. 2024 സെപ്റ്റംബർ അഞ്ചിന് ഇവാൻ ഹാർഡി കൊളീജിയറ്റ് ഹൈസ്കൂളിലായിരുന്നു അന്താരാഷ്ട്ര തലത്തിൽ വരെ ചർച്ചയായ ഈ ക്രൂരകൃത്യം നടന്നത്.

ഒൻപതാം ക്ലാസ് മുതൽ സുഹൃത്തുക്കളായിരുന്ന പെൺകുട്ടികൾ തമ്മിലുണ്ടായ അസ്വാരസ്യങ്ങളാണ് ആക്രമണത്തിൽ കലാശിച്ചത്. പ്രതിയായ പെൺകുട്ടി ഇരയെ നിരന്തരമായി ഫോണിലൂടെയും സമൂഹമാധ്യമങ്ങളിലൂടെയും വേട്ടയാടിയിരുന്നതായി കോടതി കണ്ടെത്തി. ആക്രമണത്തിൽ ഇരയായ പെൺകുട്ടിയുടെ ശരീരത്തിന്റെ 40 ശതമാനത്തോളം പൊള്ളലേറ്റിരുന്നു. നിലവിൽ പെൺകുട്ടി നിരവധി ശസ്ത്രക്രിയകൾക്കും വിദഗ്ധ ചികിത്സയ്ക്കും വിധേയയായിക്കൊണ്ടിരിക്കുകയാണ്. പ്രായപൂർത്തിയാകാത്ത പ്രതിയായതിനാല് പ്രതിയുടെയും ഇരയുടെയും പേരുവിവരങ്ങൾ വെളിപ്പെടുത്തുന്നതിന് കോടതി വിലക്കുണ്ട്.

സ്കൂളിൽ വച്ച് ഇത്തരമൊരു ആക്രമണം നടക്കാൻ സാധ്യതയുണ്ടെന്ന് നേരത്തെ തന്നെ പോലീസിനും സ്കൂൾ അധികൃതർക്കും മുന്നറിയിപ്പ് നൽകിയിരുന്നതായി ഇരയുടെ കുടുംബം ആരോപിക്കുന്നു. “ഈ ദുരന്തം ഒഴിവാക്കാൻ ഞങ്ങളാൽ കഴിയുന്നതെല്ലാം ചെയ്തു. എന്നാൽ ഞങ്ങളുടെ ആശങ്കകൾ ഗൗരവമായി എടുത്തില്ല,” എന്ന് കുടുംബം പ്രസ്താവനയിൽ പറഞ്ഞു. സ്കൂളുകളിൽ വിദ്യാർത്ഥികളുടെ സുരക്ഷ ഉറപ്പാക്കുന്നതിൽ സർക്കാർ പരാജയപ്പെട്ടുവെന്നും വരും ദിവസങ്ങളിൽ ഇത്തരം സംഭവങ്ങൾ ആവർത്തിക്കാതിരിക്കാൻ കർശന നടപടി വേണമെന്നും കുടുംബാംഗങ്ങൾ ആവശ്യപ്പെട്ടു.

പ്രതിക്ക് പ്രായപൂർത്തിയായവർക്ക് നൽകുന്ന ശിക്ഷ നൽകണമെന്നായിരുന്നു പ്രോസിക്യൂഷൻ ആദ്യം ആവശ്യപ്പെട്ടിരുന്നത്. എന്നാൽ പ്രതിയുടെ മാനസിക നിലയും സുപ്രീം കോടതിയുടെ പുതിയ മാർഗ്ഗനിർദ്ദേശങ്ങളും പരിഗണിച്ച് ഈ ആവശ്യം പിന്നീട് പിൻവലിച്ചു. പ്രതിക്ക് ഓട്ടിസം, പൈറോമാനിയ (തീയിടാനുള്ള അമിതമായ വാസന), കഞ്ചാവ് ഉപയോഗം മൂലമുള്ള വൈകല്യങ്ങൾ, സ്കീസോഫ്രീനിയ തുടങ്ങിയ ഗുരുതരമായ മാനസിക പ്രശ്നങ്ങളുണ്ടെന്ന് കോടതിക്ക് ബോധ്യപ്പെട്ടു. പ്രതിയെ കുറ്റവാളിയായി കാണുന്നതിനേക്കാൾ ഉപരി ചികിത്സയിലൂടെ ജീവിതത്തിലേക്ക് മടക്കിക്കൊണ്ടുവരാനാണ് കോടതി മുൻഗണന നൽകുന്നത്.

കോടതി നടപടികൾ അവസാനിച്ചെങ്കിലും തങ്ങളുടെ മകൾക്ക് നേരിടേണ്ടി വന്ന വേദനയ്ക്ക് ഈ ചെറിയ ശിക്ഷാകാലയളവ് പരിഹാരമാകുന്നില്ലെന്ന സങ്കടത്തിലാണ് ഇരയുടെ കുടുംബം. സ്കൂൾ പരിസരങ്ങളിലെ അക്രമങ്ങൾ തടയാൻ നിയമനിർമ്മാണ സഭകൾ കൂടുതൽ ജാഗ്രത പുലർത്തണമെന്ന ചർച്ചകൾക്കും ഈ വിധി വഴിതുറന്നിരിക്കുകയാണ്.

saskatoon-teen-sentenced-to-3-years-for-setting-classmate-on-fire

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt