സ്കൂളുകൾ പൂട്ടേണ്ടി വരുമോ? സസ്കാച്ചവാൻ ബജറ്റിൽ അധ്യാപകർ കടുത്ത ആശങ്കയിൽ

റെജീന: സസ്കാച്ചവാൻ പ്രവിശ്യാ ബജറ്റിൽ വിദ്യാഭ്യാസ മേഖലയ്ക്ക് അനുവദിച്ച തുക അപര്യാപ്തമാണെന്നും ഇത് സ്കൂളുകളുടെ പ്രവർത്തനത്തെ ദോഷകരമായി ബാധിക്കുമെന്നും അധ്യാപക സംഘടനയായ സസ്കാച്ചവാൻ ടീച്ചേഴ്‌സ് ഫെഡറേഷൻ (STF). പുതിയ ബജറ്റ് നിർദ്ദേശങ്ങൾ ആഴത്തിൽ പരിശോധിച്ചാൽ പ്രവിശ്യയിലെ സ്കൂൾ ഡിവിഷനുകൾ വരുംദിവസങ്ങളിൽ കടുത്ത തീരുമാനങ്ങൾ എടുക്കാൻ നിർബന്ധിതരാകുമെന്ന് എസ്ടിഎഫ് പ്രസിഡന്റ് സാമന്ത ബെക്കോട്ട് മുന്നറിയിപ്പ് നൽകി.

ബുധനാഴ്ച ലെജിസ്ലേറ്റീവ് അസംബ്ലിയിൽ അവതരിപ്പിച്ച ബജറ്റിൽ വിദ്യാഭ്യാസത്തിനായി 6.22 കോടി ഡോളറിന്റെ വർധനവാണ് സർക്കാർ പ്രഖ്യാപിച്ചത്. എന്നാൽ, ഈ തുകയുടെ വിതരണത്തിൽ വലിയ അപാകതകളുണ്ടെന്നാണ് അധ്യാപകരുടെ പക്ഷം. പ്രത്യേക പരിഗണന അർഹിക്കുന്ന 50 ക്ലാസ് മുറികൾക്കായി മാറ്റിവെച്ച 1.63 കോടി ഡോളറും വിദ്യാർത്ഥികളുടെ എണ്ണത്തിലുണ്ടാകുന്ന വർധനവിനായി നീക്കിവെച്ച 60 ലക്ഷം ഡോളറും കഴിഞ്ഞാൽ, ബാക്കി തുക ദൈനംദിന ചെലവുകൾക്ക് ഒട്ടും തികയില്ലെന്ന് സാമന്ത ബെക്കോട്ട് ചൂണ്ടിക്കാട്ടി.

ഫലത്തിൽ 1.7 ശതമാനം വർധനവ് മാത്രമാണ് മറ്റ് ആവശ്യങ്ങൾക്കായി ലഭിക്കുക. ഇത് നാണയപ്പെരുപ്പ നിരക്കിനേക്കാൾ താഴെയാണെന്നും സംഘടന വ്യക്തമാക്കുന്നു. ബജറ്റ് വിഹിതം കുറയുന്നതോടെ ക്ലാസുകളിലെ വിദ്യാർത്ഥികളുടെ എണ്ണം വർധിക്കാനും പാഠ്യേതര വിഷയങ്ങൾക്കും കൗൺസിലിംഗിനുമുള്ള സൗകര്യങ്ങൾ വെട്ടിക്കുറയ്ക്കാനും സാധ്യതയുണ്ട്. 2025-ലെ ബജറ്റുമായി താരതമ്യം ചെയ്യുമ്പോൾ ഓരോ വിദ്യാർത്ഥിക്കും ലഭിക്കുന്ന തുകയിൽ ഏകദേശം 33 ഡോളറിന്റെ കുറവാണ് പുതിയ ബജറ്റിലൂടെ സംഭവിക്കുന്നതെന്നും റിപ്പോർട്ടുകൾ സൂചിപ്പിക്കുന്നു.

അതേസമയം, അധ്യാപക സംഘടനയുടെ പ്രതികരണത്തിൽ വിദ്യാഭ്യാസ മന്ത്രി എവററ്റ് ഹിൻഡ്‌ലി അതൃപ്തി രേഖപ്പെടുത്തി. കഴിഞ്ഞ മൂന്ന് വർഷത്തിനിടെ വിദ്യാഭ്യാസ മേഖലയിലെ നിക്ഷേപത്തിൽ 20 ശതമാനത്തോളം വർധനവ് സർക്കാർ വരുത്തിയിട്ടുണ്ടെന്ന് അദ്ദേഹം അവകാശപ്പെട്ടു. മറ്റ് മേഖലകളിൽ കാണാത്ത തരത്തിലുള്ള വലിയ നിക്ഷേപമാണ് വിദ്യാഭ്യാസത്തിന് നൽകുന്നത്. കൂടുതൽ അധ്യാപകരെ നിയമിക്കാനും അത്യാധുനിക സൗകര്യങ്ങളുള്ള ക്ലാസ് മുറികൾ ഒരുക്കാനും സർക്കാർ പ്രതിജ്ഞാബദ്ധമാണെന്നും മന്ത്രി കൂട്ടിച്ചേർത്തു.

2023 മുതൽ 2025 വരെ നീണ്ടുനിന്ന കടുത്ത സമരങ്ങൾക്കും തർക്കങ്ങൾക്കും ശേഷമാണ് സസ്‌കാച്ചവനിലെ വിദ്യാഭ്യാസ മേഖല ശാന്തമായത്. ഈ വസന്തകാലത്ത് അധ്യാപകരുടെ പുതിയ കരാർ ചർച്ചകൾ ആരംഭിക്കാനിരിക്കെ, നിലവിലെ ബജറ്റ് ചർച്ചകളെ ബാധിക്കുമോ എന്ന ആശങ്കയും ശക്തമാണ്. മുൻപുണ്ടായതുപോലുള്ള ജോലി തടസ്സപ്പെടുത്തലുകൾ ഒഴിവാക്കി സഹകരണാത്മകമായ രീതിയിൽ മുന്നോട്ട് പോകാനാണ് ആഗ്രഹിക്കുന്നതെന്ന് എസ്ടിഎഫ് വ്യക്തമാക്കി.

saskatchewan-teachers-federation-warns-of-cuts-in-schools-with-new-budge

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt